ନୂଆ ଦିଲ୍ଲୀ ୧୫-୧୦ (ଓଡ଼ିଆ ପୁଅ) ଗତ ବର୍ଷ ତୁଳନାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମୋଟ ସମ୍ପତ୍ତିର ମୂଲ୍ୟ ଚଳିତ ବର୍ଷ ବୃଦ୍ଧି ପାଇଛି।
ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (ପିଏମଓ) ରେ ଦାଖଲ କରିଥିବା ସର୍ବଶେଷ ସମ୍ପତ୍ତି ଘୋଷଣା ଅନୁଯାୟୀ ଚଳିତ ବର୍ଷ ଜୁନ୍ ୩୦ ସୁଦ୍ଧା ପିଏମ ମୋଦୀଙ୍କ ନିଟ୍ ମୂଲ୍ୟ ୨.୮୫ କୋଟି ଟଙ୍କା ଥିଲା, ଯାହା ଗତ ବର୍ଷ ୨.୪୯ କୋଟିରୁ ପ୍ରାୟ ୩୬ ଲକ୍ଷ ଟଙ୍କା ବୃଦ୍ଧି ପାଇଛି।
ଇଣ୍ଡିଆ ଟୁଡେ ରିପୋର୍ଟ ମୁତାବକ, ପ୍ରାୟ ୩.୩ ଲକ୍ଷ ଟଙ୍କା ବ୍ୟାଙ୍କ ଜମା ଯୋଗୁଁ ତାଙ୍କର ସମ୍ପତ୍ତି ବୃଦ୍ଧି ପାଇଛି।
ଜୁନ୍ ୨୦୨୦ ଶେଷ ସୁଦ୍ଧା, ପ୍ରଧାନମନ୍ତ୍ରୀ ମୋଦୀଙ୍କ ପାଖରେ କେବଳ ନଗଦ ୩୧, ୪୫୦ ଟଙ୍କା ଏବଂ ଏସବିଆଇ ଗାନ୍ଧିନଗର ଏନଏସସି ଶାଖାରେ ବ୍ୟାଙ୍କ ବାଲାନ୍ସ ୩, ୩୮, ୧୭୩ ଟଙ୍କା ଥିଲା। ସେହି ବ୍ୟାଙ୍କ ଶାଖାରେ ତାଙ୍କର FDR ଏବଂ MOD ବାଲାନ୍ସ ୧, ୬୦, ୨୮, ୯୩୯ ଟଙ୍କା ଥିଲା।
ପିଏମ ମୋଦୀଙ୍କର ୮, ୪୩, ୧୨୪ ଟଙ୍କା ମୂଲ୍ୟର ନ୍ୟାସନାଲ ସେଭିଂ ସାର୍ଟିଫିକେଟ୍ (NSC), ୧, ୫୦, ୯୫୭ ଟଙ୍କା ଜୀବନ ବୀମା ପଲିସି ଏବଂ ୨୦, ୦୦୦ ଟଙ୍କା ମୂଲ୍ୟର ଟିକସ ସଞ୍ଚୟ ଇନଫ୍ରା ବଣ୍ଡ ମଧ୍ୟ ରହିଛି। ରିପୋର୍ଟରେ କୁହାଯାଇଛି ଯେ ଘୋଷିତ ଚଳ ସମ୍ପତ୍ତି ୧.୭୫ କୋଟି ପ୍ରାୟ।
ପ୍ରଧାନମନ୍ତ୍ରୀଙ୍କ ପାଖରେ ପ୍ରାୟ ୪୫ ଗ୍ରାମ ଓଜନର ଚାରୋଟି ସୁନା ମୁଦି ରହିଛି ଏବଂ ଏହାର ମୂଲ୍ୟ ୧.୫ ଲକ୍ଷ ଟଙ୍କା। ସେ କୌଣସି ଋଣ ନେଇନାହାଁନ୍ତି ଏବଂ ତାଙ୍କ ନାମ ନାମରେ କୌଣସି ବ୍ୟକ୍ତିଗତ ଯାନ ନାହିଁ।
ପ୍ରଧାନମନ୍ତ୍ରୀ ମୋଦୀଙ୍କର ମିଳିତ ଭାବେ ଗାନ୍ଧିନଗରର ସେକ୍ଟର -୧ ରେ ଏକ ପ୍ଲଟ ଅଛି, ଯାହାର ମାପ ୩, ୫୩୧ ବର୍ଗଫୁଟ, ଅନ୍ୟ ତିନିଜଣ ମିଳିତ ମାଲିକାନା ସହିତ ଏହି ପ୍ଲଟରେ ପ୍ରତ୍ୟେକଙ୍କର ୨୫ ପ୍ରତିଶତ ସମାନ ଅଂଶ ରହିଛି।