ସୁଧୁରୁଛି ବନ୍ୟା ପରିସ୍ଥିତି, ବାଇକରେ ଯାଇ ବନ୍ୟା ବିପନ୍ନଙ୍କ ଦୁର୍ଦ୍ଦଶା ବୁଝିଲେ ନୂତନ ଜିଲାପାଳ, ୧୦୨ରୁ ୭୨ ଆଶ୍ରୟ କେନ୍ଦ୍ରରେ ରନ୍ଧା ଖାଦ୍ୟ

ଭଦ୍ରକ, ୨ା୮ (ଓଡିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ଜିଲ୍ଲା ତିହିଡି ବ୍ଲକରେ ସୃଷ୍ଟି ହୋଇଥିବା ବନ୍ୟା ପରିସ୍ଥିତି ଧୀରେ ଧୀରେ ସୁଧୁରୁଥିବା ଜଣାଯାଇଛି। ତେବେ ଉପର ମୁଣ୍ଡରୁ ପାଣି କାମୁଥିବା ବେଳେ ତଳିଆ ପଂଚାୟତରେ ପାଣି ବଢୁଛି।ଯେଉଁଥିପାଇଁ ବାରସର ଓ ଗୋବିନ୍ଦପୁର ପଂଚାୟତର ବହୁ ଗ୍ରାମ ଏବେବି ପାଣି ଘେରରେ ରହିଥିବା ଜଣାଯାଇଛି । ଏହି ପରିପ୍ରେକ୍ଷୀରେ ରବିବାର ଜିଲାପାଳ ସୋମେଶ ଉପାଧ୍ୟାୟ ଏକ ବାଇକରେଯାଇ ବାରସର ପଂଚାୟତ ଅଧିନ କେଳାସାହିର ବିପନ୍ନ ମାନଙ୍କ ଦୁର୍ଦ୍ଧଶା ସମ୍ପର୍କରେ ପଚାରି ବୁଝିଥିବା ବେଳେ ପରିସ୍ଥିତି ଅନୁଧ୍ୟାନ କରିଛନ୍ତି । ଏହାଛଡ଼ା ସେ ବିପନ୍ନମାନଙ୍କୁ ଦିଆ ଯାଉଥିବା ରନ୍ଧାଖାଦ୍ୟର ମାନ ଯାଂଚ କରିଥିଲେ । ରିଲିଫ ବଂଟନ ଓ ଉଦ୍ଧାର କାର୍ଯ୍ୟର ସେ ତଦାରଖ କରିଥିଲେ । ଜିଲାପାଳଙ୍କ ସହିତ ବିଡ଼ିଓ ନିରଞ୍ଜନ ବାରିକ, ସହକାରୀ ଯନ୍ତ୍ରୀ ଭୀଷ୍ମଦେବ ଶତପଥୀ ପ୍ରମୁଖ ଉପସ୍ଥିତ ଥିଲେ । ପ୍ରଳୟଙ୍କରୀ ବନ୍ୟା ପାଇଁ ବ୍ଲକର ବିଭିନ୍ନ ପଂଚାୟତରେ ମୋଟ ୧୦୨ଟି ଆଶ୍ରୟ କେନ୍ଦ୍ରରେ ବିପନ୍ନମାନଙ୍କୁ ଥଇଥାନ କରାଯାଇଥିଲା । ସେମାନଙ୍କ ପାଇଁ ଗୋଟିଏ ଓଳି ରନ୍ଧା ଖାଦ୍ୟର ବ୍ୟବସ୍ଥା କରାଯାଇଥିଲା । ତନ୍ମଧ୍ୟରୁ ଏବେ ୭୨ କେନ୍ଦ୍ରରେ ରନ୍ଧାଖାଦ୍ୟ ଦିଆଯାଉଛି। ସାଳନ୍ଦୀ ନଦୀର ବନ୍ୟା ପ୍ରଭାବିତ ବାରୋ, ବିଲଣା, ବୋଡ଼କ ଓ ତଳଗୋପବିନ୍ଧା ପ୍ରମୁଖ ପଂଚାୟତରେ ବନ୍ୟା ସ୍ଥିତିର ପରିବର୍ତନ ଘଟି ପାଣି ଧୀରେ ଧୀରେ ହ୍ରାସ ପାଇଥିବା ବିଡ଼ିଓ ବାରିକ ସୂଚନା ଦେଇଛନ୍ତି ।