ହରେକୃଷ୍ଣ ମହତାବଙ୍କ ୪୦ତମ ଶ୍ରାଦ୍ଧ ବାର୍ଷିକ ଓ ଚାରିଗାଁ ଗ୍ରାମପଂଚାୟତ ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟର ବାର୍ଷିକ ଉତ୍ସବ

ଭଦ୍ରକ, ୨ା୧ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଣ୍ଡାରୀପୋଖରୀ ନିର୍ବାଚନ ମଣ୍ଡଳୀ ଅନ୍ତର୍ଗତ ଚାରିଗାଁ ଗ୍ରାମ ପଂଚାୟତ ସରକାରୀ ଉନ୍ନୀତ ଉଚ୍ଚ ପ୍ରାଥମିକ ବିଦ୍ୟାଳୟ ପରିସରରେ ଓଡ଼ିଶାର ଗର୍ବ, ରାଜନୀତିର ଦିଗଦର୍ଶକ, ମହାନ ଜନନାୟକ, ପୂର୍ବତନ ମୁଖ୍ୟମନ୍ତ୍ରୀ ଡ଼ଃ ହରେକୃଷ୍ଣ ମହତାବଙ୍କ ୪୦ତମ ଶ୍ରାଦ୍ଧ ବାର୍ଷିକୀ ଓ ଉକ୍ତ ବିଦ୍ୟାଳୟ ର ବାର୍ଷିକୀ ଉତ୍ସବ ଅବସରରେ ଅନୁଷ୍ଠିତ ହୋଇଥିଲା ଏକ ଗରିମାମୟ ସ୍ମୃତିସଭା। ଏହି ପବିତ୍ର ଅବସରରେ ଭଣ୍ଡାରିପୋଖରୀ ବିଧାୟକ ସଂଜୀବ ମଲ୍ଲିକ, ବିଜୁ ଜନତା ଦଳର ରାଜ୍ୟ ବରିଷ୍ଠ ଉପ-ସଭାପତି ତଥା ପୂର୍ବତନ ମନ୍ତ୍ରୀ ପ୍ରଫୁଲ୍ଲ ସାମଲ ଉପସ୍ଥିତ ରହି ଡ଼ଃ ମହତାବଙ୍କ ପ୍ରତିମୂର୍ତୀରେ ମାଲ୍ୟାର୍ପଣ କରି ନିଜ ଓଜସ୍ୱୀ ବକ୍ତବ୍ୟରେ ତାଙ୍କର ଦେଶଭକ୍ତି, ରାଜନୈତିକ ଦୃଷ୍ଟିକୋଣ, ଓଡ଼ିଶା ଗଢ଼ିବାରେ ଅବିସ୍ମରଣୀୟ ଅବଦାନ ସମ୍ପର୍କରେ ଗଭୀର ଶ୍ରଦ୍ଧା ସହ ସ୍ମରଣ କରିଥିଲେ। ଶିକ୍ଷା ଓ ପ୍ରତିଭାକୁ ସମ୍ମାନ ଏକ ଉଜ୍ଜ୍ୱଳ ଆଗାମୀର ପ୍ରତିଜ୍ଞା କାର୍ଯ୍ୟକ୍ରମର ଶେଷ ପର୍ଯ୍ୟାୟରେ ବିଭିନ୍ନ କ୍ଷେତ୍ରରେ ଉତ୍କୃଷ୍ଟ କୃତିତ୍ୱ ପାଇଁ କୁନି କୁନି ଛାତ୍ର-ଛାତ୍ରୀମାନଙ୍କୁ ଟ୍ରଫି ପ୍ରଦାନ କରାଯାଇ ତାଙ୍କ ମୁହଁରେ ଆନନ୍ଦର ହସ ଓ ଆଶାର ଆଲୋକ ଫୁଟାଇ ଦିଆଗଲା। ଏହି ସ୍ମୃତିମୟ କାର୍ଯ୍ୟକ୍ରମରେ ବିଶିଷ୍ଟ ଶିକ୍ଷାବିତ୍ ନାରାୟଣ ଚନ୍ଦ୍ର ଲେଙ୍କା, ଜାତୀୟ ପୁରସ୍କାର ପ୍ରାପ୍ତ ଶିକ୍ଷକ ଭାସ୍କର ଚନ୍ଦ୍ର ପାଢ଼ୀ, ସ୍ଥାନୀୟ ସରପଂଚ ଗୀତିକା ଭୋଇ, ବରିଷ୍ଠ ସାମ୍ବାଦିକ ହେମନ୍ତ ସିଂହ, ଯୁବନେତା ବନମାଳୀ ବେହେରା, ଅନ୍ୟାନ୍ୟ ବୁଦ୍ଧିଜୀବୀ ବୃନ୍ଦ, ବହୁ ସଂଖ୍ୟକ ଛାତ୍ର-ଛାତ୍ରୀ ଅଭିଭାବକ ଓ ବରିଷ୍ଠ ଏବଂ ଯୁବ ନେତୃମଣ୍ଡଳୀଙ୍କ ଉପସ୍ଥିତି ସଭାକୁ ଆହୁରି ଗରିମାମୟ କରିଥିଲା। ଡ଼ଃ ହରେକୃଷ୍ଣ ମହତାବ ନାମ ନୁହେଁ, ଏକ ଚିରଞ୍ଜୀବୀ ଧାରା ତାଙ୍କର ଆଦର୍ଶ, ଚିନ୍ତାଧାରା ଓ ସେବାଭାବ ଆଗାମୀ ପିଢ଼ି ପାଇଁ ସଦା ପ୍ରେରଣା ହୋଇ ରହିବ।