ନବ ନିର୍ମିତ ଭଦ୍ରକ ମେଡ଼ିକାଲ ସିଲିଂ ଗଳିପଡ଼ିବା ଘଟଣା, ଅନୁଧ୍ୟାନ କଲେ ଭଦ୍ରକ ବିଧାନସଭା କଂଗ୍ରେସ ନେତୃମଣ୍ଡଳୀ

ଭଦ୍ରକ, ୩ା୯ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଗତକାଲି ଅପରାହ୍ଣରେ ସାମାନ୍ୟ ବର୍ଷା ଓ ଅଳ୍ପ ମାତ୍ର ପବନରେ ଭଦ୍ରକ ଗେଲପୁରଠାରୁ ନବ ନର୍ମିତ ଭଦ୍ରକ ମେଡ଼ିକାଲ (ଶିଶୁ ଓ ପ୍ରସୂତୀ ବିଭାଗ)ର ଚତୁର୍ଥ ମହଲାର ଶିଶୁ ୱାର୍ଡର ସିଲିଂ ଓ ପ୍ଲାଏ ପାର୍ଟିସନ ଗଳିି ପଡ଼ିବା ଘଟଣାର ଅନୁଧ୍ୟାନ କରିଛି ଭଦ୍ରକ ବିଧାନସଭା କଂଗ୍ରେସ । ଆଜି ଭଦ୍ରକ ବିଧାନସଭା କଂଗ୍ରେସ ନେତା ନଳିନୀକାନ୍ତ ମହାନ୍ତିଙ୍କ ନେତୃତ୍ୱରେ କଂଗ୍ରେସର କିଛି ନେତା ମେଡ଼ିକାଲକୁ ଯାଇ ମେଡ଼ିକାଲର ଦୁରବସ୍ଥା ବୁଲି ଦେଖିଥିଲେ । ଗତକାଲି ଅପରାହ୍ଣରେ ବର୍ଷା ପବନ ସମୟରେ ମେଡ଼ିକାଲର ଶିଶୁ ବିଭାଗରେ ହୋଇଥିବା ପ୍ଲାଏ ପାର୍ଟିସନ ଓ ଉପର ସିଲିଂ ଗଳି ପଡ଼ିଥିଲା । ମାତ୍ର ସୌଭାଗ୍ୟ ବଶତଃ କୌଣସି ଅଘଟଣା ଘଟି ନଥିଲା । ଏହି ଦୁର୍ଘଟଣା ପରେ ସେହି ୱାର୍ଡରେ କୌଣସି ରୋଗୀ ନିଜକୁ ସୁରକ୍ଷିତ ନମଣି ବାରଣ୍ଡାକୁ ବାହାରି ଆସି ବାରଣ୍ଡାରେ ଶୋଇ ଚିକିତ୍ସିତ ହେଉଛନ୍ତି । ଯାହାକୁ ଦଳ ପକ୍ଷରୁ ଘୋର ନିନ୍ଦା କରାଯିବା ସହ ଉଦ୍‌ବେଗ ପ୍ରକଟ କରାଯାଇଛି । ଉକ୍ତ ମେଡ଼ିକାଲ ଗୃହ ନିର୍ମାଣରେ ବ୍ୟାପକ ପିସି କାରବାର ହୋଇଛି ବୋଲି ଶ୍ରୀ ମହାନ୍ତି ଅଭିଯୋଗ କରିଛନ୍ତି । ଉକ୍ତ ଗୃହର ମାନ ପରୀକ୍ଷା କରାଯାଇ ପ୍ରକୃତ ସତ୍ୟର ଉନ୍ମୋଚନ କରାଯିବା ସହ ଏହିଭଳି ଆତ୍ମଘାତୀ କାର୍ଯ୍ୟ କରିଥିବା କଣ୍ଟ୍ରାକ୍ଟର ଏବଂ ଅଧିକାରୀଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ଶ୍ରୀ ମହାନ୍ତି ଦାବି କରିଛନ୍ତି । ସତ୍ୟାସତ୍ୟ ପଦାକୁ ନଆସିଲେ କଂଗ୍ରେସ ପକ୍ଷରୁ ଜିଲ୍ଳା ମୁଖ୍ୟ ଚିକିତ୍ସାଧିକାରୀଙ୍କ କାର୍ଯ୍ୟାଳୟ ଘେରାଓ କରାଯିବ ବୋଲି ଚେତାବନୀ ଦେଇଛନ୍ତି । ଏହି ପ୍ରତିନିଧି ଦଳରେ ଜିଲ୍ଲା ଯୁବ କଂଗ୍ରେସ ସଭାପତି ହେମନ୍ତ ମହାପାତ୍ର, ବିଜୟ ବାରିକ, ସତ୍ୟ ପୁହାଣ, ରଞ୍ଜନ ଜେନା, ରାଜନ ଲାହା, ପୀତବାସ ଧଳ, ଶଶୀକାନ୍ତ ଜେନା ପ୍ରମୁଖ ମେଡ଼ିକାଲ ବୁଲି ସମଗ୍ର ଘଟଣାର ଅନୁଧ୍ୟାନ କରିଥିଲେ ।