– କ୍ଷୁଦ୍ର, ମଧ୍ୟମ ଏବଂ ଦୀର୍ଘକାଳୀନ ଯୋଜନା ପ୍ରସ୍ତୁତ କରିବାକୁ ଭାରତ ସରକାରଙ୍କ ଏଜେନ୍ସି ଏବଂ ବିଶେଷଜ୍ଞମାନେ ରାଜ୍ୟ ସରକାରଙ୍କୁ ସାହାଯ୍ୟ କରୁଛନ୍ତି
– ଏନ୍ଡ଼ିଆର୍ଏଫ୍ ଗୋଟିଏ ଦଳ ଏବଂ ଏସ୍ଡ଼ିଆର୍ଏଫ୍ରର ୪ ଟି ଦଳ ଯୋଶୀ ମଠରେ ପହଞ୍ଚିଛନ୍ତି
ପ୍ରଭାବିତ ପରିବାର ଗୁଡିକୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଉଛି
– ସୀମା ପରିଚାଳନା ସଚିବ ଏବଂ ଏନଡିଏମ୍ଏର ସଦସ୍ୟମାନେ ଆସନ୍ତାକାଲି ଉତ୍ତରାଖଣ୍ଡ ପରିଦର୍ଶନ କରି ପରିସ୍ଥିତିର ଆକଳନ କରିବେ
– ଉତ୍ତରାଖଣ୍ଡର ମୁଖ୍ୟ ଶାସନ ସଚିବ ଯୋଶୀ ମଠରୁ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟକୁ ଏସମ୍ପର୍କରେ ସୂଚନା ଦେଇଛନ୍ତି
– ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ, ଜାତୀୟ ବିପର୍ଯ୍ୟୟ ପରିଚାଳନା ସଂସ୍ଥା, ଜିଓଲୋଜିକାଲ୍ ସର୍ଭେ ଅଫ୍ ଇଣ୍ଡିଆ, ଆଇଆଇଟି, ରୁରକି, ୱାଡିଆ ଇନଷ୍ଟିଚ୍ୟୁଟ୍ ଅଫ୍ ହିମାଳୟାନ୍ ଜିଓଲୋଜି, ଜାତୀୟ ଜଳ ବିଜ୍ଞାନ ସଂସ୍ଥା ଏବଂ ସେଂଟ୍ରାଲ୍ ବିଲଡିଂ ରିସର୍ଚ୍ଚ ଇନଷ୍ଟିଚ୍ୟୁଟ୍ର ବିଶେଷଜ୍ଞ ଦଳ ପରିସ୍ଥିତି ଉପରେ ମତାମତ ଦେଇଛନ୍ତି
ନୂଆ ଦିଲ୍ଲୀ ୦୮-୧ (ଓଡ଼ିଆ ପୁଅ) ପ୍ରଧାନମନ୍ତ୍ରୀଙ୍କ ମୁଖ୍ୟ ଶାସନ ସଚିବ ଡଃ. ପି କେ ମିଶ୍ର ଆଜି ୮ ଜାନୁୟାରୀ ୨୦୨୩ ରେ ଯୋଶୀମଠରେ ଘର ଗୁଡିକର ଯେଉଁ କ୍ଷୟକ୍ଷତି ହୋଇଛି ଏବଂ ଏବଂ ଜମିରେ ଯେଉଁ ଫାଟ ସୃଷ୍ଟି ହୋଇଛି, ତାହା ଉପରେ ଏକ ଉଚ୍ଚ ସ୍ତରୀୟ ସମୀକ୍ଷା କରିଥିଲେ। କ୍ୟାବିନେଟ ସଚିବ, ଗୃହ ସଚିବ, ଭାରତ ସରକାରଙ୍କ ବରିଷ୍ଠ ଅଧିକାରୀ ଏବଂ ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣର ସଦସ୍ୟ, ଉତ୍ତରାଖଣ୍ଡ ରାଜ୍ୟର ମୁଖ୍ୟ ସଚିବ ତଥା ଡିଜିପି, ଯୋଶୀ ମଠର ଡିଏମ୍ ଏବଂ ଅଧିକାରୀ, ଉତ୍ତରାଖଣ୍ଡର ବରିଷ୍ଠ ଅଧିକାରୀ, ଆଇଆଇଟି ରୁରକି, ଜାତୀୟ ବିପର୍ଯ୍ୟୟ ପରିଚାଳନା ସଂସ୍ଥା, ଜିଓଲୋଜିକାଲ୍ ସର୍ଭେ ଅଫ୍ ଇଣ୍ଡିଆ, ୱାଡିଆ ଇନଷ୍ଟିଚ୍ୟୁଟ୍ ଅଫ୍ ହିମାଳୟାନ୍ ଜିଓଲୋଜିର ବିଶେଷଜ୍ଞମାନେ ମଧ୍ୟ ଭିସି ମାଧ୍ୟମରେ ଏହି ବୈଠକରେ ଯୋଗ ଦେଇଥିଲେ।
ସୂଚନାଯୋଗ୍ୟ ଯେ ମାନ୍ୟବର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଯୋଶୀ ମଠକୁ ନେଇ ଚିନ୍ତିତ ଅଛନ୍ତି ଏବଂ ମୁଖ୍ୟମନ୍ତ୍ରୀଙ୍କ ସହ ପରିସ୍ଥିତିର ସମୀକ୍ଷା କରିଛନ୍ତି।
ଉତ୍ତରାଖଣ୍ଡର ମୁଖ୍ୟ ଶାସନ ସଚିବ ସୂଚନା ଦେଇଛନ୍ତି ଯେ କେନ୍ଦ୍ରୀୟ ବିଶେଷଜ୍ଞ ମାନଙ୍କ ସହଯୋଗରେ ରାଜ୍ୟ ତଥା ଜିଲ୍ଲା ଅଧିକାରୀମାନେ ସ୍ଥିତିର ମୂଲ୍ୟାଙ୍କନ କରିଛନ୍ତି। ପ୍ରାୟ ୩୫୦ ମିଟର ଚଉଡାରେ ଏକ ଷ୍ଟ୍ରିପ୍ ପ୍ରଭାବିତ ହୋଇଛି ବୋଲି ସେ ସୂଚନା ଦେଇଛନ୍ତି। ଏନ୍ଡିଆର୍ଏଫ୍ର ଗୋଟିଏ ଦଳ ଏବଂ ଏସ୍ଡିଆର୍ଏଫ୍ର ଚାରିଟି ଦଳ ଯୋଶୀ ମଠରେ ପହଞ୍ଚି ସାରିଛନ୍ତି। ଜିଲ୍ଲା ପ୍ରଶାସନ ପ୍ରଭାବିତ ପରିବାର ମାନଙ୍କ ପାଇଁ ଖାଦ୍ୟ, ଆଶ୍ରୟ ଏବଂ ନିରାପତ୍ତା ନିମନ୍ତେ ପର୍ଯ୍ୟାପ୍ତ ବ୍ୟବସ୍ଥା କରିବା ସହିତ ସେମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିବା ନେଇ କାର୍ଯ୍ୟ କରୁଛନ୍ତି। ଏସ୍ପି ଏବଂ ଏସ୍ଡିଆର୍ଏଫ୍ର କମାଣ୍ଡାଂଟ ଘଟଣାସ୍ଥଳରେ ଉପସ୍ଥିତ ଅଛନ୍ତି। ଯୋଶୀ ମଠ ବାସିନ୍ଦାଙ୍କୁ ଘଟଣାକ୍ରମ ବିଷୟରେ ଅବଗତ କରାଯାଉଛି ଏବଂ ସେମାନଙ୍କର ସହଯୋଗ ଲୋଡା ଯାଇଛି। ସ୍ୱଳ୍ପ – ମଧ୍ୟମ – ଦୀର୍ଘ ମିଆଦୀ ଯୋଜନା ପ୍ରସ୍ତୁତ କରିବାକୁ ବିଶେଷଜ୍ଞ ମାନଙ୍କ ପରାମର୍ଶ ନିଆଯାଉଛି।
ଆହୁରି ମଧ୍ୟ, ସୀମା ପରିଚାଳନା ସଚିବ ଏବଂ ଏନ୍ଡିଏଏମ୍ର ସମସ୍ତ ଚାରି ଜଣ ସଦସ୍ୟ ୯ ଜାନୁଆରୀରେ ଉତ୍ତରାଖଣ୍ଡ ଗସ୍ତ କରିବେ। ଯୋଶୀ ମଠରୁ ଏବେ ଫେରିଥିବା ବୈଷୟିକ ଦଳ (ଏନ୍ଡିଏମ୍ଏ, ଏନ୍ଆଇଡିଏମ୍, ଏନଡିଆରଏଫ୍, ଜିଏସ୍ଆଇ, ଏନ୍ଆଇଏଚ୍, ୱାଡିଆ ଇନଷ୍ଟିଚ୍ୟୁଟ୍, ଆଇଆଇଟି ରୁରକି) ଏହା ଉପରେ ଅନୁସନ୍ଧାନ କରି ଯାହା ସୂଚନା ଦେଇଛନ୍ତି, ତାହା ଉପରେ ଏକ ବିସ୍ତୃତ ମୂଲ୍ୟାଙ୍କନ କରିବେ ଏବଂ ରାଜ୍ୟ ସରକାରଙ୍କୁ ପରିସ୍ଥିତିର ସମାଧାନ ପାଇଁ ତୁରନ୍ତ, ସ୍ୱଳ୍ପ – ମଧ୍ୟମ – ଦୀର୍ଘକାଳୀନ କାର୍ଯ୍ୟ ଉପରେ ପରାମର୍ଶ ଦେବେ।
ପ୍ରଧାନମନ୍ତ୍ରୀଙ୍କ ମୁଖ୍ୟ ସଚିବ କହିଛନ୍ତି ଯେ ପ୍ରଭାବିତ ଅଞ୍ଚଳରେ ରହୁଥିବା ଲୋକଙ୍କ ସୁରକ୍ଷା ରାଜ୍ୟ ସରକାରଙ୍କ ପାଇଁ ତତ୍କାଳ ପ୍ରାଥମିକତା ହେବା ଉଚିତ। ପ୍ରଭାବିତ ଲୋକଙ୍କ ସହ ରାଜ୍ୟ ସରକାର ଏକ ସ୍ୱଚ୍ଛ ଏବଂ ନିରନ୍ତର ଯୋଗାଯୋଗ ଚ୍ୟାନେଲ ପ୍ରତିଷ୍ଠା କରିବା ଆବଶ୍ୟକ। ପରିସ୍ଥିତିର ଅବନତିକୁ ବ୍ୟବହାରିକ ପଦକ୍ଷେପ ମାଧ୍ୟମରେ ଯାହା ସମ୍ଭବପର ହୋଇପାରିବ, ତାହା ନିୟନ୍ତ୍ରଣ କରିବା ପାଇଁ ତୁରନ୍ତ ପ୍ରୟାସ ହେବା ଦରକାର। ପ୍ରଭାବିତ ଅଞ୍ଚଳର ଏକ ଆନ୍ତଃ ଅନୁଶାସନାତ୍ମକ ଯାଂଚ କରାଯିବା ଉଚିତ୍। ବିଭିନ୍ନ କେନ୍ଦ୍ରୀୟ ଅନୁଷ୍ଠାନର ବିଶେଷଜ୍ଞମାନେ – ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ (ଏନ୍ଡିଏମ୍ଏ), ଜାତୀୟ ବିପର୍ଯ୍ୟୟ ପରିଚାଳନା ସଂସ୍ଥା (ଏନ୍ଆଇଡିଏମ୍), ଜିଓଲୋଜିକାଲ୍ ସର୍ଭେ ଅଫ୍ ଇଣ୍ଡିଆ (ଜିଏସଆଇ), ଭାରତୀୟ ପ୍ରାଦ୍ୟୋଗିକୀ ସଂସ୍ଥା (ଆଇଆଇଟି) ରୁରକି, ୱାଡିଆ ଇନଷ୍ଟିଚ୍ୟୁଟ୍ ଅଫ୍ ହିମାଳୟାନ୍ ଜିଓଲୋଜି (ଡବ୍ଲ୍ୟୁଆଇଏଚ୍ଜି), ଜାତୀୟ ଜଳ ବିଜ୍ଞାନ ସଂସ୍ଥା (ଏନ୍ଆଇଏଚ୍) ଏବଂ ସେଂଟ୍ରାଲ୍ ବିଲଡିଂ ରିସର୍ଚ୍ଚ ଇନଷ୍ଟିଚ୍ୟୁଟ୍ (ସିବିଆର୍ଆଇ)ର “ସମ୍ପୂର୍ଣ୍ଣ ସରକାର” ଆଭିମୁଖ୍ୟରେ ଉତ୍ତରାଖଣ୍ଡ ରାଜ୍ୟ ସହିତ ମିଳିତ ଭାବରେ କାର୍ଯ୍ୟ କରିବା ଉଚିତ୍।
ଏକ ସ୍ୱଚ୍ଛ ସମୟ ସୀମା ପୁନଃନିର୍ମାଣ ଯୋଜନା ପ୍ରସ୍ତୁତ ହେବା ଜରୁରୀ। କ୍ରମାଗତ ଭୂକମ୍ପର ନିରୀକ୍ଷଣ ହେବା ଜରୁରୀ। ଏହି ସୁଯୋଗକୁ ବ୍ୟବହାର କରି ଯୋଶୀ ମଠ ପାଇଁ ଏକ ବିପର୍ଯ୍ୟୟ ସମ୍ବେଦନଶୀଳ ସହରୀ ବିକାଶ ଯୋଜନା ମଧ୍ୟ ପ୍ରସ୍ତୁତ କରାଯିବା ଉଚିତ୍।
