ଭଦ୍ରକ, ୧୫ା୧ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଘରୋଇ ବିଜୁଳି ଆବଂଟନକାରୀ ସଂସ୍ଥାଙ୍କ ହାତରେ ଭଦ୍ରକ ପୌରପାଳିକାର ବିଜୁଳି ସେବା । ତେଣେ ଖତ ଖାଉଛି ଭଦ୍ରକ ପୌରପାଳିକା ଦ୍ୱାରା କ୍ରୟ କରାଯାଇଥିବା ୧୮ ଲକ୍ଷ ଟଙ୍କାର ଅତ୍ୟାଧୁନିକ ହାଇଡ୍ରୋଲିକ ଲାଡର ଗାଡି । ପୌରପାଳିକାର ବିଜୁଳି ଯୋଗାଣ ବ୍ୟବସ୍ଥା ଘରୋଇ କମ୍ପାନୀ ଉପରେ ନ୍ୟସ୍ତ କରାଯାଇଥିବା ହେତୁ ପୌରପାଳିକା ଲାଡର ଗାଡି ବର୍ଷ ବର୍ଷ ଧରି ଅଚଳ ପଡିଛି । ଫଳରେ ବ୍ୟବହାର ହୋଇ ନପାରି ଖତ ଖାଇବାକୁ ବସିଛି ପୌରପାଳିକାର ଏହି ଅତ୍ୟାଧୁନିକ ଲାଡର ମେସିନ । ଭଦ୍ରକ ପୌରପାଳିକାକୁ ଅମୃତ ଯୋଜନାରେ ସାମିଲ କରାଯିବା ପରେ ସହର ଆଲୋକୀକରଣ ରେ ରାସ୍ତା ଘାଟରେ ଲଗାଯାଉଥିବା ଉଜ୍ଜଳ ଆଲୋକ ବ୍ୟବସ୍ଥାର ରକ୍ଷଣାବେକ୍ଷଣ ସକାସେ ଗତ ପୌରପାଳିକା ସମୟରେ ପୌର କାଉନସିଲ ଅନୁମୋଦନରେ ଏହି ଅତ୍ୟାଧୁନିକ ଗାଡି କିଣାଯାଇଥିଲା । ଅଧିକ ଉଚତାରେ ଲଗାଯାଉଥିବା ଉଜ୍ଜଳ ଆଲୋକ ରକ୍ଷଣାବେକ୍ଷଣ ସକାସେ ବାରମ୍ଭାର ଭାରାବାନ୍ଧି କାମ କରିବା ବ୍ୟୟସାପେକ୍ଷ ହେବାରୁ ପୌରପାରିଷଦ ଅନୁମୋଦନ କ୍ରମେ ପୈାରପାଳିକା ପକ୍ଷରୁ ଗତ ୨୦୧୮ ମସିହାରେ ଏହି ଅତ୍ୟାଧୁନିକ ହାଇଡ୍ରୋଲିକ ସିଡିି କିଣାଯାଇଥିଲା । ତେବେ ଭଦ୍ରକ ପୌରପାଳିକାକୁ ଅମୃତ ଯୋଜନାରେ ସାମିଲ କରାଯିବା ସହିତ ସହର ଆଲୋକୀକରଣ ବ୍ୟବସ୍ଥା ପୌରପାଳିକା ବଦଳରେ ରାଜ୍ୟ ବାହାରର ଏକ ବିଜୁଳି ଯୋଗାଣ କାରୀ ସଂସ୍ଥା ଇଇସିଏଲଙ୍କୁ ହସ୍ତାନ୍ତର କରାଯାଇଥିଲା ।
ଫଳରେ ପୌରପାଳିକା ପାଇଁ ଏହି ଅତ୍ୟାଧୁନିକ ଲାଡର ବେକାର ସାବ୍ୟସ୍ତ ହୋଇଥିଲା । ଯାହାକୁ ନା ପୌରପାଳିକା ନିଜସ୍ୱ ବ୍ୟବହାରରେ ବିନିଯୋଗ କରିପାରୁଛି ନା ଘରୋଇ କମ୍ପାନୀଙ୍କୁ ଭଡାସୁତ୍ରରେ ଦେଇ ପାରୁଛି । ଯାହାକି ଆଜି ସୁଦ୍ଧା ପୌରକାର୍ଯ୍ୟାଳୟରେ ପରିତ୍ୟକ୍ତ ହୋଇ ପଡି ରହିଛି । ସହରର ବିଜୁଳି ଯୋଗାଣ ଦାୟିତ୍ୱ ନେଇଥିବା ଘରୋଇ ସଂସ୍ଥାଙ୍କୁ ଏହିମେସିନ ଭଡା ସୁତ୍ରରେ ଦିଆଯାଇ ପାରିଲେ ପୌରପାଳିକାକୁ କେବଳ ରାଜସ୍ୱ ମିଳିପାରନ୍ତା ତା ନୁହେଁ ପରନ୍ତୁ ମେସିନଟି ସଚଳ ରହିପାରନ୍ତା । ହେଲେ ତାହା ହେଉନାହିଁ । ଫଳରେ ପୌରପାଳିକାରେ ଅବ୍ୟବହୃତ ଭାବେ ପଡି ପଡି ମେସିନଟି ଖତ ଖାଉଛି । ଅନ୍ୟପକ୍ଷରେ ପୌରପାଳିକା ସକାସେ ଜଦି ଏହି ଲାଡର ଗାଡିର କୌଣସି ଆବଶ୍ୟକତା ନଥିଲା ତେବେ ଲକ୍ଷ ଲକ୍ଷ ଟଙ୍କା ଖର୍ଚ କରି ଏହି ଧରଣର ଅତ୍ୟାଧୁନିକ ମେସିନ କିଣାଯିବାର ଯଥାର୍ଥତା କୁ ନେଇ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି । ଏଥିନେଇ ଭଦ୍ରକ ପୌର କାର୍ଯ୍ୟନିବାର୍ହି ଅଧିକାରୀ ବିଚିତ୍ରାନନ୍ଦ ନାୟକଙ୍କୁ ପଚାରିବାରେ ସେ କାହିଁକି ଏହି ମେସିନଟି କିଣାଯାଇଥିଲା ତାହା କହି ପାରିବେ ନାହିଁ କହିଛନ୍ତି । ତଥାପି ପୌରପାଳିକା ବିଜୁଳି ରକ୍ଷଣାବେକ୍ଷଣ ଦାୟିତ୍ୱ ନେଇଥିବା ଘରୋଇ କମ୍ପାନୀଙ୍କୁ ଏହାକୁ ଭଡା ସୁତ୍ରରେ ଦେବାକୁ କୁହାଯିବ ବୋଲି ସେ କହିଛନ୍ତି । ତେବେ ଭଡା ସୁତ୍ରରେ ଦିଆଗଲେ ମଧ୍ୟ ଏହି ମେସିନ ଚଳାଇବାକୁ ଆବଶ୍ୟକ ପଡୁଥିବା ସ୍ୱତନ୍ତ୍ର ପ୍ରଶିକ୍ଷିତ ଡ୍ରାଇଭର ନିଯୁକ୍ତିରେ ପୌରପାଳିକାକୁ ଯେତିକି ଅର୍ଥ ଖର୍ଚ କରିବାକୁ ପଡିବ ତାହା ଘୋଡା ଛ ଟଙ୍କାକୁ ଦାନା ନଅ ଟଙ୍କା ହେବ ବୋଲି ସାଧାରଣ ମହଲରେ ଚର୍ଚ୍ଚା ହେଉଛି ।