ନୂଆଦିଲ୍ଲୀ ୮-୮ (ଓଡ଼ିଆ ପୁଅ) ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର ଦିନ ୧ ଲକ୍ଷ କୋଟି ଟଙ୍କାର କୃଷି ଭିତ୍ତିଭୂମି ପାଣ୍ଠିର ଉଦଘାଟନ କରିବେ। ଏହି ଅବସରରେ ପିଏମ କିଶାନ ସମ୍ମାନ ଯୋଜନାର ଷଷ୍ଠ କିସ୍ତିର ୨୦୦୦ ଟଙ୍କା ମଧ୍ୟ କୃଷକଙ୍କ ଆକାଉଣ୍ଟକୁ ହସ୍ତାନ୍ତର କରାଯିବ। ଦେଶର ମୋଟ ୮.୫ କୋଟି କୃଷକ ୧୭, ୦୦୦ କୋଟି ଟଙ୍କା ପାଇବେ। ସୂଚନାଯୋଗ୍ୟଯେ, ପ୍ରଧାନମନ୍ତ୍ରୀ କିଶାନ୍ ମମ୍ମାନ ନିଧି ଯୋଜନା ଅଧୀନରେ ଦେଶର ୮ କୋଟି ୬୯ ଲକ୍ଷ କୃଷକଙ୍କ ବ୍ୟାଙ୍କ ଆକାଉଣ୍ଟକୁ ୬୦୦୦-୬୦୦୦ ଟଙ୍କା କିସ୍ତି ପଠାଯାଇଛି।
ନ୍ୟୁଜ ୧୮ ଖବର ଅନୁଯାୟୀ, ପିଏମ୍ କିସାନ୍ ଯୋଜନାରେ ଏହି ରାଶି ସ୍ଥାନାନ୍ତର ପାଇଁ ଶୁକ୍ରବାର ବିଳମ୍ବିତ ରାତି ପର୍ଯ୍ୟନ୍ତ ଏକ ମାରାଥନ୍ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ପିଏମ କିଶାନ ସ୍କିମର ସିଇଓ ବିବେକ ଅଗ୍ରୱାଲ ମଧ୍ୟ ଉପସ୍ଥିତ ଥିଲେ।
୧ ଡିସେମ୍ବର ୨୦୧୮ ରେ ଆରମ୍ଭ ହୋଇଥିବା ପ୍ରଧାନମନ୍ତ୍ରୀ କିଶାନ ସାମନ୍ ନିଧି ଯୋଜନା ଅଧୀନରେ ୯.୯ କୋଟିରୁ ଅଧିକ ଚାଷୀଙ୍କୁ ୭୫, ୦୦୦ କୋଟିରୁ ଅଧିକ ଟଙ୍କା ପ୍ରତ୍ୟକ୍ଷ ନଗଦ ସୁବିଧା ପ୍ରଦାନ କରାଯାଇଛି। ଏହା କୃଷକମାନଙ୍କୁ ସେମାନଙ୍କର କୃଷି ଆବଶ୍ୟକତା ପୂରଣ କରିବାରେ ଏବଂ ସେମାନଙ୍କ ପରିବାରକୁ ଆବଶ୍ୟକ ସହାୟତା ଯୋଗାଇବାରେ ସକ୍ଷମ ହୋଇଛି। କ୍ଷୀପ୍ର ବେଗରେ ପ୍ରଧାନମନ୍ତ୍ରୀ-କିଶାନ ଯୋଜନା ଆରମ୍ଭ କରାଯାଇଛି ଏବଂ କାର୍ଯ୍ୟକାରୀ କରାଯାଉଛି, ଯେଉଁଥିରେ ଧନରାଶିର ବାଟମାରଣା ରୋକିବା ପାଇଁ ତଥା କୃଷକଙ୍କ ପାଇଁ ସିଧାସଳଖ ‘ଆଧାର’ ପ୍ରମାଣିତ ହିତାଧିକାରୀଙ୍କ ବ୍ୟାଙ୍କ ଆକାଉଣ୍ଟକୁ ଟ୍ରାନ୍ସଫର କରାଯାଇଥାଏ। ଏହି ଯୋଜନା କୋଭିଡ -୧୯ ମହାମାରୀ ସମୟରେ ଚାଷୀଙ୍କୁ ଆବଶ୍ୟକ ସହାୟତା ଯୋଗାଇବାରେ ମଧ୍ୟ ସହାୟକ ହୋଇଛି। ବାସ୍ତବରେ, ଲକଡାଉନ୍ ସମୟରେ ଚାଷୀଙ୍କୁ ସାହାଯ୍ୟ କରିବା ପାଇଁ ପ୍ରାୟ ୨୨, ୦୦୦ କୋଟି ଟଙ୍କା ରିଲିଜ୍ କରାଯାଇଥିଲା।
କୃଷି ଭିତ୍ତିଭୂମି ପାଣ୍ଠି (ଏଗ୍ରୀକଲ୍ଚର ଇନ୍ପ୍ରାଷ୍ଟ୍ରକଚର ଫଣ୍ଡ) –
କେନ୍ଦ୍ର କ୍ୟାବିନେଟ ବୈଠକରେ ୧ ଲକ୍ଷ କୋଟି ଟଙ୍କାର କୃଷି ଭିତ୍ତିଭୂମି ପାଣ୍ଠିକୁ ଅନୁମୋଦନ କରାଯାଇଛି। ଏହି ଯୋଜନାରେ, ଶସ୍ୟ ଅମଳ ହେବା ପରେ, ଅମଳ ପରବର୍ତ୍ତୀ ଭିତ୍ତିଭୂମି ପରିଚାଳନା ଏବଂ ସାମୁହିକ କୃଷି ସମ୍ପତ୍ତି ପାଇଁ ପ୍ରକଳ୍ପଗୁଡିକରେ ବିନିଯୋଗ ପାଇଁ ମଧ୍ୟମ ଏବଂ ଦୀର୍ଘକାଳୀନ ଋଣ ଦେବାରେ ସହାୟକ ହେବ।
ପ୍ରାଥମିକ କୃଷି ଋଣ ସମିତି (ପିଏସି), କୃଷକ ଗୋଷ୍ଠୀ, କୃଷକ ଉତ୍ପାଦକ ସଂଗଠନ (FPO), କୃଷି ଉଦ୍ୟୋଗୀ, ଷ୍ଟାର୍ଟଅପ୍ ଏବଂ କୃଷି ପ୍ରଯୁକ୍ତିବିଦ୍ୟା ଉଦ୍ୟୋଗୀଙ୍କୁ ଏକ ଲକ୍ଷ କୋଟି ଟଙ୍କା ଆର୍ଥିକ ସହାୟତା ପ୍ରଦାନ କରିବ। ଏହି ପାଣ୍ଠି ସହାୟତାରେ କୋଲ୍ଡ ଷ୍ଟୋର ଚେନ୍ ସ୍ଥାପନ, ଗୋଦାମ ଗୃହ ନିର୍ମାଣ, ସର୍ଟିଂ ଏବଂ ପ୍ୟାକିଂ ୟୁନିଟ୍ ପାଇଁ ଇ-ମାର୍କେଟିଂ ସେଣ୍ଟର ଗଠନ କରାଯିବ।
ଏହା ମଧ୍ୟ କେନ୍ଦ୍ର ଏବଂ ରାଜ୍ୟ ସରକାରଙ୍କ ସହାୟତାରେ ଘରୋଇ-ସାର୍ବଜନୀନ ସହଭାଗୀତା (ପିପିପି) ମାଧ୍ୟମରେ କୃଷି ସଂଗ୍ରହ କେନ୍ଦ୍ର ଏବଂ ରକ୍ଷଣାବେକ୍ଷଣ ସୁବିଧା ଯୋଗାଇବା ଅନ୍ତର୍ଭୁକ୍ତ।
୪ ବର୍ଷରେ ଏହି ଋଣ ପ୍ରଦାନ କରାଯିବ। ଚଳିତ ଆର୍ଥିକ ବର୍ଷରେ ୧୦, ୦୦୦ କୋଟି ଏବଂ ପରବର୍ତ୍ତୀ ତିନି ଆର୍ଥିକ ବର୍ଷରେ ୩୦, ୦୦୦-୩୦, ୦୦୦ କୋଟି ଟଙ୍କା। ଏହି ଆର୍ଥିକ ସୁବିଧା ଅଧୀନରେ ପ୍ରତିବର୍ଷ ସମସ୍ତ ପ୍ରକାର ଋଣରେ ୨ କୋଟି ଟଙ୍କା ପର୍ଯ୍ୟନ୍ତ ଋଣର ସୁଧ ଉପରେ ୩ ପ୍ରତିଶତ ରିହାତି ପ୍ରଦାନ କରାଯିବ। ଏହି ରିହାତି ସର୍ବାଧିକ ୭ ବର୍ଷ ପାଇଁ ହେବ।
ଏହା ବ୍ୟତୀତ ୨ କୋଟି ଟଙ୍କା ପର୍ଯ୍ୟନ୍ତ ଋଣ ପାଇଁ କ୍ରେଡିଟ୍ ଗ୍ୟାରେଣ୍ଟି ଫଣ୍ଡ ଟ୍ରଷ୍ଟ ଫର ମାଇକ୍ରୋ ଏବଂ କ୍ଷୁଦ୍ର ଉଦ୍ୟୋଗ (CGTMSE) ଯୋଜନା ଅନ୍ତର୍ଗତ କ୍ରେଡିଟ୍ ଗ୍ୟାରେଣ୍ଟି କଭରେଜ୍ ମଧ୍ୟ ଉପଲବ୍ଧ ହେବ। ଏହି କଭରେଜ ପାଇଁ ସରକାର ଦେୟ ପ୍ରଦାନ କରିବେ।