ସଂଘବଦ୍ଧ ଆକ୍ରମଣରେ ତିଖିଲିଆ ଗ୍ରାମର ୩ ଗୁରୁତର

ଭଦ୍ରକ, ୧୪ା୧୨ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଏହି ଜିଲାର ଭଣ୍ଡାରିପୋଖରୀ ଥାନା ଅନ୍ତର୍ଗତ ଷୋଳମପୁର ପଞ୍ଚାୟତ ତିଖିଲିଆ ଗ୍ରାମରେ ଆଜି ସଂଘବଦ୍ଧ ଆକ୍ରମଣରେ ୩ ଜଣ ଗୁରୁତର ଆହତ ହୋଇ ମେଡିକାଲରେ ଚିକିତ୍ସିତ ହେଉଥିବା ଜଣାଯାଇଛି। ଗ୍ରାମର କାଶୀନାଥ ଭୋଇ(୬୮) ଠାକୁରାଣୀ ଡିହକୁ ଗାଈ ଚରାଇବାକୁ ନେଇଥିବା ବେଳେ ଫୁଲଗଛ ଗୋରୁ ଖାଇଦେବା ଅଭିଯୋଗ କରି କେତେକ ଲୋକ ସଂଘବନ୍ଧ ଭାବେ ଆକ୍ରମଣ କରିଥିଲେ। ଫଳରେ କାଶୀନାଥଙ୍କ ମୁଣ୍ଡ ଓ ହାତଗୋଡରେ ଗୁରୁତର ଆଘାତ ଲାଗି ଆହତ ହୋଇଥିଲେ। କାଶୀନାଥଙ୍କ ପତ୍ନୀ ନିରୂପମା ଓ ଭାଇ କୈଳାସ ରକ୍ଷା କରିବାକୁ ଯାଇ ଆକ୍ରମଣର ଶିକାର ହୋଇଥିଲେ। କାଶୀନାଥ, କୈଳାସ ଓ ନିରୂପମାଙ୍କୁ ଯାଜପୁର ମେଡିକାଲକୁ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା। ଅବସ୍ଥା ଗୁରୁତର ଥିବାରୁ କାଶୀନାଥଙ୍କୁ କଟକ ପଠାଇ ଦିଆଯାଇଥିଲା। ମିନାକ୍ଷୀ ଭୋଇ ଏ ସମ୍ପର୍କରେ ଥାନାରେ ଗ୍ରାମର ଅଜୟ ଭୋଇ, ବିଜୟ ଭୋଇଙ୍କ ସମେତ ୧୪ ଜଣଙ୍କ ନାମରେ ଅଭିଯୋଗ କରିଥିବା ଜଣାଯାଇଛି। ରିପୋର୍ଟ ପ୍ରସ୍ତୁତ ପର୍ଯ୍ୟନ୍ତ ଥାନାରେ ମାମଲା ଋଜୁ ହୋଇନଥିବା ଜଣାଯାଇଛି।