ଭଦ୍ରକ, ୩୦ା୧୦ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଓଡ଼ିଶାରେ ବିଜୁ ଜନତା ଦଳର ଦୀର୍ଘ ୨୧ବର୍ଷ ଶାସନ କରିବା ଦ୍ୱାରା ସେହି ଦଳର କର୍ମୀ ନେତା ମାନେ ଅତ୍ୟନ୍ତ ଅହଂକାରୀ ହୋଇଗଲେଣି । ଫଳରେ ବେବିନା, ଇତିଶ୍ରୀ, ମାଧବିଲତା, ସ୍ମିତାରାଣୀ, ପରୀ ଯେପରି ଗଣଦୁଷ୍କର୍ମର ଶୀକାର ହୋଇ ମୃତ୍ୟୁବରଣ କଲେ, ସେ ଦିଗରେ ନବୀନ ପଟ୍ଟନାୟକ ଶାସନ ମୁଖ୍ୟତଃ ଦାୟୀ । ଏବେ ମହାଲିଙ୍ଗ ସ୍ଥିତ ସନ୍ସାଇନ୍ ଇଂରାଜୀ ମାଧ୍ୟମିକ ବିଦ୍ୟାଳୟର ଶିକ୍ଷୟିତ୍ରୀ ମମିତା ମେହେରଙ୍କ ହତ୍ୟା ଘଟଣାରେ ରାଜ୍ୟ ଗୃହରାଷ୍ଟ୍ରମନ୍ତ୍ରୀ କ୍ୟାପଟେନ ଦିବ୍ୟଶଙ୍କର ମିଶ୍ରଙ୍କ ସମ୍ପୃକ୍ତିରେ ଇସ୍ତଫା ଓ ଗିରଫ ଦାବୀକରି ବିଜେପି ପକ୍ଷରୁ ଡ଼ାକରା ଦିଆଯାଇଥିବା ବେଳେ ଧାମନଗର ବ୍ଲକର ବିଭିନ୍ନ ଜାଗାରେ ଆଜି ୬ଘଣ୍ଟିଆ ରାସ୍ତରୋକ ସହିତ ବଜାର ବନ୍ଦ କରାଯାଇଥିଲା । ତେବେ ବିଭିନ୍ନ ସମୟରେ ବିଭିନ୍ନ ଦାବୀ ଓ ପ୍ରତିବାଦ କରାଯାଉଥିବାବେଳେ ମମିତା ମେହେରଙ୍କ ମୃତ୍ୟୁକୁ ନେଇ ଧାମନଗର ବିଜେପି ପକ୍ଷରୁ ଏକ ଅଭିନବ ଉପାୟରେ ବଜାର ବନ୍ଦ କରାଯାଇଥିବା ଦେଖାଯାଇଥିଲା ।
ଧାମନଗର ସାନବଜାର ସ୍ଥିତ ବିଜୁ ପଟ୍ଟନାୟକ ଛକ ଠାରେ ବିଜେପି କର୍ମୀମାନ ବାଜା ବଜାଇ ନାଚକୁଦ କରି ଏହି ବନ୍ଦ କରାଇଥିଲେ । ଏହାକୁ ନେଇ ମଧ୍ୟ ବିଭିନ୍ନ ଲୋକଙ୍କ ମଧ୍ୟରେ ଗୁଞ୍ଜରଣ ସୃଷ୍ଟି ହୋଇଥିଲା । ବ୍ଲକର ଧାମନଗର, ଦୋବଲ, ଅସୁରାଳି, ଧୂଷୁରୀ ପ୍ରମୁଖ ବଜାରରେ ବିଜେପି କର୍ମୀ ପିକେଟିଂ କରି ରାସ୍ତାବନ୍ଦ କରିଥିବାର ଦେଖାଯାଇଛି । ସକାଳ ୬ଟାରୁ ଆରମ୍ଭ ହୋଇଥିବା ଏହି ବନ୍ଦ ପାଳନ ଦିନ ୧୨ରେ ସରିଥିଲା । ଏହାର ପ୍ରଭାବରେ ବିଭିନ୍ନ ଯାନବାହନ ବନ୍ଦ ରହିଥିଲା । ସକାଳ ୬ଟାରୁ କର୍ମୀ ମାନେ ବ୍ଲକ ଅଂଚଳରେ ବିଭିନ୍ନ ସରକାରୀ କାର୍ଯ୍ୟାଳୟ ବ୍ୟାଙ୍କ ଆଗରେ ନବୀନ ସରକାର ବିରୋଧରେ ନାରା ଦେଇ ତୀବ୍ର ପ୍ରତିବାଦ କରିଥିଲେ । ଶିକ୍ଷୟିତ୍ରୀ ମମିତା ମେହେରଙ୍କ ହତ୍ୟା କାଣ୍ଡରେ ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କର ସମ୍ପୃକ୍ତି ଥିବାରୁ ତାଙ୍କୁ ତୁରନ୍ତ ମନ୍ତ୍ରୀ ପଦରୁ ବହିସ୍କାର କରାଯିବା ସହ ଗିରଫ କରାଯାଉ ବୋଲି ଦାବି ମଧ୍ୟ କରାଯାଇଥିଲା । ଏହି ବନ୍ଦ ସମୟରେ ଧାମନଗର ମୀରସାହି ତଥା ବରିଷ୍ଠ ବିଜେଡ଼ି କର୍ମୀ ସେକ୍ ଖୁରସିଦ୍ଦ୍ ପିତା- ସେକ୍ ଇସୁଫ ବଜାରରେ ଥିବାବେଳେ ଏହି ବନ୍ଦ ପାଳନ କରୁଥିବାର ବିଜେପି କର୍ମୀ ନାୟକ ସାହି ଅଂଚଳର ସେକ୍ ରାଜା ପିତା- ସେକ୍ ହୋସେନ୍ ତାଙ୍କୁ ଅତର୍କିତ ଭାବେ ଏକ ବାଉଁଶ କିଳା ସାହାଯ୍ୟରେ ଆକ୍ରମଣ କରିଥିଲେ । ଫଳରେ ଖୁର୍ସିଦ୍ ଆହତ ହୋଇଥିଲେ । ଏ ସମ୍ପର୍କରେ ଖୁର୍ସିଦ ଧାମନଗର ଥାନାରେ ଅଭିଯୋଗ କରିବା ପରେ ପୁଲିସ ସମ୍ପୃକ୍ତ ରାଜାକୁ ଗିରଫ କରିବା ସହିତ ତାଙ୍କ ନାମରେ କେସ ନଂ ୨୯୬/୨୧ରେ ଏକ ମାମଲା ରୁଜୁ କରାଯାଇ ତାଙ୍କୁ କୋର୍ଟଚାଲାଣ କରାଯାଇଛି ।