ମୁମ୍ବଇ, ୧୪|୭ (ଓଡ଼ିଆ ପୁଅ) : ରିଲାଏନ୍ସ ଇଣ୍ଡଷ୍ଟ୍ରିଜ ଲିମିଟେଡ (ଆରଆଇଏଲ୍) ଏବଂ ଭାରତୀୟ ଆଥଲେଟିକ ଫେଡେରେସନ (ଏଏଫଆଇ) ଭାରତରେ ଆଥଲେଟମାନଙ୍କର ସାମଗ୍ରିକ ଅଭିବୃଦ୍ଧିକୁ ସମର୍ଥ କରାଇବା ସକାଶେ ଦୀର୍ଘାବଧି ସହଭାଗିତା ସମ୍ପର୍କରେ ଘୋଷଣା କରିଛନ୍ତି। ବିଗତ ବର୍ଷଗୁଡିକରେ ରିଲାଏନ୍ସ ଫାଉଣ୍ଡେସନ ଏଏଫ୍ଆଇ ପ୍ରତି ଏକ ଉତ୍ସର୍ଗୀକୃତ ସହଭାଗୀ ହୋଇଛି ଏବଂ ସମ୍ପ୍ରତି ହୋଇଥିବା ସହଭାଗିତା ଦୁଇ ସଂସ୍ଥା ମଧ୍ୟରେ ସହଯୋଗକୁ ଅଧିକ ନିବିଡ କରିବାକୁ ଯାଉଛି।
ଏହି ସହଭାଗିତା ସମଗ୍ର ଦେଶରୁ ଆଥଲେଟମାନଙ୍କୁ ଆବିଷ୍କାର କରିବା, ସେମାନଙ୍କର ପରିପୋଷଣ ଏବଂ ବିକାଶ ସାଧନ କରିବା ଏବଂ ସେମାନଙ୍କୁ ଓଡ଼ିଶା ରିଲାଏନ୍ସ ଫାଉଣ୍ଡେସନ ଆଥଲେଟିକ୍ସ ହାଇ-ପରଫରମାନ୍ସ ସେଂଟର ଓ ସାର୍ ଏଚ ଏନ୍ ରିଲାଏନ୍ସ ଫାଉଣ୍ଡେସନ ହସପିଟାଲ ସହିତ ରିଲାଏନ୍ସ ଫାଉଣ୍ଡେସନ ପରିବ୍ୟବସ୍ଥାକୁ ଉପଯୋଗ କରି ବିଶ୍ୱଶ୍ରେଣୀର ସୁବିଧା ସୁଯୋଗ, କୋଚିଂ ଏବଂ କ୍ରୀଡା ବିଜ୍ଞାନ ଓ ମେଡିସିନ ସହାୟତା ଯୋଗାଇଦେବାକୁ ଲକ୍ଷ୍ୟ ରଖିଛି। ସଂସ୍ଥାର ବୃହତର ଦୃଷ୍ଟିକୋଣ ଅନୁଯାୟୀ ଏହି ସହଭାଗିତା ବାଳିକା ଆଥଲେଟମାନଙ୍କ ଉପରେ ସ୍ୱତନ୍ତ୍ର ଦୃଷ୍ଟିନିବଦ୍ଧ କରିବ ଏବଂ ଲିଙ୍ଗଗତ ତାରତମ୍ୟ ଦୂର କରିବା ଏବଂ ସେମାନଙ୍କୁ ସେମାନଙ୍କ ସ୍ୱପ୍ନ ସାକାର କରିବା ଦିଗରେ ସମର୍ଥ କରାଇବ। ଏଏଫଆଇର ପ୍ରମୁଖ ସହଭାଗୀ ଭାବରେ ରିଲାଏନ୍ସ ବ୍ରାଣ୍ଡ୍ ସମସ୍ତ ଜାତୀୟ ଟିମ୍ର ଜର୍ସି ଓ ତାଲିମ କିଟ୍ଗୁଡିକରେ ପ୍ରମୁଖ ଜାତୀୟ, ଅନ୍ତର୍ଜାତୀୟ ପ୍ରତିଯୋଗିତା ଏବଂ ତାଲିମ ଶିବିରଗୁଡିକରେ ପ୍ରଦର୍ଶିତ ହେବ।
ଏହି ଅବସରରେ ଆନନ୍ଦ ପ୍ରକାଶ କରି ଶ୍ରୀମତୀ ନିତା ଏମ୍ ଅମ୍ବାନି, ଆଇଓସି ସଦସ୍ୟ, ଏବଂ ନିର୍ଦ୍ଦେଶିକା, ରିଲାଏନ୍ସ ଇଣ୍ଡଷ୍ଟ୍ରିଜ ଲିମିଟେଡ କହିଛନ୍ତି, “ଭାରତୀୟ ଆଥଲେଟିକ୍ସ ଫେଡେରେସନ ସହିତ ରିଲାଏନ୍ସ ଫାଉଣ୍ଡେସନର ସହଭାଗିତାକୁ ସମ୍ପ୍ରସାରିତ କରି ଆମେ ଆନନ୍ଦିତ। ଆଥଲେଟିକ୍ସ ବିଶ୍ୱ କ୍ରୀଡା ଜଗତରେ ଅନ୍ୟତମ ସର୍ବାଧିକ ଲୋକପ୍ରିୟ ଶୃଙ୍ଖଳା ହୋଇଛି ଏବଂ ଏହି ସହଭାଗିତା ଭାରତୀୟ ଆଥଲେଟମାନଙ୍କୁ ସୁବିଧା ସୁୁଯୋଗ ଏବଂ ବିଶେଷ କରି ବାଳିକାମାନଙ୍କ ଉପରେ ସ୍ୱତନ୍ତ୍ର ଦୃଷ୍ଟି ଦେବା ସହିତ ଆମ ଯୁବ ପ୍ରତିଭାଙ୍କୁ ବିଶ୍ୱ ଶ୍ରେଣୀର ସୁବିଧା ସୁଯୋଗ ଯୋଗାଇଦେଇ ସେମାନଙ୍କ ଅଭିବୃଦ୍ଧି ତ୍ୱରାନ୍ୱିତ କରିବାକୁ ଲକ୍ଷ୍ୟ ରଖିଛି। ସଠିକ ଭିତିଭୂମି, ତାଲିମ ଏବଂ ସମର୍ଥନ ମିଳିବା ଦ୍ୱାରା ଆମର ଅଧିକାଂଶ ଯୁବ ଆଥଲେଟଙ୍କୁ ବିଶ୍ୱର ବିଜୟ ଷ୍ଟାଣ୍ଡ୍ଗୁଡିକ ଉପରେ ଦେଖିବା ନେଇ ମୁଁ ନିଶ୍ଚିତ ଅଛି। ଏହି ସହଭାଗିତା ମଧ୍ୟ ଭାରତରେ ଅଲିମ୍ପିକ ଅଭିଯାନକୁ ସୁଦୃଢ କରିବା ନିମନ୍ତେ ଆମ ସ୍ୱପ୍ନ ସାକାର କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ହୋଇଛି।”
ଶ୍ରୀ ଆଦିଲ ସୁମାରିୱାଲ୍ଲା, ସଭାପତି, ଭାରତୀୟ ଆଥଲେଟିକ୍ସ ଫେଡେରେସନ କହିଛନ୍ତି, “ଶ୍ରୀମତୀ ନିତା ଅମ୍ବାନି ଏବଂ ରିଲାଏନ୍ସ ଇଣ୍ଡଷ୍ଟ୍ରିଜ ପ୍ରତି ଆମେ ଅତ୍ୟନ୍ତ କୃତଜ୍ଞ, ଯାହାଙ୍କ ସହିତ ଗତ କିଛି ବର୍ଷ ଧରି ଏଏଫ୍ଆଇ ଘନିଷ୍ଠ ଭାବରେ କାର୍ଯ୍ୟ କରିବା ସହିତ ତାଙ୍କଠାରୁ ପ୍ରମୁଖ ସହଭାଗୀ ସମର୍ଥନ ପାଇଆସୁଛି। ଆନ୍ତର୍ଜାତିକ କ୍ରୀଡା କାର୍ଯ୍ୟକ୍ରମଗୁଡିକରେ ଆମର ଆଥଲେଟ ସଂଖ୍ୟା ବୃଦ୍ଧି ଆମେ ଲକ୍ଷ୍ୟ କରୁଛୁ ଏବଂ ରିଲାଏନ୍ସ ଇଣ୍ଡଷ୍ଟ୍ରିଜ ଭଳି ଏକ ପ୍ରତିବଦ୍ଧ ସହଭାଗୀଙ୍କୁ ନେଇ ଆମେ ଦୃଢ ନିଶ୍ଚିତ ଯେ ଖୁବଶୀଘ୍ର କ୍ରୀଡାର ବିବିଧ ଶୃଙ୍ଖଳାରେ ଆମର ଅଂଶଗ୍ରହଣରେ ବୃଦ୍ଧି ସହିତ ଆନ୍ତର୍ଜାତିକ ସ୍ତରରେ ଅଧିକ ସଫଳତା ହାସଲ ଆମେ ଦେଖିବାକୁ ଯାଉଛୁ।”
୨୦୧୭ରୁ ରିଲାଏନ୍ସ ଫାଉଣ୍ଡେସନ ତାହାର ରିଲାଏନ୍ସ ଫାଉଣ୍ଡେସନ ଯୁବ କ୍ରୀଡା କାର୍ଯ୍ୟକ୍ରମ ଜରିଆରେ ଆଥଲେଟିକ୍ସର ବିକାଶ କ୍ଷେତ୍ରରେ ନିବେଶ କରିଆସୁଛି ଏବଂ ଏହା ଦେଶର ୫୦ରୁ ଅଧିକ ଜିଲ୍ଲାରେ ୫୫୦୦ ଶିକ୍ଷାନୁଷ୍ଠାନରେ ପହଁଚିପାରିଛି। ୨୦୧୮ରେ ରିଲାଏନ୍ସ ଫାଉଣ୍ଡେସନ ପକ୍ଷରୁ ଓଡ଼ିଶା ସରକାରଙ୍କ ସହିତ ସହଭାଗିତାରେ ଏକ ହାଇ ପରଫରମାନ୍ସ ସେଂଟର ‘ଓଡ଼ିଶା ରିଲାଏନ୍ସ ଫାଉଣ୍ଡେସନ ଆଥଲେଟିକ୍ସ ଏଚପିସି’ ସ୍ଥାପନ କରାଯାଇଛି, ଯେଉଁଠାରୁ ଏକାଧିକ ଜାତୀୟ ଓ ଅନ୍ତର୍ଜାତୀୟ ପଦକ ବିଜେତା ଏବଂ ଜାତୀୟ ରେକର୍ଡଧାରୀ ପ୍ରସ୍ତୁତ ହୋଇଛନ୍ତି। ନିକଟରେ ଏଚ୍ପିସିରୁ ଜ୍ୟୋତି ୟାରାଜୀ (୨୦୨୨ ରାଜ୍ୟଗୋଷ୍ଠୀ କ୍ରୀଡାରେ ଭାରତରୁ ପ୍ରତିନିଧିତ୍ୱ କରୁଥିବା) ଏବଂ ଅମ୍ଳାନ ବୋରଗୋହେନ୍ ଦୀର୍ଘକାଳରୁ ରହିଆସିଥିବା ଜାତୀୟ ରେକର୍ଡ ଭଙ୍ଗ କରିଛନ୍ତି। ଶ୍ରୀମତୀ ନିତା ଏମ୍ ଅମ୍ବାନି ଭାରତର ଅଲିମ୍ପିକ ଅଭିଯାନର ନେତୃତ୍ୱ ନେଉଛନ୍ତି ଏବଂ ଭାରତର ପରବର୍ତ୍ତୀ ପିଢି ପାଇଁ କ୍ରୀଡା ସୁବିଧା ସୁଯୋଗ ଯୋଗାଇଦେବାକୁ ପ୍ରତିବଦ୍ଧ ରହିଛନ୍ତି।
