ଧାମନଗରରେ ଅଭାବନୀୟ ଘଟଣା, ବନ୍ୟା ପାଣିରୁ ସାମଗ୍ରୀ ସୁରକ୍ଷିତ ରଖିବା ବେଳେ ବିଦ୍ୟୁତ୍ ଆଘାତରେ ବ୍ୟକ୍ତିଙ୍କ ମୃତ୍ୟୁ

ଭଦ୍ରକ, ୨୯ା୭ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଧାମନଗର ଏନ.ଏ.ସି. ଅନ୍ତର୍ଗତ ୯ ନମ୍ବର ୱାର୍ଡର ପଠାନ ମହଲା ସାମସୁଦିନି ଖାଁ ଧାମନଗର – ଫଳପୁର ରାସ୍ତା ପାଖରେ ରହୁ ଥିବାବେଳେ ଅତ୍ୟନ୍ତ ଦୁଃଖଦାୟକ ଭାବରେ ବିଦ୍ୟୁତ୍ ଆଘାତରେ ମୃତ୍ୟୁ ଘଟିଛି। ସୁଚନା ଥାଉକି ଗ୍ରାମରେ ବନ୍ୟା ପାଣି ପଶିଯିବାରୁ ସେ ନିଜ ଘରର ଆସବାବପତ୍ର ଓ ଘରୋଇ ସାମଗ୍ରୀଗୁଡ଼ିକୁ ସୁରକ୍ଷିତ ଭାବରେ ଛାତ ଉପରକୁ ସ୍ଥାନାନ୍ତର କରୁଥିଲେ। ଏହି ସମୟରେ ସତର୍କତା ଅବଲମ୍ବନ କରୁଥିବା ବେଳେ ଦୁର୍ଭାଗ୍ୟବଶତଃ ବିଦ୍ୟୁତ୍ ତାର ସଂସ୍ପର୍ଶରେ ଆସି ସେ ଗୁରୁତର ଭାବେ ଆହତ ହୋଇଥିଲେ।ପରିବାରବର୍ଗ ଓ ସ୍ଥାନୀୟ ଲୋକମାନେ ତୁରନ୍ତ ତାଙ୍କୁ ଉଦ୍ଧାର କରି ଧାମନଗରସ୍ଥିତ ଡାକ୍ତରଖାନାକୁ ନେଇଥିଲେ। ସେଠାରେ ଡାକ୍ତର ତାଙ୍କୁ ପରୀକ୍ଷା କରି ମୃତ ଘୋଷଣା କରିଥିଲେ। ଏହି ଅଘଟଣ ପରେ ସ୍ଥାନୀୟ ଅଂଚଳରେ ଶୋକର ଛାୟା ଖେଳିଯାଇଛି।