ଭଦ୍ରକ, ୧ା୧ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଆଜି ଇଂରାଜୀ ନବବର୍ଷ ଉପଲକ୍ଷେ ଓଡ଼ିଶା ପ୍ରସିଦ୍ଧ ଶୈବପୀଠ ଆରଡିସ୍ଥିତ ବାବା ଆଖଣ୍ଡଳମଣିଙ୍କୁ ଦର୍ଶନ ଓ ପୂଜାର୍ଚ୍ଚନା କରିବା ପାଇଁ ଲକ୍ଷାଧିକ ଭକ୍ତଙ୍କ ସମାଗମ ହୋଇଥିଲା । ଶ୍ରଦ୍ଧାଳୁ ଭକ୍ତମାନଙ୍କ ଭିଡକୁ ଦୃଷ୍ଟିରେ ରଖି ପୀଠରେ ଗତ ରବିବାର ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଥିଲା । ମାତ୍ର ଭକ୍ତଙ୍କ ସଂଖ୍ୟା ଏତେ ବୃଦ୍ଧି ପାଇଥିଲାଯେ ଯାହାକୁ ନିୟନ୍ତ୍ରଣ କରିବା ପାଇଁ ପୁଲିସ୍ଙ୍କୁ ନାକେଦମ୍ ହେବାକୁ ପଡିଥିଲା । ଏପରିକି ଭକ୍ତମାନେ ବ୍ୟାରିକେଡ୍ ଭାଙ୍ଗି ଧସେଇ ପଶିଥିଲେ ମନ୍ଦିର ଭିତରକୁ । ପରିସ୍ଥିତି ଏଭଳି ସଂଗୀନ ହୋଇଥିଲା ଯେ ଭକ୍ତମାନଙ୍କ ମଧ୍ୟରେ ଠେଲାପେଲା ହେବା ସହ କିଛିଘଣ୍ଟା ସେମାନେ ଅଣନିଶ୍ୱାସୀ ହୋଇପଡିଥିଲେ । ଫଳରେ ବହୁ ବୟସ୍କ ମହିଳା ଓ ଛୋଟପିଲା ସଂଜ୍ଞାହୀନ ହୋଇପଡିଥିଲେ । ଅନ୍ୟପଟେ ନଦୀ ପାର ହେବା ପାଇଁ ନଦୀଘାଟରେ ଡଙ୍ଗାର ଅସମ୍ଭାଳ ଭିଡ ଲାଗି ରହିଥିଲା । ଏଥିସହ ସ୍ଥଳପଥରେ ଭଦ୍ରକ-ଆରଡି ରାସ୍ତାର ଓଳଗ ମଠ ଠାରୁ ଆରଡି ପୀଠ ପର୍ଯ୍ୟନ୍ତ ଦୀର୍ଘ ୩ କିମି ରାସ୍ତାର ଉଭୟ ପାଶ୍ୱର୍ରେ ଶହ ଶହ ଗାଡି ଅଟକି ରହିଥିଲା । ୨ ଘଣ୍ଟା ଧରି ଗାଡି ଜାମ୍ ରହିବା ପରେ ସ୍ଥାନୀୟ ପହଣା ଓ ମଠଡିହ ଲୋକଙ୍କ ସହ ପୁଲିସ୍ ଆଲୋଚନା କରି ସ୍ଥିତି ନିୟନ୍ତ୍ରଣ କରିବାରୁ ଗାଡି ଚଳାଚଳ ସ୍ୱାଭାବିକ ହୋଇଥିଲା । ଏପଟେ ଭକ୍ତମାନଙ୍କ ଭିଡକୁ ଦୃଷ୍ଟିରେ ରଖି ଭୋର୍ ୪ଟାରେ ମନ୍ଦିର ପହଡ ଖୋଲିବା ପରେ ସହଳ ନୀତିକାନ୍ତି କରାଯାଇ ସକାଳ ୫ଟାରୁ ରାତ୍ର ୧୧ଟା ପର୍ଯ୍ୟନ୍ତ ମନ୍ଦିର ସାହାଣମେଲା କରାଯାଇଥିଲା ।
ନୂଆବର୍ଷରେ ଆଖଣ୍ଡଳମଣିଙ୍କ ପୀଠରେ ଲକ୍ଷାଧିକ ଭକ୍ତଙ୍କ ସମାଗମ, ଭିଡ ନିୟନ୍ତ୍ରଣ କରିବାରେ ନାକେଦମ୍, ବ୍ୟାରିକେଡ୍ ଭାଙ୍ଗି ମନ୍ଦିର ଭିତରକୁ ଧସେଇ ପଶିଲେ ଭକ୍ତ
