ପବିତ୍ର ଜନ୍ମାଷ୍ଟମୀ ପାଇଁ ଉତ୍ସବମୁଖର ଆଖଣ୍ଡଳମଣି ପୀଠ, ଅର୍ଦ୍ଧରାତ୍ରରେ ଅନୁଷ୍ଠିତ ହେଲା କଂସ ମହିପାଳ ନୀତି

ଭଦ୍ରକ, ୬ା୯ (ଓଡ଼ିଆ ପୁଅ / ସ୍ନିଗ୍ଧା ରାୟ) – ପବିତ୍ର ଜନ୍ମାଷ୍ଟମୀ ଉପଲକ୍ଷେ ଆଜି ରାଜ୍ୟର ପ୍ରସିଦ୍ଧ ଶୈବପୀଠ ଆରଡି ଆଖଣ୍ଡଳମଣିଙ୍କ ମନ୍ଦିର ପରିସର ଉତ୍ସବ ମୁଖର ହୋଇଉଠିଥିଲା । ରୀତିନୀତି ଅନୁଯାୟୀ ଭୋର୍ ୪ଟାରେ ମନ୍ଦିର ଦ୍ୱାରଫିଟା ନୀତି ସଂପନ୍ନ ହେବା ପରେ ମଙ୍ଗଳ ଆଳତି, ଘର୍ଷଣଲାଗି ସହ ଅନ୍ୟାନ୍ୟ ନୀତି ଅନୁଷ୍ଠିତ ହୋଇଥିଲା । ଏହିପରି ଭାବେ ହରି ଜନ୍ମାଷ୍ଟମୀ ନୀତି ନିମନ୍ତେ ଶ୍ରୀକୃଷ୍ଣଙ୍କ ପୂଜା ମଣ୍ଡପକୁ ଆକର୍ଷଣୀୟ କରି ସଜ୍ଜିତ କରାଯିବା ସହ ମହାସ୍ନାନ, ତୁଳସୀ ଲାଗି ଓ ପୂଜାର୍ଚ୍ଚନା କରାଯାଇଥିଲା । ପ୍ରାତଃରୁ ରାତ୍ର ଯାଏ ଭକ୍ତଙ୍କ ଦର୍ଶନ ଓ ଭୋଗଲାଗି ନିମନ୍ତେ ସାହାଣମେଲା କରାଯାଇଥିଲା ପୂଜା ମଣ୍ଡପକୁ । ସନ୍ଧ୍ୟାରେ ହରିବଂଶ ପଠନ, ଷୋଡଶ ଉପଚାର ପୂଜା ସଂପନ୍ନ ହେବା ପରେ ପୁରାଣ ବର୍ଣ୍ଣିତ ଅନୁଯାୟୀ ଅର୍ଦ୍ଧରାତ୍ରରେ ଅର୍ଥାରେ ରାତି ୧୨ଟାରେ ମନ୍ଦିର ପ୍ରାଙ୍ଗଣରେ କଂସ ମହିପାଳ ନୀତି ଅନୁଷ୍ଠିତ ହୋଇଥିଲା । ଏଥିପାଇଁ ସେବାୟତମାନେ ଏକ ସୁସଜ୍ଜିତ ପଟୁଆରାରେ ଶ୍ରୀକୃଷ୍ଣଙ୍କୁ ବିଜେ କରାଇ ନଗରୀ କରିବା ପରେ ମନ୍ଦିର ବେଢା ପ୍ରାଙ୍ଗଣରେ ପହଞ୍ôଚଥିଲେ । ସେଠାରେ ମହାରାଜା ଉଗ୍ରସେନ ବେଶରେ ସେବାୟତ ବାଟ ଓଗାଳିବା ସହ ପରିଚୟ ପାଇବା ପରେ ପୁନର୍ବାର ମନ୍ଦିରକୁ ବିଜେ କରିଥିଲେ ଭଗବାନ ଶ୍ରୀକୃଷ୍ଣ । ଏହିଭଳି ନିଆରା ଭାବେ ଏଠାରେ ଜନ୍ମାଷ୍ଟମୀ ପାଳନ ହେଉଥିବାରୁ ବହୁ ଭକ୍ତଙ୍କ ସମାଗମ ହୋଇଥିଲା । ଏପରିକି ଭକ୍ତଙ୍କ ହରିବୋଲ ହୁଳ ହୁଳି ଓ ଘଣ୍ଟା କୀର୍ତ୍ତନରେ ଉତ୍ସବମୁଖର ହୋଇ ଉଠିଥିଲା ମନ୍ଦିର ପରିସର ।