ବ୍ଲୁମବର୍ଗ ବିଶ୍ୱ ବ୍ୟବସାୟ ମଂଚରେ ପ୍ରଧାନମନ୍ତ୍ରୀଙ୍କ ଦୀକ୍ଷାନ୍ତ ଭାଷଣ
ନ୍ୟୁୟର୍କ/ନୂଆ ଦିଲ୍ଲୀ ୨୫-୯ (ଓଡ଼ିଆ ପୁଅ) ଆଜି ନ୍ୟୁୟର୍କ ଠାରେ ବ୍ଲୁମବର୍ଗ ବିଶ୍ୱ ବ୍ୟବସାୟ ମଂଚରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଦୀକ୍ଷାନ୍ତ ଅଭିଭାଷଣ ରଖିଛନ୍ତି।
ମାନ୍ୟଗଣ୍ୟ ବ୍ୟକ୍ତିଙ୍କ ଗହଣରେ ଉଦବୋଧନ ଦେଇ ପ୍ରଧାନମନ୍ତ୍ରୀ କହିଥିଲେ ଯେ ଭାରତର ଅଭିବୃଦ୍ଧି କାହାଣୀର ଭବିଷ୍ୟତ ମାର୍ଗ ବିଷୟରେ କହିବା ଲାଗି ସେ ଏହି ଅବସରର ଉପଯୋଗ କରିବାକୁ ଚାହିଁବେ। ପ୍ରଧାନମନ୍ତ୍ରୀ କହିଥିଲେ ଯେ ଭାରତର ଅଭିବୃଦ୍ଧି କାହାଣୀ ୪ଟି ସ୍ତମ୍ଭ ଯଥା ଗଣତନ୍ତ୍ର, ଜନସାଂଖିକୀ, ଚାହିଦା ଓ ନିର୍ଣ୍ଣାୟକ ନିଷ୍ପତି ଉପରେ ଗଢ଼ା ହୋଇଛି।
ଦେଶରେ ରାଜନୈତିକ ସ୍ଥିରତାର ପରିବେଶରୁ ଭାରତୀୟ ଅର୍ଥବ୍ୟବସ୍ଥା ଲାଭାନ୍ୱିତ ହୋଇଛି ବୋଲି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ।
ଆହୁରି ସରକାରଙ୍କ ଦ୍ୱାରା ନିଆଯାଇଥିବା ସଫଳ ସଂସ୍କାରମୂଳକ ପଦକ୍ଷେପକୁ ବିଶ୍ୱସ୍ତରରେ ମାନ୍ୟତା ଦିଆଯାଇଥିବା ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ। ଏହି ପରିପ୍ରେକ୍ଷୀରେ, ଭାରତ ଲଜିଷ୍ଟିକ୍ସ ପ୍ରଦର୍ଶନ ସୂଚକାଙ୍କରେ ୧୦ଟି ମାନ୍ୟତା ଉପରକୁ ଉଠିବା, ବିଶ୍ୱ ପ୍ରତିଦ୍ୱନ୍ଦ୍ୱିତା ସୂଚକାଙ୍କରେ ୧୩ ପଏଂଟ ପାଇ ଉନ୍ନୀତ ହେବା, ବିଶ୍ୱ ନବୋନ୍ମେଷ ସୂଚକାଙ୍କରେ ୨୪ଟି ସ୍ଥାନ ଉପରକୁ ଉଠିବା ସହିତ ବିଶ୍ୱ ବ୍ୟାଙ୍କର ଆକଳନ ଅନୁଯାୟୀ ବ୍ୟବସାୟିକ ସୁଗମତା ମାନ୍ୟତାରେ ୬୫ଟି ସ୍ଥାନ ଉପରକୁ ଉଠିବା ସମ୍ପର୍କରେ ସେ ସୂଚନା ଦେଇଥିଲେ।
ବ୍ଲୁମବର୍ଗ ଜାତୀୟ ବ୍ରାଣ୍ଡ ଟ୍ରାକର ୨୦୧୮ ସର୍ବେକ୍ଷଣରେ ଭାରତକୁ ବୈଶ୍ୱିକ ନିବେଶ ଆକୃଷ୍ଟ କରିବାରେ ଶ୍ରେଷ୍ଠ ଏସୀୟ ଅର୍ଥବ୍ୟବସ୍ଥାର ମାନ୍ୟତା ଦିଆଯାଇଥିବା ସମ୍ପର୍କରେ ମଧ୍ୟ ପ୍ରଧାନମନ୍ତ୍ରୀ କହିଥିଲେ। ୧୦ଟି ସଂକେତକ ମଧ୍ୟରୁ ୭ଟିରେ ଯଥା: ରାଜନୈତିକ ସ୍ଥିରତା, ମୌଦ୍ରିକ ସ୍ଥିରତା, ଉଚ୍ଚ ମାନର ଉତ୍ପାଦ, ଦୁର୍ନୀତିନିରୋଧୀ ବ୍ୟବସ୍ଥା, ସ୍ୱଳ୍ପ ଉତ୍ପାଦନ ବ୍ୟୟ, ରଣନୈତିକ ସ୍ଥାନ ଏବଂ ଆଇପିଆର ପାଇଁ ସମ୍ମାନ ଦେବାରେ ଭାରତ ଶୀର୍ଷ ସ୍ଥାନ ହାସଲ କରିଛି।
ପ୍ରଯୁକ୍ତି ଏବଂ ନବୋନ୍ମେଷ କ୍ଷେତ୍ରରେ ନିବେଶ ଲାଗି ବିଶ୍ୱ ବ୍ୟବସାୟ ସମୁଦାୟ ଭାରତରେ ନିବେଶ କରନ୍ତୁ ବୋଲି ପ୍ରଧାନମନ୍ତ୍ରୀ ନିମନ୍ତ୍ରଣ ଜଣାଇଥିଲେ। ସେ କହିଥିଲେ ସେମାନଙ୍କ ପ୍ରଯୁକ୍ତି ଏବଂ ଭାରତୀୟ ପ୍ରତିଭା ମିଶି ବିଶ୍ୱକୁ ବଦଳାଇପାରିବେ। ସେମାନଙ୍କ ଉଚ୍ଚତା ଓ ଭାରତର ଦକ୍ଷତା ବିଶ୍ୱ ଅର୍ଥନୈତିକ ଅଭିବୃଦ୍ଧିକୁ ତ୍ୱରାନ୍ୱିତ କରିବ।
ଦୀକ୍ଷାନ୍ତ ଭାଷଣ ଦେବା ପରେ ପ୍ରଧାନମନ୍ତ୍ରୀ ବ୍ଲୁମବର୍ଗର ପ୍ରତିଷ୍ଠାତା ମିଃ ମାଇକେଲ ବ୍ଲୁମବର୍ଗଙ୍କ ସହିତ ଆଲୋଚନା ଅଧିବେଶନରେ ଯୋଗ ଦେଇଥିଲେ।