ସର୍ପ ଦଂଶନରେ ମହିଳା ମୃତ

ଭଦ୍ରକ, ୪ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଏହି ଜିଲାର ଭଣ୍ଡାରିପୋଖରୀ ଥାନା ଅନ୍ତର୍ଗତ ସରସଦା ପଞ୍ଚାୟତ ନେନ୍ତିପୁର ଗ୍ରାମର ମନୋରମା ଯେନା(୫୫) ସର୍ପଦଂଶନରେ ପ୍ରାଣ ହରାଇଥିବା ଜଣାଯାଇଛି। ଗ୍ରାମର ଜଗବନ୍ଧୁ ଯେନାଙ୍କ ପତ୍ନୀ ମନୋରମା ଘର ପଛପଟରୁ ଘରଲିପା ପାଇଁ ମୁଷାମାଟି ଆଣିବାକୁ ଯାଇଥିବା ବେଳେ ଭୁଲବଶତଃ ମୁଷାମାଟି ଉପରେ ଗୋଡ ପଡି ଯାଇଥିଲା। ମୁଷାମାଟିରେ ଥିବା ସର୍ପ ମନୋରମା ଗୋଡକୁ ଦଂଶନ କରିଥିଲା। ଏକଥା ଘର ଲୋକଙ୍କୁ ମନୋରମା ଜଣାଇଥିଲା। ପରିବାର ଲୋକେ ତାଙ୍କୁ ଭଣ୍ଡାରିପୋଖରୀ ମେଡିକାଲକୁ ନେଇଥିଲେ। ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପୁତୁରା ରାଜକିଶୋରଙ୍କ ଅଭିଯୋଗ କ୍ରମେ ଥାନାରେ ୧୪/୨୨ନଂ ଅପମୃତ୍ୟୁ ମାମଲା ଋଜୁ କରାଯାଇ ଶବ ବ୍ୟବଚ୍ଛେଦ କରାଯାଇଛି। ଅପରାହ୍ନରେ ମନୋରମା ଶବକୁ ଗ୍ରାମ ଶ୍ମଶାନରେ ସଂସ୍କାର କରାଯାଇଛି।