ନୂଆ ଦିଲ୍ଲୀ ୧-୯ (ଓଡ଼ିଆ ପୁଅ) ସୋମବାର ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ମାମଲାରେ ଏକ ନୂଆ ମୋଡ଼ ଆସିଛି। ଡ୍ରଗ୍ସ ଆଙ୍ଗଲ୍ ଆସିବା ପରଠାରୁ ରିୟା ଏବଂ ତାଙ୍କ ଭାଇ ସୌଭିକ ଏବେ ସନ୍ଦେହ ଘେରରେ ଥିଲେ। ଏଥି ସହିତ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ ମଧ୍ୟ ଏହି ଘଟଣାର ଗମ୍ଭୀରତାର ସହ ଅନୁସନ୍ଧାନ ଆରମ୍ଭ କରିଛି। ଏନସିବି ସୋମବାର ମୁମ୍ବାଇରେ ଦୁଇ ଜଣଙ୍କୁ ଗିରଫ କରିଛି। ଏହି ଦୁଇଜଣଙ୍କଠାରୁ ମିଳିଥିବା ତଥ୍ୟ ଅନୁଯାୟୀ ରିୟା ଏବଂ ତାଙ୍କ ଭାଇଙ୍କ ସହିତ ସେମାନଙ୍କ ସିଧାସଳଖ ସମ୍ପର୍କ ଥିବା ଜଣାପଡ଼ିଛି ବୋଲି ଜାତୀୟ ଗଣମାଧ୍ୟମ ସୂତ୍ରରୁ ପ୍ରକାଶ।
ଏନସିବି ବର୍ତ୍ତମାନ ରିୟାଙ୍କ ବିରୋଧରେ ଅଧିକ ପ୍ରମାଣ ସଂଗ୍ରହ କରିବାକୁ ଚାହୁଁଛି। ଯାହାଫଳରେ ରିୟାଙ୍କୁ ଜାମିନ ମିଳିବ ନାହିଁ। ଟାଇମ୍ସ ନାଓ ଅନୁଯାୟୀ, ଏନସିବି ସହ ଜଡିତ ଲୋକମାନେ କହିଛନ୍ତି ଯେ, ଏନିସିବି ଦ୍ୱାରା ଗିରଫ ହୋଇଥିବା ଅଭିଯୁକ୍ତଙ୍କ ରିୟା ଚକ୍ରବର୍ତ୍ତୀ ଏବଂ ତାଙ୍କ ଭାଇ ସୌଭିକ ଚକ୍ରବର୍ତ୍ତୀଙ୍କ ସହ ସିଧାସଳଖ ସମ୍ପର୍କ ରହିଛି।
ଡ୍ରଗ୍ ବେପାରୀଙ୍କ ସଂସ୍ପର୍ଶରେ ବଲିଉଡର ଅନେକ ପ୍ରସିଦ୍ଧ ଚେହେରା
ଗିରଫ ହୋଇଥିବା ଡ୍ରଗ୍ସ ପେଡଲରଙ୍କୁ ପଚରାଉଚରା ବେଳେ ରିୟା ଏବଂ ତାଙ୍କ ଭାଇଙ୍କ ବ୍ୟତୀତ ବଲିଉଡର ଅନେକ ପ୍ରସିଦ୍ଧ ଲୋକଙ୍କର ନାମ ଆସିଛି। NCB ଶୀଘ୍ର ଏହି ନାମଗୁଡିକ ପ୍ରକାଶ କରିପାରେ। ଖବର ଅନୁଯାୟୀ, ବାନ୍ଦ୍ରା, ଜୁହୁ ଏବଂ ଲୋଖଣ୍ଡୱାଲା ଅଞ୍ଚଳରେ ବଲିଉଡ ପାର୍ଟୀରେ ଡ୍ରଗ୍ସ ନିଆଯାଏ ବୋଲି ଏହି ବେପାରୀମାନେ କହିଛନ୍ତି। ରିୟାଙ୍କ ଉପରେ ମଧ୍ୟ ଡ୍ରଗ୍ସ ବ୍ୟବହାର ଏବଂ କାରବାର କରୁଥିବା ଅଭିଯୋଗ ହୋଇଛି।
ରିୟାଙ୍କୁ ବାରମ୍ବାର ପଚରାଉଚରା କରାଯାଉଛି
ସିବିଆଇ ମଧ୍ୟ ରିୟାଙ୍କୁ କ୍ରମାଗତ ଭାବେ ପଚରାଉଚରା କରୁଛି। ରବିବାର ଦିନ ସିବିଆଇ ଟିମ୍ ରିୟା ଚକ୍ରବର୍ତ୍ତୀଙ୍କୁ ପ୍ରାୟ ନଅ ଘଣ୍ଟା, ଶନିବାର ସାତ ଘଣ୍ଟା ଏବଂ ଶୁକ୍ରବାର ଦିନ ପ୍ରାୟ ଦଶ ଘଣ୍ଟା ପଚରାଉଚରା କରିଥିଲା। ସିବିଆଇ ଗୁରୁବାର ସୌଭିକଙ୍କୁ ପଚରାଉଚରା କରିଥିଲା। ଏହି ମାମଲାରେ ପୂର୍ବରୁ ରିୟାଙ୍କୁ ମୁମ୍ବାଇ ପୋଲିସ ପଚରାଉଚରା କରିଥିଲା। ମନି ଲଣ୍ଡରିଂ ମାମଲାରେ ଏନଫୋର୍ସମେଣ୍ଟ ନିର୍ଦ୍ଦେଶାଳୟ ମଧ୍ୟ ଅଭିନେତ୍ରୀଙ୍କୁ ପଚରାଉଚରା କରିଥିଲେ।