ଭଦ୍ରକ, ୨୮ା୪ (ଓଡ଼ିଆ ପୁଅ / ସ୍ନିଗ୍ଧା ରାୟ) – କେନ୍ଦ୍ର ଠାରୁ ରାଜ୍ୟ ସରକାର ଗ୍ରାମାଞ୍ଚଳରେ ଉନ୍ନତି ଓ ବିକାଶ ନିମନ୍ତେ ସିଧାଶଳଖ ଭାବରେ ସରପଂଚ ମାନଙ୍କୁ କ୍ଷମାତା ପ୍ରଦାନ କରିଛନ୍ତି । ହେଲେ ସରପଂଚମାନେ ତାଙ୍କ କ୍ଷମତାର ଅପବ୍ୟବହାର କରିବାସହିତ ବିଭାଗୀୟ ଅଧିକାରୀଙ୍କୁ ହାତବାରିସକରି ଲକ୍ଷ ଲକ୍ଷ ଟଙ୍କା ହରିଲୁଟ କରୁଛନ୍ତି । ଏମିତି ଏକ ଘଟଣା ଘଟିଛି ଧାମନଗର ବ୍ଲକ ସୋହଡ଼ା ପଂଚାୟତରେ ଉକ୍ତ ପଂଚାୟତର ସରପଂଚ ମନୋମୁଖି ଭାବରେ କେତେକ ରାଜନୈତିକ ବ୍ୟକ୍ତିଙ୍କ ପ୍ରଲୋଚନାରେ ବିଭାଗୀୟ ଅଧିକାରୀଙ୍କ ସହ ହାତମେଳାଇ ଏମ୍ଜିଏନ୍ଆରଜିଏସ୍ ମାଧ୍ୟମରେ ଆସିଥିବା ଅର୍ଥକୁ ହରିଲୁଟ କରୁଛନ୍ତି । ପ୍ରକାଶ ଥାଉକି ସୋହଡ଼ା ପଂଚାୟତ ପକ୍ଷରୁ ମହାତ୍ମାଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନାରେ ଅଚ୍ୟୁତପତି ଘରସାମ୍ନା ହରପାର୍ବତି ଖେଳପଡ଼ିଆ ଉନ୍ନତି କରଣ ନିମନ୍ତେ କାର୍ଯ୍ୟ ହୋଇଥିଲା । ମାତ୍ର ଏହି ଯୋଜନା ସୋହଡ଼ା ପଂଚାୟତରେ ନହୋଇ ଖଡ଼ିପଦା ପଂଚାୟତ ବୈକୁଣ୍ଠି ରାଜସ୍ୱ ଗ୍ରାମର ଶିବମନ୍ଦିର ପରିସରରେ କରାଯାଇଥିଲା । ଯାହାକି ସମ୍ପୁର୍ଣ୍ଣ ଭାବରେ ଆଇନ୍ ବିରୋଧ । ସୋହଡ଼ ପଂଚାୟତର ଅର୍ଥ ସେଇ ସୋହଡ଼ା ପଂଚାୟତରେ ଖର୍ଚ୍ଚ ହୋଇପାରିବ ଏବଂ ସେଠାକାର ଶ୍ରମିକ ମାନେ ଏହି କାର୍ଯ୍ୟ କରିବେ । ହେଲେ କିପରି ଭାବରେ ସୋହଡ଼ା ପଂଚାୟତର କାମ ଖଡ଼ିପଦା ପଂଚାୟତରେ କରାଗଲା ସେ ନେଇ ସାଧାରଣରେ ପ୍ରଶ୍ନବାଚି ସୃଷ୍ଟି ହୋଇଛି । ଏ ନେଇ ଖଡ଼ିପଦାର ପଂଚାୟତର ବୈକୁଣ୍ଠି ରାଜସ୍ୱ ଗ୍ରାମର ଗ୍ରାମବାସୀ ଓ ଶ୍ରମିକ ମାନେ ଧାମନଗର ବିଡ଼ିଓଙ୍କ ନିକଟରେ ଅଭିଯୋଗ କରିଥିଲେ । ବିଡ଼ିଓ ସମ୍ପୃକ୍ତ ସହକାରୀ ଯନ୍ତ୍ରୀକୁ କାର୍ଯ୍ୟର ତଦନ୍ତ କରିବା ସହିତ ବିଲ୍ ବନ୍ଦକରିବା ପାଇଁ ନିର୍ଦ୍ଦେଶ ଦେଇଥିଲେ । ହେଲେ ସହକାରୀ ଯନ୍ତ୍ରୀ ବିଡ଼ିଓଙ୍କ ନିର୍ଦ୍ଦେଶକୁ ଖାତିରନକରି ଗତମାସ ୧୨ଜଣ ଶ୍ରମିକଙ୍କର ୬ଦିନର ମଜୁରି ପ୍ରଦାନ କରିଛନ୍ତି । ଏନେଇ ସହକାରୀଯନ୍ତ୍ରୀଙ୍କ ସହ ଯୋଗାଯୋଗ କରିବାରୁ ସେ କୁହନ୍ତି ପଂଚାୟତର ଉନ୍ନତି ହେଉଛି ଏବଂ ଶ୍ରମିକ ମାନେ କାର୍ଯ୍ୟକରୁଛନ୍ତି । ଏଥିରେ ଅସୁବିଧା କେଉଁଠି ରହିଲାବୋଲି ସେ ଓଲଟି ପ୍ରଶ୍ନ କରିଛନ୍ତି । ଏଦୀଗରେ ଖଡ଼ିପଦା ପଂଚାୟତର ପୂର୍ବତନ ସରପଂଚ ଅତିଶକୁମାର ନନ୍ଦ କୁହନ୍ତି ଖଡ଼ିପଦା ପଂଚାୟତରେ ବହୁ ଉନ୍ନତିକରଣ କାର୍ଯ୍ୟ ହୋଇଛି ଏବଂ ପଂଚାୟତ ପକ୍ଷରୁ ମଧ୍ୟ ବିଭିନ୍ନ କାର୍ଯ୍ୟ ହାତକୁ ନିଆଯାଇଛି । ତେବେ ଅନ୍ୟ ପଂଚାୟତର ଅର୍ଥ ଖଡ଼ିପଦା ପଂଚାୟତରେ ବିନିଯୋଗ କରାଯାଉଥିବାବେଳେ ଖଡ଼ିପଦା ପଂଚାୟତ ଶ୍ରମିକ ମାନେ ମଧ୍ୟ ଏହି କାମରୁ ବଂଚିତ ହୋଇଛନ୍ତି । ଏ ଦୀଗରେ ବିଧିବଧ ତଦନ୍ତ କରାଗଲେ ପ୍ରକୃତ ସତ୍ୟତା ପଦାକୁ ଆସିପାରିବ ବୋଲି ଶ୍ରୀ ନନ୍ଦ କହିଛନ୍ତି ।
ବିଡ଼ିଓଙ୍କ ନିର୍ଦ୍ଦେଶକୁ ଖାତିର ନକରି ସହକାରୀ ଯନ୍ତ୍ରୀଙ୍କ ମନୋମୁଖି କାର୍ଯ୍ୟ, ସୋହଡ଼ା ପଂଚାୟତର ଏମ୍ଜିଏନ୍ଆରଜିଏସ୍ ଦୁର୍ନୀତି ଅଭିଯୋଗ, ସୋହଡ଼ା ପଂଚାୟତର ଅର୍ଥ ଖଡ଼ିପଦାରେ ଖର୍ଚ୍ଚ
