ବଲାଙ୍ଗୀର, ୧୯-୧୦ (ଓଡ଼ିଆ ପୁଅ/ସନ୍ତୋଷ ନାୟକ) ବଲାଙ୍ଗିର ଜିଲ୍ଲା କଣ୍ଟାବାଞ୍ଜି ପୋଲିସକୁ ମିଳିଛି ଏକ ବଡ଼ ସଫଳତା। ଦୀର୍ଘ ଦିନ ହେଲା କଣ୍ଟାବାଞ୍ଜି ଥାନା ସହ ଆଖପାଖ ଥାନାରେ ଅଞ୍ଚଳରୁ ମୋଟର ସାଇକେଲ ଚୋରି କରୁଥିବା ଏକ ରାକେଟକୁ ପୋଲିସ ଗିରଫ କରିବାରେ ସଫଳ ହୋଇଛି। ଏହା ସହ ୭ଟି ମୋଟର ସାଇକେଲ ଉଦ୍ଧାର କରାଯାଇଛି। ଏନେଇ ସନ୍ଧ୍ୟା ସମୟରେ କଣ୍ଟାବାଞ୍ଜି ଥାନା ଅଧିକାରୀ ଏକ ସାମ୍ବାଦିକ ସମ୍ମିଳନି ର ଆୟୋଜନ କରିଥିଲେ। ସମ୍ମିଳନୀରେ ଏସଆଇ ପ୍ରଦୀପ କୁମାର ଗୁରିଆ, ଏଏସଆଇ ପଞ୍ଚାନନ୍ଦ ଖୁଆସ ପ୍ରମୁଖ ଉପସ୍ଥିତ ଥିଲେ।
ପୋଲିସ ସୂତ୍ରରୁ ମିଳିଥିବା ସୂଚନା ଅନୁସାରେ କଣ୍ଟାବାଞ୍ଜି ଥାନା ଅଂଚଳରୁ ୨ଟି ମୋଟର ସାଇକେଲ, ମୁରିବାହାଲ ଥାନା ଅଂଚଳରୁ ୨ଟି ତୁରେକେଲା ଥାନା ଅଂଚଳରୁ ୧ ଟି, ବେଲପଡ଼ା ଥାନା ଅଂଚଳରୁ ଗୋଟିଏ ମୋଟର ସାଇକେଲ ଚୋରି ହୋଇଥିଲା। ଅନ୍ୟ ଏକ ମୋଟର ସାଇକେଲ ଛତିଶଗଡ ଅଂଚଳର ବୋଲି ଜଣାପଡ଼ିଥିବା ବେଳେ କେଉଁ ଥାନାରେ ଅଭିଯୋଗ ହୋଇଛି ପୋଲିସ ତଦନ୍ତ ଜାରି ରଖିଛି। ତେବେ କଣ୍ଟାବାଞ୍ଜି ଏସଡିପିଓ ସରୋଜ କୁମାର ମାହାପତ୍ରଙ୍କ ନେତୃତ୍ବରେ ମୋଟର ସାଇକେଲ ଚୋରଙ୍କୁ ଗିରଫ କରିବାକୁ ଏକ ସ୍ୱତନ୍ତ୍ର ଦଳ ଗଠନ କରାଯାଇଥିଲା। ଏହି ଦଳ ବିଭିନ୍ନ ସ୍ଥାନରେ ଚଢଉ କରି ଚୋରମାନଙ୍କୁ ଗିରଫ କରିବାରେ ସଫଳ ହୋଇଛି। ସେହିପରି ଏହି ରେକେଟ ର ସବିଶେଷ ତଦନ୍ତ ଜାରି ରହିବ ଓ ଅନ୍ୟ ସମ୍ପୃକ୍ତ ଅଭିଯୁକ୍ତ ଙ୍କୁ ଗିରଫ କରି କାର୍ଯ୍ୟାନୁଷ୍ଠାନ ଗ୍ରହଣ କରିବା ସୂଚନା ଦିଆଯାଇଛି।