ଭଦ୍ରକ ବନ୍ୟପ୍ରାଣୀ ବନଖଣ୍ଡରେ କଇଁଛ ଗଣନା ଶେଷ, ପ୍ରତିକୂଳ ପାଗ ପାଇଁ କମିଛି କଇଁଛଙ୍କ ସଂଖ୍ୟା

ଭଦ୍ରକ, ୨୦ା୪ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ବନ୍ୟପ୍ରାଣୀ ବନଖଣ୍ଡ ଏବଂ ରାଜନଗର ବନ୍ୟପ୍ରାଣୀ ବନଖଣ୍ଡର ମିଳିତ ସହଯୋଗରେ କଇଁଛ ଗଣନା କାର୍ଯ୍ୟ ଶେଷ ହୋଇଛି । ମାର୍ଚ୍ଚ ୯ ତାରିଖରୁ ଏହା ଆରମ୍ଭ ହୋଇ ଶେଷ ହୋଇଛି । ଏସିଆ ମହାଦେଶର ସର୍ବବୃହତ୍ତ ଅଲିଭ୍ ରିଡଲେ କଇଁଛଙ୍କ ଏନ୍ତୁଡିଶାଳ କେନ୍ଦ୍ରାପଡା ଜିଲାର ଗହୀରମଥା (ନାସୀ) ରେ ଅଛି । ଗତବର୍ଷ ୨୦୧୯-୨୦ ମସିହାରେ ଏହି ସ୍ଥାନରେ ୪ ଲକ୍ଷ ୭ ହଜାର ୨ ଶହ ଅଲିଭ ରିଡଲେ କଇଁଛ ଅଣ୍ଡାଦାନ ପ୍ରକ୍ରିୟାରେ ସାମିଲ ଥିବାବେଳେ ଚଳିତବର୍ଷ ଏହାର ପରିମାଣ କମିଯାଇଛି । ୨୦୨୦-୨୧ ରେ ସମୁଦାୟ ୩ ଲକ୍ଷ ୪୯ ହଜାର ୬୨୫ ଟି ଅଲିଭ ରିଡଲେ କଇଁଛ ଏହି ସ୍ଥାନକୁ ଅଣ୍ଡା ଦେବାକୁ ଆସିଥିବା ସରକାରୀ ସୂତ୍ରରୁ ଜଣାପଡିଛି । ବର୍ତ୍ତମାନ ସମୟରେ ଏହି ଅଲିଭ ରିଡଲେ କେଉଁ ମହାଦେଶରୁ ଆସି ପୁନଶ୍ଚ କେଉଁଠିକୁ ଫେରନ୍ତି, ତାହାର ଆକଳନ କରିବା ସମ୍ଭବ ହୋଇପାରିନାହିଁ । ତେଣୁ କଇଁଛଙ୍କ ଗତିବିଧିକୁ ନଜର ରଖିବା ପାଇଁ କିଛି କଇଁଛଙ୍କୁ ଟ୍ୟାଗ୍ କରାଯାଇଛି । ଗଣସମୂହ ଅଣ୍ଡାଦାନ ପ୍ରକ୍ରିୟା ଗହୀରମଥା ନାସିରେ ହୋଇଥିବା ବେଳେ ଏଥର ନୂତନ ଭାବରେ କିଛି କଇଁଛ ଭଦ୍ରକ ଜିଲାର କନିକା ଦ୍ୱୀପକୁ ଆସିଥିବା ସରକାରୀ ସୂତ୍ରରୁ ଜଣାଯାଇଛି । ପ୍ରତିକୂଳ ପାଗ ପାଇଁ ଏହି କଇଁଛଙ୍କ ସଂଖ୍ୟା କମିଥିବା ଆଶା କରାଯାଉଛି । ଏହି ଅଲିଭରଡ୍‌ଲେ କଇଁଛଙ୍କ ଅଣ୍ଡାଦାନ ପରେ ୪୫ଦିନ ପର୍ଯ୍ୟନ୍ତ ଏହି ଅଣ୍ଡା ଉପରେ ତୀକ୍ଷଣ ନଜର ରଖାଯାଇଥାଏ । ୪୫ଦିନ ପରେ ଅଣ୍ଡାରୁ ଛୁଆ ଫୁଟିବା ପରେ ଏହି ଶାବକ କଇଁଛମାନେ ସମୁଦ୍ର ଆଡକୁ ଆଗଭର ହୋଇଥାନ୍ତି । ଏହି କଇଁଛଙ୍କ ଅଣ୍ଡାଦାନ, ଗଣନା ଓ ସୁରକ୍ଷା ପାଇଁ ଭଦ୍ରକ ବନ୍ୟପ୍ରାଣୀ ବନଖଣ୍ଡ ଏବଂ ରାଜନଗର ବନ୍ୟପ୍ରାଣୀ ବନଖଣ୍ଡ ମିଳିତ ଭାବରେ ଗହୀରମଥାର ଚତୁଃପାଶ୍ୱର୍ରେ ବେ୍ କ୍ୟାମ୍ପ କରି କଇଁଛଙ୍କ ଉପରେ ନଜର ରଖିଥାନ୍ତି ।