ଭଦ୍ରକ, ୧୭ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଏହି ଜିଲାର ଧାମନଗର ବ୍ଲକ୍ରେ ବୈତରଣୀ ନଦୀର ପ୍ରଥମ ବନ୍ୟାରେ କ୍ଷତିଗ୍ରସ୍ତ ହୋଇଥିବା ଗୌରାଙ୍ଗପୁର ଏସକେପ୍ ମରାମତି କାର୍ଯ୍ୟ ଚାଲିଛି । ବନ୍ୟା ମୁକାବିଲା ପାଇଁ ଥିବା ଜରୁରୀକାଳୀନ ପାଣ୍ଠିରୁ ଏବେ ଅସ୍ଥାୟୀ ବନ୍ଧ କରାଯାଉଛି । ଏହି ଏସକେପ୍ର ପ୍ରୋଟେକସନ ୱାଲ୍ ଠାରୁ ଉପର ନଦୀପାଶ୍ୱର୍କୁ ଏବେ ପାଖାପାଖି ୬ ଶହ ମିଟର ଏକ ଅସ୍ଥାୟୀ ଆଡିବନ୍ଧ କରାଯାଉଛି । ଏହି ବନ୍ଧଟି ଡାଙ୍ଗୁଆପାଟଣା ପାଖରୁ ଆରମ୍ଭ ହୋଇ ନଦୀପଠା ଦେଇ ଗୌରାଙ୍ଗପୁରରେ ଲାଗିଛି । କାଠବହ୍ଲା ଦୁଇ ପାଶ୍ୱର୍ରେ ପୋତାଯାଇ ମଝିରେ ବାଲିବସ୍ତା ଭର୍ତ୍ତି କରାଯାଉଛି । ଏହା ଉପରେ ମାଟି ପଡି ବନ୍ଧଟିଏ ତିଆରି ହେବ । ତେବେ ଏହି ନିର୍ମାଣ କାର୍ଯ୍ୟ ନିମ୍ନମାନର କରାଯାଉଛି ବୋଲି ଅଭିଯୋଗ ଉଠିଛି । ଦୁର୍ବଳ କାଠବହ୍ଲା ପୋତାଯାଉଥିବାବେଳେ ବାଲିବସ୍ତା ଗୁଡିକ ଠିକ୍ ଭାବରେ କମ୍ପାଉଣ୍ଡିଂ ନହୋଇ ପ୍ୟାକିଂ କରାଯାଉଛି । ଯାହାଫଳରେ ପୁଣି ବନ୍ୟା ଆସିଲେ ବାଲିବସ୍ତା ମଝିରେ ପାଣି ଘଳିଆ ପଡି ଭାଂଗିଯିବାର ଆଶଙ୍କା ରହୁଛି । ଖାଲି ଏତିକି ନୁହେଁ ନିର୍ମାଣ ସ୍ଥଳରେ ବିଭାଗୀୟ ଅଧିକାରୀ କିମ୍ବା କନିଷ୍ଠ ଯନ୍ତ୍ରୀ କେହି ରହୁନାହାଁନ୍ତି । ଯାଜପୁର ଜଳସଂପଦ କାର୍ଯ୍ୟାଳୟର ସୂଚନା ଅନୁସାରେ ପ୍ରାୟ ୫୦ ଲକ୍ଷ ଟଙ୍କା ବ୍ୟୟ ବରଦାରେ ଏହି ମରାମତି କାର୍ଯ୍ୟ ହେଉଛି । ଜଳସଂପଦ ବିଭାଗର ସର୍ବୋଚ୍ଚ ଯନ୍ତ୍ରୀଙ୍କ ନିର୍ଦ୍ଦେଶ କ୍ରମେ ସ୍ଥାନୀୟ ବିଭାଗ ପକ୍ଷରୁ ମରାମତି କାର୍ଯ୍ୟ ହେଉଛି । ବର୍ଷାଋତୁ ସରିନଥିବାରୁ ବନ୍ୟା ଆଶଙ୍କା ଟଳିନଥିବାବେଳେ କେବଳ ସ୍ଥିତି ସମ୍ଭାଳିବା ଲାଗି ଏସକେପ୍ ମରାମତି କରାଯାଉଛି ।
ବନ୍ୟାଋତୁ ସରିବା ପରେ ନଭେମ୍ବର ଓ ଡିସେମ୍ବର ମାସରେ ମେଗା ପ୍ରୋଜେକ୍ଟ ଭାବେ ଏହାର ଟେଣ୍ଡର କରାଯାଇ କାର୍ଯ୍ୟ ହୋଇପାରେ ବୋଲି କୁହାଯାଉଛି । ଏତଦ୍ବ୍ୟତୀତ ଏହି ସ୍ଥାନରେ ଫୁଟ୍ ଓଭରବ୍ରିଜ୍ କରିବା ଲାଗି ଟେଣ୍ଡର ପ୍ରକ୍ରିୟା ଶେଷ ହୋଇଥିବାରୁ ଏହି କାର୍ଯ୍ୟ ସହ ଗ୍ରାଉଣ୍ଡ କାମ ହେବ ବୋଲି ସୂଚନା ମିଳିଛି । ତେବେ ୨୦୨୧ ମଇ ମାସରେ ଆସିଥିବା ବନ୍ୟା ପରେ ଗୌରାଙ୍ଗପୁର ଓ ମଲ୍ଲିମାହାରା ଏସକେପ୍ ନଷ୍ଟ ହୋଇଥିଲା । ସେତେବେଳେ ଏହି ୨ଟି ଏସକେପ୍ ମରାମତି ଲାଗି ୭୦ ଲକ୍ଷ ଟଙ୍କା ଖର୍ଚ୍ଚ କରାଯାଇଥିଲା । ଗୌରାଙ୍ଗପୁର ଏସକେପ୍ର ରିଟେନିଂ ୱାଲ୍, ପ୍ରୋଟେକସନ ୱାଲ ନବୀକରଣ କରାଯାଇଥିଲା । ଏଥିସହ ପଥର ମଧ୍ୟ ବିଛାଯାଇଥିଲା । କିନ୍ତୁ ନିମ୍ନମାନର କାମ ହୋଇଥିବାରୁ ଏ ବର୍ଷର ବନ୍ୟାରେ ଗୌରାଙ୍ଗପୁର ଏସକେପ୍ ସଂପୂର୍ଣ୍ଣ ଧୋଇଗଲା । ରିଟେନିଂ ର୍ ଓ ପ୍ରୋଟେକସନ ୱାଲ୍ ଭୁଷୁଡି ପଡିଡା । ଏଣୁ ଏବେ ତରବରିଆ ଭାବେ କାର୍ଯ୍ୟ କରାଯାଉଥିବାରୁ ଲୋକଙ୍କ ମନରେ ସନ୍ଦେହ ଉପୁଜିଛି । ଅପରପକ୍ଷରେ ସ୍ଥାନୀୟ ଲୋକଙ୍କ କହିବା କଥା ଯେ ୨୦୨୧ ରେ କାର୍ଯ୍ୟ ହେବା ବେଳେ ନିମ୍ନମାନର ହେଉଥିବାରୁ ବିରୋଧ କରାଯାଇଥିଲା । ହେଲେ ଜଳସଂପଦ ବିଭାଗର ଅଧିକାରୀ ଏନେଇ କର୍ଣ୍ଣପାତ କରିନଥିଲେ । ଏସ୍କେପ୍ରେ ପଥର ବିଛାଯିବା ପରେ ସିମେଣ୍ଟିଂ ଗ୍ରାଉଟିଂ କରିବା ଲାଗି କୁହାଯାଇଥିଲା । ହେଲେ ଠିକାଦାର ଓ ବିଭାଗୀୟ ଅଧିକାରୀ ତାହା କରିନଥିଲେ । ସବୁଠାରୁ ବଡକଥା ହେଲା ଗତବର୍ଷ ବନ୍ୟାରେ ନଷ୍ଟ ହୋଇଥିବା ଏସକେପ୍ ଯଦି ମରାମତି ହୋଇଥାଆନ୍ତା, ତେବେ ଚଳିତ ବନ୍ୟାରେ ତାହା କ୍ଷତିଗ୍ରସ୍ତ ହୋଇନଥାନ୍ତା । ବିଭାଗୀୟ ଅଧିକାରୀଙ୍କ ଦୂରଦୃଷ୍ଟି ଅଭାବ ଓ ଖାମଖିଆଲି ଯୋଗୁଁ ଆଜି ସରକାରଙ୍କୁ ଲକ୍ଷାଧିକ ଟଙ୍କା ଖର୍ଚ୍ଚ କରିବାକୁ ପଡୁଛି ବୋଲି ଧାମନଗର ବିଧାୟକ ସୂର୍ଯ୍ୟବଂଶୀ ସୁରଜ କହିଛନ୍ତି । ଶ୍ରୀ ସୁରଜ ଆଜି ନିର୍ମାଣାଧୀନ ଗୌରାଙ୍ଗପୁର ଏସକେପ୍ ନିକଟକୁ ଯାଇ ସ୍ଥିତି ପରଖିଥିଲେ ଏବଂ ଉତ୍ତମ କାର୍ଯ୍ୟ କରିବା ସହ ତୁରନ୍ତ ତାହା ସଂପୂର୍ଣ୍ଣ କରିବାକୁ ବିଭାଗୀୟ ଅଧିକାରୀଙ୍କୁ ତାଗିଦ କରିଥିବାର ଜଣାପଡିଛି ।