ରାଜନୈତିକ ଶତ୍ରୁତା, ଦୁଇ ପଡୋଶୀ ଆହତ

ଭଦ୍ରକ, ୮ା୭ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଏହି ଜିଲାର ଭଣ୍ଡାରିପୋଖରୀ ଥାନା ଅନ୍ତର୍ଗତ ବାଲିପୋଖରୀ କାଳୀସାହିରେ ଆଜି ଦିନ ପ୍ରାୟ ୧୧ ଟା ସମୟରେ ରାଜନୈତିକ ଶତ୍ରୁତାରୁ ଦୁଇ ପଡୋଶୀଙ୍କ ମଧ୍ୟରେ ଗଣ୍ଡଗୋଳ ହୋଇ୨ଜଣ ଆହତ ହୋଇଥିବା ଜଣାଯାଇଛି। ଏଥିନେଇ ଉଭୟ ପକ୍ଷରୁ ଥାନାରେ ଅଭିଯୋଗ ହୋଇଛି। ଗ୍ରାମର ନିଧିରାମ ସାହୁ ଦିନ ୧୧ ଟା ସମୟରେ ଗାଁ ମୁଣ୍ଡ ଦୋକାନରୁ ଘରକୁ ଫେରୁଥିବା ସମୟରେ ଜଗବନ୍ଧୁ ସାହୁ ଠେଙ୍ଗାରେ ଆକ୍ରମଣ କରିବାକୁ ଧମକ ଦେଇଥିଲା। ପରେ ଘରଲୋକଙ୍କ ସହାୟତାରେ ନିଧିରାମଙ୍କ ମୁଣ୍ଡକୁ ଜଗବନ୍ଧୁ ପଥରରେ ଆଘାତ କରିବାରୁ ନିଧିରାମ ଆହତ ହୋଇ ମେଡିକାଲରେ ଚିକିତ୍ସିତ ହୋଇଛନ୍ତି। ଅନ୍ୟପକ୍ଷରେ ଜଗନ୍ନାଥ ସାହୁ ରାସ୍ତା କଡ ନଳକୂପରେ ଗାଧୋଉଥିବା ବେଳେ ନିଧିରାମ ଆଖି ତରାଯି ଚାହିଥିଲା। ପୂର୍ବରୁ ଶତ୍ରୁତା ଥିବାରୁ ଜଗନ୍ନାଥ ଶଙ୍କାଗ୍ରସ୍ତ ହୋଇ ଏହାର କାରଣ ପଚାରିବାରୁ ନିଧିରାମ ଓ ତାଙ୍କ ପରିବାର ଲୋକେ ମିଶି ଜଗନ୍ନାଥଙ୍କୁ ଆକ୍ରମଣ କରିଥିଲେ। ଫଳରେ ଜଗବନ୍ଧୁ ଆହତ ହୋଇ ଚିକତ୍ସିତ ହେବା ସହ ଥାନାରେ ଅଭିଯୋଗ କରିଥିବା ଜଣାଯାଇଛି।