ଭଦ୍ରକ, ୧୧ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ) -ଭଦ୍ରକ ଜିଲା ତିହିଡି ବ୍ଲକ ଅଧିନ ବିଲଣା ପଞ୍ଚାୟତର ରିଟେଲର ଗୋବର୍ଦ୍ଧନ ବିଶ୍ୱାଳ ରିଟେଲର ମେସିନରେ ଚାଉଳ ପରିମାଣ ଲୋର୍ଡ଼ କରିବା ବେଳେ ସର୍ଭର ଡାଉନ ରହିଥିଲା । ଯାହାଫଳରେ ମେସିନରେ ୧୬ କୁଇଣ୍ଟାଲ ୩୦ କେଜି ଚାଉଳ ଲୋର୍ଡ଼ ହେବା ବେଳେ ୩୨ କୁଇଣ୍ଟାଲ ୬୦ କେଜି ଲୋର୍ଡ଼ ହୋଇ ଯାଇଥିଲା । ଯାହାଫଳରେ ରିଟେଲରଙ୍କୁ ତାଙ୍କ ପାଇବା କୁଟା ୧୬ କୁଇଣ୍ଟାଲ ୩୦ କେଜି ଚାଉଳ ଦିଆନଯାଇ ୧୫ କୁଇଣ୍ଟାଲ ୭୩ କେଜି ବାଦ୍ ଦେଇ ୧ କୁଇଣ୍ଟାଲ ୭ କେଜି ଦିଆଯାଇଥିଲା । ଯାହାଫଳରେ ରିଟେଲର ସମସ୍ତ ହିତାଧିକାରୀଙ୍କୁ ଚାଉଳ ବଣ୍ଟନ କରିନପାରି ଅସୁବିଧାରେ ସମ୍ମୁଖୀନ ହୋଇଥିଲେ । ଏ ସମ୍ପର୍କରେ ରିଟେଲର ଶ୍ରୀ ବିଶ୍ୱାଳ ବ୍ଲକ ଯୋଗାଣ ନିରୀକ୍ଷକଙ୍କୁ ଜଣାଇଥିଲେ ମଧ୍ୟ କୌଣସି ସୁଫଳ ମିଳି ପାରିନଥିଲା । ଯେଉଁଥିପାଇଁ ରିଟେଲର ଶ୍ରୀ ବିଶ୍ୱାଳ ରାଜ୍ୟ ଯୋଗାଣ ମନ୍ତ୍ରୀ, ୫-ଟି ସଚିବ, ଜିଲାପାଳ, ଉପଜିଲାପାଳ, ଜିଲା ଯୋଗାଣ ଅଧିକାରୀ ଓ ବିଡିଓଙ୍କ ଦୃଷ୍ଟି ଆକର୍ଷଣ କରିଥିବା ଜଣାପଡ଼ିଛି । ରିଟେଲର ଶ୍ରୀ ବିଶ୍ୱାଳଙ୍କ ଅଧିନରେ ୪୮ଟି ଅନ୍ତ୍ୟୋଦୟ ଯୋଜନାରେ କାର୍ଡ଼ ରହିଛି । ହିତାଧିକାରୀମାନଙ୍କ ପାଇଁ ପ୍ରତି ମାସ ୧୬ କୁଇଣ୍ଟାଲ ୮୦ କେଜି ଚାଉଳର ଅବଶ୍ୟକତା ଅଛି ।
ତେବେ ୨୦୨୩ ଏପ୍ରିଲ, ମଇ ଓ ଜୁନ୍ ତିନିମାସର ୫୦ କୁଇଣ୍ଟାଲ ୪୦ କେଜି ଚାଉଳ ବଣ୍ଟନ ପାଇଁ ଯୋଗାଣ ବିଭାଗ ପକ୍ଷରୁ ଟ୍ରାଭଲିଂ ଏଜେଣ୍ଟ ଦେବା କଥା । ମାତ୍ର ଟ୍ରାଭଲିଂ ଏଜେଣ୍ଟ ମଇମାସ ୫ ତାରିଖରେ ମଇ ଓ ଜୁନ୍ ୨ମାସର ୧୬ କୁଇଣ୍ଟାଲ ୮୦ କେଜି ଲେଖାଏଁ ୩୩ କୁଇଣ୍ଟାଲ ୬୦ କେଜି ଓ ଏପ୍ରିଲ ମାସର ମାତ୍ର ୧ କୁଇଣ୍ଟାଲ ୭ କେଜି ସହ ମୋଟ ୩୪ କୁଇଣ୍ଟା ୬୭ କେଜି ଚାଉଳ ପଠାଇଥିଲେ । ଏପ୍ରିଲ ମାସର ଗତ ଅଗଷ୍ଟ ୨୦୨୨ରୁ ରହି ଆସୁଥିବା ଭୁଲ୍ ଷ୍ଟକ୍ ୧୫ କୁଇଣ୍ଟାଲ ୭୩ କେଜି ଚାଉଳକୁ ବାଦ୍ କରି ୧ କୁଇଣ୍ଟାଲ ୭ କେଜି ପଠାଇବାରୁ ପ୍ରାୟ ୧୫ଜଣ ହିତାଧିକାରୀ ଚାଉଳ ପାଇବାରୁ ବଂଚିତ ହେଉଛନ୍ତି । ତେବେ ରିଟେଲର ଶ୍ରୀ ବିଶ୍ୱାଳଙ୍କ ପାଖରେ ୧୫ କୁଇଣ୍ଟାଲ ୭୩ କେଜି ଚାଉଳ ଷ୍ଟକ୍ ପୂର୍ବରୁ ନଥିଲା କି ଏବେ ମଧ୍ୟ ନାହିଁ । ତେବେ ଏହି ତ୍ରୁଟିକୁ ୭ଦିନ ମଧ୍ୟରେ ସଂଶୋଧନ କରି ତୁରନ୍ତ ଆବଶ୍ୟକୀୟ ହିତାଧିକାରୀଙ୍କ ପାଇଁ ସଂପୂର୍ଣ୍ଣ ଚାଉଳ ଯୋଗାଇ ଦେବାକୁ ସେ ଦାବି କରିଛନ୍ତି । ନଚେତ ରିଟେଲର ଶ୍ରୀ ବିଶ୍ୱାଳ ବାଧ୍ୟ ହୋଇ ବିଡିଓ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିବେ ବୋଲି ଚେତାବନୀ ଦେଇଛନ୍ତି । ଏ ସମ୍ପର୍କରେ ବ୍ଲକ ଯୋଗାଣ ନିରୀକ୍ଷକ ଅଜୟ କୁମାର ଦାସଙ୍କୁ ପଚାରିବାରୁ ସେ କହିଛନ୍ତି ଯେ, ମେସିନ ତ୍ରୁଟି ହେବାର ବହୁ ବିଳମ୍ବରେ ରିଟେଲର ଜଣାଇଲେ । ସେତେବେଳକୁ ସମସ୍ତ ଡାଟା ଓଡ଼ିଶା ଯୋଗାଣ ବିଭାଗକୁ ଯାଇ ସାରିଥିଲା । ତେବେ ତ୍ରୁଟିର ସଂଶୋଧନ ପାଇଁ ପଦକ୍ଷେପ ନିଆଯିବ ।