ସଡକ ଦୁର୍ଘଟଣା, ୪ ଆହତ

ଭଦ୍ରକ ୨୦-୧୧ (ଓଡ଼ିଆ ପୁଅ/ସ୍ନିଗ୍ଧା ରାୟ) ଏହି ଜିଲାର ଭଣ୍ଡାରିପୋଖରୀ ବ୍ଲକ ଅନ୍ତର୍ଗତ ୧୬ ନଂ ଜାତୀୟ ରାଜପଥର ମଜୁରୀଗଡିଆ ଗ୍ରାମ ନିକଟରେ ଆଜି ଘଟିଥିବା ସଡକ ଦୁର୍ଘଟଣାରେ ୪ ଆହତ ହୋଇଛନ୍ତି। ଆଜି ଦିନ ପ୍ରାୟ ଗୋଟାଏ ସମୟରେ ଓଆର ୦୯ ବି ୭୭୪୭ନଂ ମାଲ ବୋଝେଇ ଟ୍ରକ ଭଦ୍ରକ ଆଡକୁ ଯାଉଥିବା ବେଳେ ସମାନ ଦିଗରେ ଦ୍ରୁତଗତିରେ ଯାଉଥିବା ଓଡି ୦୧ ଏଇ ୯୪୬୦ନଂ କାର ଟକ୍ରକୁ ଅତିକ୍ରମ କରୁଥିଲା। ପଛରୁ ଯାତ୍ରୀବାହୀ ବସ ଆସିଯିବାରୁ କାର ଟି ଭାରସାମ୍ୟ ହରାଇ ଟ୍ରକ ସହ ବାଡେଇ ହୋଇଯାଇଥିଲା। କାରକୁ ସୁରକ୍ଷା ଦେବାକୁ ଯାଇ ଟ୍ରକଟି ଘଟଣାସ୍ଥଳରେ ଓଲଟି ପଡିଥିଲା। ଟ୍ରକ ଚାଳକ ଯାଜପୁର ଜିଲ୍ଲା ଧର୍ମଶାଳା ଥାନା ଅନ୍ତର୍ଗତ କୃଷ୍ଣଚନ୍ଦ୍ରପୁର ଗ୍ରାମର ରଘୁନାଥ ସ୍ୱାଇଁ(୪୦) ଟ୍ରକ ତଳେ ଚାପି ହୋଇ ରହିଯାଇଥିଲା। ଭଣ୍ଡାରିପୋଖରୀ ଦମକଳ କେନ୍ଦ୍ରକର୍ମଚାରୀମାନେ ଅଧିକାରୀ ରମାକାନ୍ତ ମଳ୍ଲିକଙ୍କ ନେତୃତ୍ୱରେ ସୁରକ୍ଷିତ ଭାବେ ଗୁରୁତର ଆହତ ଚାଳକକୁ ଉଦ୍ଧାର କରି ଭଦ୍ରକ ମେଡିକାଲକୁ ଚିକିତ୍ସା ପାଇଁ ପଠାଇଥିଲେ। କାରରେ ଥିବା ଗୋଟିଏ ଦମ୍ପତ୍ତି ଓ ଶିଶୁପୁତ୍ର ଆହତ ହୋଇ ଭଦ୍ରକ ମେଡିକାଲକୁ ଚିକିତ୍ସା ପାଇଁ ଯାଇଥିଲେ।