ସାପ କାମୁଡାରେ ପୁଅ ମୃତ, ବାପା ଗୁରୁତର

ଭଦ୍ରକ, ୧୫ା୭ (ଓଡ଼ିଆ ପୁଅ / ସ୍ନିଗ୍ଧା ରାୟ) – ସାନ କୃଷ୍ଣପୁର ପଂଚାୟତ ଚାଳିଶଚେନ ଗ୍ରାମରେ ଘଟିଯାଇଛି ଏକ ଦୁଃଖଦ ଘଟଣା । ଗତକାଲି ରାତିରେ ଶୋଇଥିବା ଅବସ୍ଥାରେ ସାପ କାମୁଡିବାରୁ ୩ ବର୍ଷର ନାବାଳକ ପୁଅର ମୃତ୍ୟୁ ଘଟିବା ସହିତ ବାପା ଗୁରୁତର ଅବସ୍ଥାରେ କଟକ ସ୍ଥାନାନ୍ତରିତ ହୋଇଛନ୍ତି । ସୂଚନା ଅନୁସାରେ ଚାଳିଶଚେନ ଗ୍ରାମର ଦୁଲ୍ଲା ଦାସଙ୍କ ପୁଅ ଜଗନ୍ନାଥ ଦାସ ଗତକାଲି ରାତିରେ ପରିବାର ସହିତ ନିଜ ଘରେ ଶୋଇଥିଲେ । ଏହି ଶୋଇଥିବାବେଳେ ଜଗନ୍ନାଥଙ୍କୁ ଓ ତାଙ୍କ ନାବାଳକ ପୁତ୍ର ଅକ୍ଷୟ ଦାସ (୩ ବର୍ଷ)ଙ୍କୁ ସାପ କାମୁଡିଥିଲା । ସାପ କାମୁଡିବା ପରେ ପରିବାର ଲୋକଙ୍କ ଚିତ୍କାର ଶୁଣି ପଡୋଶୀ ସେମାନଙ୍କୁ ବାସୁଦେବପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇଯାଇଥିଲେ । ସେଠାରେ ଡାକ୍ତର ଅକ୍ଷୟଙ୍କୁ ମୃତ ଘୋଷଣା କରିବା ସହିତ ଜଗନ୍ନାଥଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ଭଦ୍ରକ ଓ ପରେ ପରେ କଟକ ରେଫର କରିଛନ୍ତି । ଗୋଟିଏ ପରିବାରର ଦୁଇଜଣଙ୍କୁ ସାପ କାମୁଡିବାର ଦେଖି ଉକ୍ତ ଅଂଚଳରେ ଶୋକର ଛାୟା ଖେଳିଯାଇଛି ।