– ୧୫-୧୮ ବର୍ଷ ବୟସ୍କଙ୍କ ଟିକାକରଣ ୩ ଜାନୁଆରୀ, ୨୦୨୨ ଠାରୁ ଆରମ୍ଭ ହେବ; ୧୦ ଜାନୁଆରୀ ଠାରୁ ସ୍ୱାସ୍ଥ୍ୟସେବା କର୍ମଚାରୀ, ସମ୍ମୁଖ ଯୋଦ୍ଧା ଏବଂ ବିଭିନ୍ନ ବ୍ୟାଧିରେ ପୀଡ଼ିତ ୬୦ ବର୍ଷରୁ ଊର୍ଦ୍ଧ୍ୱ ବୟସ୍କ ସମୁଦାୟଙ୍କ ପାଇଁ ପ୍ରତିଷେଧକ ଡୋଜ୍ଦିଆଯିବା ଆରମ୍ଭ କରାଯିବ
– ବିଭିନ୍ନ ରୋଗରେ ପୀଡ଼ିତ ବରିଷ୍ଠ ନାଗରିକମାନଙ୍କ ପାଇଁ ଡାକ୍ତରଙ୍କ ସୁପାରିସପତ୍ର/ପ୍ରମାଣପତ୍ର ଅନାବଶ୍ୟକ; ୬୦ ବର୍ଷରୁ ଅଧିକ ବୟସ୍କ ବ୍ୟକ୍ତି ଡାକ୍ତରଙ୍କ ଠାରୁ କେବଳ ପରାମର୍ଶ ନେଇ ପ୍ରତିଷେଧକ ଟିକା ନେଇପାରିବେ
– ୧୫-୧୮ ବର୍ଷ ବୟସ୍କଙ୍କ ପାଇଁ ଉଭୟ ଅନଲାଇନ (କୋୱିନ ମାଧ୍ୟମରେ) ଏବଂ ଅଫଲାଇନ ପଞ୍ଜୀକରଣ କରାଯାଇପାରିବ; କୋୱିନ ପଞ୍ଜୀକରଣ ଜାନୁଆରୀ ପହିଲାରୁ ଆରମ୍ଭ ହେବ ଏବଂ ଅନସାଇଟ୍ଅଫଲାଇନ ପଞ୍ଜୀକରଣ ଜାନୁଆରୀ ୩ ତାରିଖ ଠାରୁ ଆରମ୍ଭ କରାଯିବ
– ୧୫-୧୮ ବର୍ଷ ବୟସ୍କଙ୍କ ପାଇଁ ବିଶେଷ ସମର୍ପିତ କୋଭିଡ ଟିକାକରଣ କେନ୍ଦ୍ର ପ୍ରତିଷ୍ଠା ଲାଗି ରାଜ୍ୟମାନଙ୍କୁ ପରାମର୍ଶ; ଅନ୍ୟ ଟିକାକରଣ କେନ୍ଦ୍ରରେ ପିଲାମାନଙ୍କ ପାଇଁ ସ୍ୱତନ୍ତ୍ର ଟିକାକରଣ ଦଳ ଓ ସ୍ୱତନ୍ତ୍ର ଧାଡ଼ି ବ୍ୟବସ୍ଥା କରିବାକୁ ମଧ୍ୟ ପରାମର୍ଶ
ନୂଆ ଦିଲ୍ଲୀ ୨୮-୧୨ (ଓଡ଼ିଆ ପୁଅ) କେନ୍ଦ୍ର ସ୍ୱାସ୍ଥ୍ୟ ସଚିବ ଶ୍ରୀ ରାଜେଶ ଭୂଷଣ ଆଜି ସମସ୍ତ ରାଜ୍ୟ ଓ କେନ୍ଦ୍ର ଶାସିତ ପ୍ରଦେଶ ସହିତ ଭିଡିଓ କନଫରେନ୍ସିଂ ଜରିଆରେ ଏକ କର୍ମଶାଳାରେ ଅଧ୍ୟକ୍ଷତା କରିଥିଲେ। ଏଥିରେ ୧୫-୧୮ ବର୍ଷ ବୟସ୍କ ପିଲାମାନଙ୍କ ଟିକାକରଣ କାର୍ଯ୍ୟକାରୀ କରିବା ନେଇ ଆଲୋଚନା କରାଯାଇଥିଲା। ସେହିପରି ଦୁର୍ବଳ ବର୍ଗର ଲୋକମାନଙ୍କ ପାଇଁ ପ୍ରତିଷେଧକ ଡୋଜ ଦିଆଯିବା ନିମନ୍ତେ ହୋଇଥିବା ପ୍ରସ୍ତୁତି ମଧ୍ୟ ସମୀକ୍ଷା କରାଯାଇଥିଲା। ଏହି ଦୁର୍ବଳ ବର୍ଗଙ୍କ ମଧ୍ୟରେ ସ୍ୱାସ୍ଥ୍ୟସେବା କର୍ମୀ, ସମ୍ମୁଖ ଯୋଦ୍ଧା ଏବଂ ୬୦ ବର୍ଷରୁ ଅଧିକ ବୟସ୍କ ଲୋକମାନେ ସାମିଲ ରହିଛନ୍ତି ଯେଉଁମାନେ ପୂର୍ବରୁ କୌଣସି ରୋଗରେ ପୀଡ଼ିତ।
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ୨୫ ଡିସେମ୍ବର ୨୦୨୧ରେ କରିଥିବା ଘୋଷଣା ଅନୁଯାୟୀ ୧୫-୧୮ ବର୍ଷ ବୟସ୍କ ପିଲାମାନଙ୍କ ପାଇଁ ସୋମବାର ୩ ଜାନୁଆରୀ, ୨୦୨୨ ତାରିଖ ଠାରୁ ଟିକାକରଣ ଆରମ୍ଭ କରାଯିବ। ଅନ୍ୟପକ୍ଷରେ ଦୁର୍ବଳ ବର୍ଗଙ୍କୁ ତୃତୀୟ ଡୋଜ୍ପ୍ରତିଷେଧକ ଟିକା ସୋମବାର ୧୦ ଜାନୁଆରୀ, ୨୦୨୨ ଠାରୁ ଦିଆଯିବ। ଏ ସମ୍ପର୍କରେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ପକ୍ଷରୁ ଡିସେମ୍ବର ୨୭, ୨୦୨୧ରେ ବିସ୍ତୃତ ମାର୍ଗଦର୍ଶିକା ଜାରି କରାଯାଇଥିଲା।
୧୫-୧୮ ବର୍ଷ ବୟସ୍କ ପିଲାମାନଙ୍କ ଟିକାକରଣ ସନ୍ଦର୍ଭରେ କେନ୍ଦ୍ର ସ୍ୱାସ୍ଥ୍ୟ ସଚିବ ରାଜ୍ୟ ଓ କେନ୍ଦ୍ର ଶାସିତ ପ୍ରଦେଶମାନଙ୍କୁ କେତେକ ଗୁରୁତ୍ୱପୂର୍ଣ୍ଣ ସୂଚନା ଦିଆଯାଇଛି। ଏହି ବୟସବର୍ଗର ଜନସଂଖ୍ୟାକୁ କେବଳ ’କୋଭାକ୍ସିନ’ ହିଁ ଦିଆଯିବ। ଏଥିନିମନ୍ତେ ରାଜ୍ୟ ଓ କେନ୍ଦ୍ର ଶାସିତ ପ୍ରଦେଶମାନଙ୍କୁ ‘କୋଭାକ୍ସିନ’ର ଅତିରିକ୍ତ ଡୋଜ୍ଯୋଗାଇ ଦିଆଯିବ। କେନ୍ଦ୍ର ସରକାର ଆସନ୍ତା କିଛିଦିନ ମଧ୍ୟରେ ସମସ୍ତ ରାଜ୍ୟ ଏବଂ କେନ୍ଦ୍ର ଶାସିତ ପ୍ରଦେଶମାନଙ୍କୁ ‘କୋଭାକ୍ସିନ’ ଯୋଗାଣ ସାରଣୀ ଯୋଗାଇଦେବେ। ଏହାର ସମ୍ଭାବ୍ୟ ହିତାଧିକାରୀ ଜାନୁଆରୀ ୧ ତାରିଖ ଠାରୁ କୋୱିନ ପ୍ଲାଟଫର୍ମରେ ଅନଲାଇନ ପଞ୍ଜୀକରଣ କରାଇପାରିବେ କିମ୍ବା ଜାନୁଆରୀ ୩ ତାରିଖ ଠାରୁ ଟିକାକରଣ ଆରମ୍ଭ ହେବା ପରେ ନିଜେ ଟିକା କେନ୍ଦ୍ରକୁ ଯାଇ ୱାକ୍ଇନ ଅଫଲାଇନ ପଞ୍ଜୀକରଣର ଲାଭ ନେଇପାରିବେ। ଯେଉଁମାନଙ୍କର ଜନ୍ମ ୨୦୦୭ କିମ୍ବା ତା’ପୂର୍ବରୁ ହୋଇଛି କେବେଳ ସେହିମାନେ ହିଁ ଏହି ଶ୍ରେଣୀ ଅଧୀନରେ ଟିକା ନେବା ପାଇଁ ଯୋଗ୍ୟ ଅଟନ୍ତି।
୧୫-୧୮ ବର୍ଷ ବୟସ ବର୍ଗଙ୍କ ଟିକାକରଣ ସଂକ୍ରାନ୍ତରେ ସମସ୍ତ ନିର୍ଦ୍ଧାରିତ ପ୍ରୋଟୋକଲ ପାଳନ କରାଯିବ। ହିତାଧିକାରୀମାନଙ୍କୁ ଅଧ ଘଣ୍ଟା ପର୍ଯ୍ୟନ୍ତ ଅପେକ୍ଷା କରିବାକୁ ହେବ। ଏହି ସମୟରେ ଏଇଏଫଆଇ ପାଇଁ ସେମାନଙ୍କର ଅନୁଧ୍ୟାନ କରାଯିବ। ୨୮ ଦିନ ପରେ ହିଁ ସେମାନେ ଦ୍ୱିତୀୟ ଡୋଜ୍ନେବା ପାଇଁ ଯୋଗ୍ୟ ହେବେ। ରାଜ୍ୟମାନେ ୧୫-୧୮ ବର୍ଷ ବୟସ୍କ ପିଲାମାନଙ୍କ ପାଇଁ ସ୍ୱତନ୍ତ୍ର କୋଭିଡ ଟିକାକରଣ କେନ୍ଦ୍ର ପ୍ରତିଷ୍ଠା କରିପାରିବେ। ଏ ସମ୍ପର୍କରେ ରାଜ୍ୟମାନଙ୍କୁ ସୂଚନା ଦିଆଯାଇଛି ଯାହାକି କୋୱିନ ପ୍ଲାଟଫର୍ମରେ ପ୍ରଦର୍ଶିତ କରାଯାଇଛି। ସ୍ୱତନ୍ତ୍ର ସମର୍ପିତ ଟିକାକରଣ କେନ୍ଦ୍ର ପ୍ରତିଷ୍ଠା ହେବା ଫଳରେ ଟିକାକରଣରେ କୌଣସି ଦ୍ୱନ୍ଦ୍ୱ ରହିବ ନାହିଁ। ୧୫-୧୮ ବର୍ଷ ପିଲା ଏବଂ ଅନ୍ୟ ବୟସ ବର୍ଗର ପିଲାମାନଙ୍କୁ ଟିକା ଦେବା କ୍ଷେତ୍ରରେ ଯେପରି କୌଣସି ଭ୍ରମ ସୃଷ୍ଟି ନହେବ ତାହା ସୁନିଶ୍ଚିତ କରିବା ଲାଗି ରାଜ୍ୟମାନଙ୍କୁ ଭିନ୍ନ ଟିକାକରଣ ଦଳ ଓ ଭିନ୍ନ ଧାଡ଼ି ବ୍ୟବସ୍ଥା କରିବା ପାଇଁ ରାଜ୍ୟମାନଙ୍କୁ ପରାମର୍ଶ ଦିଆଯାଇଥିଲା। ପିଲାଙ୍କ ପାଇଁ ଅଲଗା ଓ ବୟସ୍କଙ୍କ ପାଇଁ ଅଲଗା ଧାଡ଼ି ରହିବ। ଯାହାଫଳରେ ଟିକାକରଣ କ୍ଷେତ୍ରରେ ଦ୍ୱନ୍ଦ୍ୱାତ୍ମକ ସ୍ଥିତିକୁ ଦୂର କରାଯାଇ ଏହାକୁ ସୁବ୍ୟବସ୍ଥିତ କରାଯାଇପାରିବ।
ଟିକାର ପ୍ରତିଷେଧକ ଡୋଜ୍ପ୍ରଦାନ କରାଯିବାକୁ ନେଇ କେନ୍ଦ୍ର ସ୍ୱାସ୍ଥ୍ୟ ସଚିବ କେତେକ ଗୁରୁତ୍ୱପୂର୍ଣ୍ଣ ଦିଗ ଉପରେ ଆଲୋକପାତ କରିଥିଲେ। ହିତାଧିକାରୀ ଦ୍ୱିତୀୟ ଡୋଜ କୋଭିଡ ପ୍ରତିଷେଧକ ଟିକା ନେବାର ୯ ମାସ (୩୯ ସପ୍ତାହ) ପରେ ପ୍ରତିଷେଧକ ଡୋଜ୍ନେବାକୁ ଯୋଗ୍ୟ ହୋଇପାରିବେ। ପୂର୍ବରୁ କୌଣସି ରୋଗରେ ପୀଡ଼ିତ ହିତାଧିକାରୀମାନଙ୍କୁ ଟିକା ନେବା ଲାଗି ଡାକ୍ତରୀ ପ୍ରମାଣପତ୍ର ଦେବାକୁ ପଡ଼ିବ ନାହିଁ। ଏ ସମ୍ପର୍କରେ ବିଭିନ୍ନ ଗଣମାଧ୍ୟମରେ ପ୍ରକାଶିତ ହେଉଥିବା ମିଥ୍ୟା ସୂଚନାକୁ ଖଣ୍ଡନ କରି ସ୍ୱାସ୍ଥ୍ୟ ସଚିବ ସ୍ପଷ୍ଟ ଭାବେ କହିଥିଲେ ଯେ କେନ୍ଦ୍ର ସରକାର ଏ ସଂକ୍ରାନ୍ତରେ କୌଣସି ନିର୍ଦ୍ଦେଶ ଜାରି କରିନାହାନ୍ତି। ପ୍ରତିଷେଧକ ଟିକା ନେବାକୁ ଆସିବା ସମୟରେ ଡାକ୍ତରଙ୍କ ସୁପାରିସପତ୍ର/ପ୍ରମାଣପତ୍ର ସାଙ୍ଗରେ ଆଣିବା ବାଧ୍ୟତାମୂଳକ ନୁହେଁ। ସେ ଏହା ମଧ୍ୟ କହିଥିଲେ ଯେ ପ୍ରତିଷେଧକ ଡୋଜ ନେବା ଲାଗି ଯୋଗ୍ୟ ହୋଇଥିବା ସବୁ ଲୋକମାନଙ୍କୁ କୋୱିନ ଏକ ରିମାଇଣ୍ଡର ବାର୍ତ୍ତା ପଠାଇବ ଏବଂ ପ୍ରତିଷେଧକ ଟିକା ସେମାନଙ୍କ ଡିଜିଟାଲ ଟିକାକରଣ ପ୍ରମାଣପତ୍ରରେ ମଧ୍ୟ ପ୍ରତିଫଳିତ ହେବ।
୧୫ରୁ ୧୮ ବର୍ଷ ବୟସ୍କ ହିତାଧିକାରୀଙ୍କ ଟିକାକରଣ ପାଇଁ ସ୍ୱାସ୍ଥ୍ୟ କର୍ମୀ ଏବଂ ଟିକାକରଣ ଦଳର ସଦସ୍ୟମାନଙ୍କୁ ପ୍ରଶିକ୍ଷଣ ଦେବା ଲାଗି ରାଜ୍ୟ ଓ କେନ୍ଦ୍ର ଶାସିତ ପ୍ରଦେଶମାନଙ୍କୁ ପରାମର୍ଶ ଦିଆଯାଇଛି। ଏହି ବୟସ ବର୍ଗଙ୍କ ଟିକାକରଣ ପାଇଁ ନିର୍ଦ୍ଧାରିତ ସମର୍ପିତ ଅଧିବେଶନ ସ୍ଥଳୀ ଚିହ୍ନଟ କରିବା ଲାଗି ମଧ୍ୟ କୁହାଯାଇଛି। ଚିହ୍ନଟ କରାଯାଇଥିବା ଅଧିବେଶନ ସ୍ଥଳୀରେ କୋଭାକ୍ସିନ ବିତରଣ ଲାଗି ଅଗ୍ରୀମ ଆକାରରେ ଉଚିତ୍ଯୋଜନା ପ୍ରସ୍ତୁତ କରିବା ପାଇଁ ରାଜ୍ୟମାନଙ୍କୁ ପରାମର୍ଶ ଦିଆଯାଇଥିଲା। ଟିକା ଦିଆଯିବା ସମୟରେ ଟିକାର ମିଶ୍ରଣକୁ ଏଡ଼ାଇବା ପାଇଁ ସ୍ୱତନ୍ତ୍ର ଟିକାକରଣ କେନ୍ଦ୍ର, ଭିନ୍ନ ଅଧିବେଶନ ସ୍ଥଳ, ଭିନ୍ନ ଧାଡ଼ି (ସେହି କେନ୍ଦ୍ରରେ ବୟସ୍କଙ୍କ ଟିକାକରଣ କରାଯାଉଥିଲେ) ଏବଂ ଭିନ୍ନ ଟିକାକରଣ ଦଳ ପ୍ରସ୍ତୁତ ରଖିବାକୁ ରାଜ୍ୟ ଓ କେନ୍ଦ୍ର ଶାସିତ ପ୍ରଦେଶମାନଙ୍କୁ କୁହାଯାଇଥିଲା। କୋୱିନ ଟିକା ଉପଯୋଗ କରୁଥିବା ହିତାଧିକାରୀଙ୍କ ଜିଲ୍ଲାୱାରୀ ଆକଳନ କରି ଟିକା ଡୋଜର ଆବଶ୍ୟକତା ସମ୍ପର୍କରେ ସୂଚନା ଦେବାକୁ ରାଜ୍ୟମାନଙ୍କୁ ପରାମର୍ଶ ଦିଆଯାଇଥିଲା। ଯେଉଁସବୁ ସ୍ଥାନରେ ୧୫ରୁ ୧୮ ବର୍ଷ ବୟସ ବର୍ଗଙ୍କୁ ଟିକା ଦିଆଯିବ ସେ ସମ୍ପର୍କରେ ପ୍ରଚାର ପ୍ରସାର କରିବା ଲାଗି କୁହାଯାଇଥିଲା। ଏସବୁ ହିତାଧିକାରୀମାନଙ୍କୁ ଟିକା ଦିଆଯିବାକୁ ରାଜ୍ୟମାନଙ୍କୁ ଯଥେଷ୍ଟ ସଂଖ୍ୟାରେ ଟିକା ଯୋଗାଇ ଦିଆଯିବ।
ଏହି ବୈଠକରେ ଅତିରିକ୍ତ ସଚିବ (ସ୍ୱାସ୍ଥ୍ୟ) ଡ. ମନୋହର ଅଗ୍ନାନୀ, ଯୁଗ୍ମ ସଚିବ (ସ୍ୱାସ୍ଥ୍ୟ) ଶ୍ରୀ ବିଶାଳ ଚୌହାନଙ୍କ ସମେତ ବିଭିନ୍ନ ରାଜ୍ୟ ଓ କେନ୍ଦ୍ର ଶାସିତ ପ୍ରଦେଶର ସ୍ୱାସ୍ଥ୍ୟ ବିଭାଗ ପ୍ରମୁଖ ସଚିବ, ଅତିରିକ୍ତ ମୁଖ୍ୟ ଶାସନ ସଚିବ (ସ୍ୱାସ୍ଥ୍ୟ) ଏବଂ ରାଜ୍ୟ ନିରୀକ୍ଷଣ ଅଧିକାରୀମାନେ ଉପସ୍ଥିତ ଥିଲେ।