ଭଦ୍ରକ କାଳୀପୂଜା ମେଳା ପାଇଁ ଦିନ ଚୂଡ଼ାନ୍ତ, ନଭେମ୍ବର ୧୮ ପର୍ଯ୍ୟନ୍ତ ମେଳା, ୧୯ ସକାଳ ୯ଟା ସୁଦ୍ଧା ଭସାଣି

ଭଦ୍ରକ, ୧୩ା୧୦ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଓଡ଼ିଶା ପ୍ରସିଦ୍ଧ ଭଦ୍ରକ କାଳୀପୂଜା ଆୟୋଜନ ନେଇ ପୂର୍ବରୁ ପ୍ରଶାସନିକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇ ଯାଇଥିଲେ ବି ମେଳା ଆୟୋଜନ ନେଇ ଦିନ ଧାର୍ଯ୍ୟପାଇଁ ଆଜି ଦ୍ୱିତୀୟଥର ଜିଲ୍ଲା ପ୍ରଶାସନ ଆନୁକୂଲ୍ୟରେ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଛି । ଜିଲ୍ଲାପାଳ ସିଦ୍ଧେଶ୍ୱର ବଳିରାମ ବୋନ୍ଦରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ଏସ.୍‌.ପି. ବରୁଣ ଗୁଣ୍ଟୁପାଲି, ଅତିରିକ୍ତ ଜିଲ୍ଲାପାଳ ଶାନ୍ତନୁ କୁମାର ମହାନ୍ତି, ଉପଜିଲ୍ଲାପାଳ ମନୋଜ ପାତ୍ର, ଡେପୁଟୀ କଲେକ୍ଟର କାର୍ତ୍ତିକ ନାଥ ମଣ୍ଡଳ ପ୍ରମୁଖ ଯୋଗ ଦେଇଥିଲେ । ପ୍ରଶାସନ ତରଫରୁ ପ୍ରଦତ୍ତ କାର୍ଯ୍ୟସୂଚୀ ମତେ ନଭେମ୍ବର ୧୮ ରାତି ପର୍ଯ୍ୟନ୍ତ ମେଳା ଓ ୧୯ ତାରିଖ ସକାଳ ୯ଟା ସୁଦ୍ଧା ଭସାଣି ଶେଷ କରିବା ପାଇଁ ଧାର୍ଯ୍ୟ ଦିନ ଓ ସମୟକୁ ବୈଠକରେ ସର୍ବ ସମ୍ମତି କ୍ରମେ ଗ୍ରହଣ କରାଯାଇଥିଲା । ବୈଠକରେ ଉପସ୍ଥିତ ପୂଜା କମିଟିର ସଦସ୍ୟମାନେ ମେଳାପାଇଁ ଦିନେ ଅଧିକ ସମୟ ଇଚ୍ଛା କରୁଥିଲେ୍ ବି ପୋଲିସ ମୂତୟନ ଓ ଶାନ୍ତି ଶୃଙ୍ଖଳା ରକ୍ଷା କାର୍ଯ୍ୟ ନେଇ ପ୍ରଶାସନ ତରଫରୁ ଧାର୍ଯ୍ୟ ଦିନ ମଧ୍ୟରେ ମେଳା ଶେଷ କରିବାକୁ ସହଯୋଗ କରିବା ପାଇଁ କମିଟି ସଦସ୍ୟ ମାନଙ୍କୁ ଅନୁରୋଧ କରାଯାଇଥିଲା ଏବଂ ଏହି ପ୍ରସ୍ତାବକୁ ସମସ୍ତେ ଗ୍ରହଣ କରିଥିଲେ ।