ଭଦ୍ରକ, ୨୫ା୧୧ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଆଜିି ସନ୍ଧ୍ୟାରେ ଭଦ୍ରକ କୋର୍ଟ ପରିସରସ୍ଥ ୱାନ୍ ଷ୍ଟପ ସେଣ୍ଟର ପ୍ରାଙ୍ଗଣରେ ବିଶ୍ୱ ମହିଳା ଓ ବାଳିକା ହିଂସା ନିରୋଧୀ ଦିବସ ପାଳିତ ହୋଇଛି । ଏହି ଉପଲକ୍ଷେ ଫେଲୋସିପ୍ ଦ୍ୱାରା ପରିଚାଳିତ ୱାନ୍ ଷ୍ଟପ୍ ସେଣ୍ଟର ପକ୍ଷରୁ ଆୟୋଜିତ ସଭାକୁ ମୁଖ୍ୟଅତିଥି ଭଦ୍ରକର ଅତିରିକ୍ତ ଏସ୍ପି ବିକାଶ ଦାଶ କ୍ୟାଣ୍ଡେଲ ପ୍ରଜ୍ୱଳନ କରି ଉଦ୍ଘାଟନ କରିଥିଲେ । ଅନ୍ୟତମ ଅତିଥି ଭାବେ ଜିଲ୍ଲା ସମାଜ ମଙ୍ଗଳ ଅଧିକାରିଣୀ ତିଳୋତ୍ତମା ମହାପାତ୍ର, ଇନର ହୁଇଲ କ୍ଳବର ସଭାନେତ୍ରୀ ସ୍ନେହଲତା ବେହେରା, ଜିଲ୍ଲା ଜୁଭେନାଇଲ ବୋର୍ଡ ସଦସ୍ୟ ଆଇନଜୀବୀ ଶିବ ପ୍ରସାଦ ମହାନ୍ତି, ଫେଲୋସିପ୍ର ଉପଦେଷ୍ଟା ଜମ୍ବୁବତୀ ଦାସ, ଜିଲ୍ଳା ଶିଶୁ ସୁରକ୍ଷା ୟୁନିଟ ଅଧିକାରୀ ବିଜୟ କେତନ ସାହୁ ପ୍ରମୁଖ ଯୋଗ ଦେଇ ସମାଜରେ ମହିଳାମାନେ ଅଧିକରୁ ଅଧିକ ପାରିବାରିକ ହିଂସାର ଶିକାର ହେଉଥିବା ବେଳେ ବାଳିକାମାନେ ମଧ୍ୟ ଏଥିରୁ ବାଦ୍ ପଡ଼ୁ ନାହାନ୍ତି । ଏଥିଲାଗି ଜନ ସଚେତନତାର ଯଥେଷ୍ଟ ଆବଶ୍ୟକତା ରହିଛି । ଯେ ପର୍ଯ୍ୟନ୍ତ ଲୋକମାନେ ନିଜକୁ ସଚେତନ ନ ହୋଇଛନ୍ତି ସେତେଦିନ ପର୍ଯ୍ୟନ୍ତ ମହିଳାମାନେ ଏଥିରୁ ବର୍ତ୍ତି ପାରିବେ ନାହିଁ ବୋଲି କହିଥିଲେ । ବିଶେଷ ଭାବେ ମହିଳାମାନେ ସାମାଜିକ ହିଂସା ଠାରୁ ଅଧିକ ଘରୋଇ ହିଂସା ବା ପାରିବାରିକ ହିଂସାର ଶିକାର ହେଉଛନ୍ତି । ସେହିପରି ବାଳିକାଙ୍କ କ୍ଷେତ୍ରରେ ଉଭୟ ସାମାଜିକ ଓ ପାରିବାରିକ ହିଂସା ଦେଖା ଦେଉଛି । ଅନେକ ସମୟରେ ବାଳିକା ମାନେ ପାରିବାରିକ ଓ ସାମାଜିକ ଯୌନ ନିର୍ଯାତନାର ଶିକାର ହେଉଛି । ଏହା ଏକ ସାମାଜିକ ବ୍ୟାଧି । ଏହାକୁ ଦୂର କରିବାର ଏକମାତ୍ର ଅମୋଘ ଅସ୍ତ୍ର ହେଉଛି ସଚେତନତା । ଆଇନ ଯେତେ କଠୋର ହୋଇଥିଲେ ବି ଲୋକେ ସଚେତନ ନ ହେଲେ ବହୁ ହିଂସା ଅଜ୍ଞାତରେ ରହିବାରୁ ବର୍ତ୍ତିଯିବ ବୋଲି ମତ ପ୍ରକାଶ ପାଇଥିଲା । ଶିକ୍ଷକ ନେତ୍ରୀ ଚାରୁଲତା ମହାପାତ୍ର ମଞ୍ଚ ପରିଚାଳନା କରିଥିଲେ । ଫେଲୋସିପ୍ର ସଭାନେତ୍ରୀ ପ୍ରାଧ୍ୟାପିକା ଝରଣା ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଭାରେ ନିର୍ଦ୍ଦେଶକ ଲଲାଟେନ୍ଦୁ ମହାନ୍ତି ପ୍ରାରମ୍ଭିକ ସୂଚନା ଓ ସମ୍ପାଦକ ଏସ୍.ଏମ୍. ଫାରୁକ ଧନ୍ୟବାଦ ପ୍ରଦାନ କରିଥିଲେ । ପ୍ରାଧ୍ୟାପିକା ରାଧାରାଣି ମହାପାତ୍ର, ଅଖିଳ ଭାରତ ଗଣତାନ୍ତ୍ରିକ ମହିଳା ସଂଗଠନର ଜିଲ୍ଳା ସଭାନେତ୍ରୀ ପ୍ରଭାତୀ ଜେନା, ସମ୍ପାଦିକା ମମତା ଜେନା ପ୍ରମୁଖ ବକ୍ତବ୍ୟ ରଖିଥିଲେ । ଫେଲୋସିପ୍ ଶିଶୁ ଯତ୍ନ ଅନୁଷ୍ଠାନର ଶିଶୁମାନେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିଥିଲେ । ୱାନ୍ ଷ୍ଟପ ସେଣ୍ଟରର ମସସ୍ତ କର୍ମକର୍ତ୍ତା, କର୍ମଚାରୀ ତଥା ଅତିଥିମାନେ ଏବଂ ଫେଲୋସିପର କର୍ମଚାରୀ ସମୂହ ଭାବେ କ୍ୟାଣ୍ଡେଲ ପ୍ରଜ୍ୱଳନ କରି ଏହାକୁ ପାଳନ କରିଥିଲେ ।
ସଚେତନତାର ଅଭାବ ମହିଳା ହିଂସାର ପ୍ରମୁଖ କାରଣ, ୱାନ୍ ଷ୍ଟପ୍ ସେଣ୍ଟରରେ ବିଶ୍ୱ ମହିଳା ହିଂସା ନିରୋଧୀ ଦିବସ ପାଳିତ
