ବାତ୍ୟା ‘ଜୱାଦ’ ପ୍ରଭାବରେ ପ୍ରବଳ ବର୍ଷା ସହ ସୁଲୁସୁଲିଆ ପବନ, ବିଭିନ୍ନ ଚାଷ ନଷ୍ଟ, ଚାଷୀକୂଳ ଚିନ୍ତାରେ

ଭଦ୍ରକ, ୫ା୧୨ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଏହି ଜିଲା ରଧାମନଗର ବ୍ଲକ୍ ଓ ସହରାଞ୍ଚଳରେ ବାତ୍ୟା ‘ଜୱାଦ’ ପ୍ରଭାବରେ ଗତକାଲି ରାତିରୁ ଅଳ୍ପ ବର୍ଷା ଆରମ୍ଭ ହୋଇ ଆଜି ସକାଳୁ ପ୍ରବଳରୁ ପ୍ରବଳ ବର୍ଷା ସହିତ ସୁଲୁସୁଲିଆ ପବନ ଯୋଗୁଁ ଚାଷୀଙ୍କ ସମେତ ସାଧାରଣ ଜନଜୀବନ ଅସ୍ତବ୍ୟସ୍ତ ହୋଇପଡିଛି । ଉପକୂଳ ଓଡ଼ିଶାକୁ ବାତ୍ୟାର ଭୟ ନାହିଁ ବୋଲି ପାଣିପାଗ ବିଭାଗ ପକ୍ଷରୁ ସୂଚନା ଦେଇଥିଲେ ହେଁ ବାତ୍ୟା ପ୍ରଭାବରେ ବର୍ଷା ଓ ପବନ ହେବା ପାଇଁ ସତର୍କ ସୂଚନା ଦେଇଥିଲେ । ଧାମନଗର ଅଂଚଳରେ ବର୍ଷା ଓ ସୁଲୁସୁଲିଆ ପବନ ଲାଗିରହିଛି । ଯାହାଫଳରେ ଲୋକମାନେ ଆତଙ୍କିତ ଅବସ୍ଥାରେ ଅଛନ୍ତି । ଗ୍ରାମାଞ୍ଚଳ ଓ ସହରାଞ୍ଚଳରେ ଦୋକାନ ବଜାର ବନ୍ଦ ରହିଥିବାବେଳେ ରାସ୍ତାରେ ଯାନବାହନ ଚଳାଚଳ କାଁ ଭାଁ ଦେଖିବାକୁ ମିଳିଛି । ଏପରିକି ଧାମନଗରରୁ କଟକ, ଭୁବନେଶ୍ୱର, ଭଦ୍ରକକୁ ବସ୍ ଚଳାଚଳ ବନ୍ଦ ରହିଥିବା ଜଣାପଡିଛି । ବାତ୍ୟାକୁ ମୁକାବିଲା କରିବା ପାଇଁ ସମସ୍ତ ପ୍ରକାର ପ୍ରସ୍ତୁତି ସରିଛି ଏବଂ ବ୍ଲକ୍ ପ୍ରଶାସନ ତରଫରୁ ପୁରା ସଜାଗ ଅଛନ୍ତି ବୋଲି ବିଡିଓ ଦୁର୍ଗାଚରଣ ମୁର୍ମୁ ସୂଚନା ଦେଇଛନ୍ତି । ବାତ୍ୟା ପ୍ରଭାବରେ ବର୍ଷା ଯୋଗୁଁ ଧାମନଗର ବ୍ଲକ୍ ତଳିଆ ଅଂଚଳର ପାଚିଲା ଧାନ ସହ, କୋବି, ଭେଣ୍ଡି, ବାଇଗଣ, ପୋଟଳ, ଜହ୍ନି ଇତ୍ୟାଦି ପନିପରିବା ଚାଷରେ ପାଣି ବୁଡି ସଂପୂର୍ଣ୍ଣ ନଷ୍ଟ ହୋଇଛି । ପୂର୍ବରୁ ଆଳୁ, ପିଆଜ ଠାରୁ ଆରମ୍ଭ କରି ପନିପରିବା ଦର ଆକାଶ ଛୁଆଁ ହୋଇଥିବାବେଳେ ବାତ୍ୟା ପ୍ରଭାବରେ ବର୍ଷା ବିଭିନ୍ନ ସ୍ଥାନରେ ପନିପରିବା ନଷ୍ଟ ହେବା ଫଲରେ ଆଗକୁ ଦର କଣ ହେବ ଏନେଇ ଚିନ୍ତାରେ ପଡିଛି ଖାଉଟି ।