ଭଦ୍ରକ, ୪ା୪ (ଓଡ଼ିଆ ପୁଅ / ସ୍ନିଗ୍ଧା ରାୟ) – ପୁରୁଣାବଜାର ସ୍ଥିତ କାଜି ମହଲା ଗାଁରେ ହଜରତ୍ ଦୀୱାନ ଅବୁ ତାଲିବ ବାବାଙ୍କ ବାର୍ଷିକ ଉତ୍ସବ ଉଦ୍ଯାପିତ ହୋଇ ଯାଇଛି । ବାବାଙ୍କ ଗୋସଲଖାନୀ ସରିବା ପରେ କମିଟି ତରଫରୁ ଏକ ଚାଦର ଶୋଭାଯାତ୍ରା ପରିକ୍ରମା କରି ବାବାଙ୍କ ସମାଧିରେ ଚାଦର ଚଢା ଯାଇଥିଲା ଏବଂ ବାବାଙ୍କ ଭକ୍ତମାନେ ନିଜ ନିଜର ମାନସିକ ଚାଦର ଚଢାଇଥିଲେ । କମିଟି ତରଫରୁ ଲଙ୍ଗର (ପ୍ରସାଦ) ବଣ୍ଟନ କରାଯାଇଥିଲା । କମିଟି ତରଫରୁ ରାତ୍ର ୯ ଘଟିକା ସମୟରେ ଏକ ଧର୍ମସଭାର ଆୟୋଜନ କରାଯାଇଥିଲା । ଏହି ଧର୍ମସଭାକୁ ମୁଖ୍ୟ ଅତିଥି ଭାବେ ଭଦ୍ରକ ମୁସଲିମ ଜମାତ୍ର ସଭାପତି ହାଜୀ ମହମ୍ମଦ ଅବଦୁଲ ବାରୀ ମହମବତୀ ଜଳାଇ ଶୁଭାରମ୍ଭ କରିଥିଲେ । ଓଡ଼ିଶା ସୁପ୍ରସିଦ୍ଧ କବି ତଥା ଶିକ୍ଷକ ମୁସ୍ତାକ ଗୌହର ସଂଚାଳନ ଦାୟିତ୍ୱ ତୁଲାଇଥିଲେ । ଏହି ସଭାରେ ଭାରତର ସୁପ୍ରସିଦ୍ଧ ମୌଲାନା (ପଣ୍ଡିତ) ସୈୟଦ ସାଘିଲ ଇମାମ କାଦରୀ ହାଇଦ୍ରବାଦରୁ ଆସି ଯୋଗଦାନ କରି ବାବାଙ୍କ ନୀତିବାଣୀ ଉପରେ ଆଲୋକପାତ କରିଥିଲେ । ଭାରତର ପ୍ରସିଦ୍ଧ କବି (ସାଏର) ଅଫଜଲ ଓଫା ନୁରୀ, ସାହିଦ ରଜା, ରିଜୱାନ କାଦରୀ, ଶାହାବାଜ କାଦରୀ ଓ ଗୁଲଫାମ କାଦରୀ ଯୋଗଦାନ କରିଥିଲେ । ଏହି ଧର୍ମସଭାରେ ଦଳୀୟ ନେତା ଅସିତ ପଟ୍ଟନାୟକ, ନଳିନୀ ମହାନ୍ତି, ଦିଲିପ ନାୟକ ଓ ହରୀ ନନ୍ଦୀ ପ୍ରମୁଖ ଯୋଗ ଦେଇଥିଲେ । ଉତ୍ସବକୁ କମିଟିର ସଭାପତି ଶେଖ ରାଜୁ, ସମ୍ପାଦକ ମୋଜାଫର ଖାନ ଏବଂ ସମସ୍ତ ସଭ୍ୟ ପରିଚଳାନା କରିଥିଲେ ।
ହଜରତ୍ ଦୀୱାନ ଅବୁତାଲିବ ବାବା (ର.ଅ.)ଙ୍କ ବାର୍ଷିକ ଉତ୍ସବ
