ମହିଳାଙ୍କୁ ବଳାତ୍କାର ଉଦ୍ୟମ

ହାଟଡିହି-୩୧/୭: (ଓଡିଆପୁଅ / ବିକାଶ ବିଶ୍ୱାଳ)କେନ୍ଦୁଝର ଜିଲ୍ଲା ନନ୍ଦିପଦା ଥାନା ଅଧିନସ୍ଥ ବରାଙ୍ଗ ବଜାରରେ ଜଣେ ନିରାଶ୍ରୟ ମହିଳାଙ୍କୁ ବଳାତ୍କାର ଉଦ୍ୟମ ହୋଇଥିବା ଅଭିଯୋଗ ହୋଇଛି । ଅଭିଯୋଗରୁ ଜଣାଯାଇଛି ଯେ ଶାଳଣିଆଁ ମନୋହରପୁର ଅଞ୍ଚଳର ଗୋଟିଏ ଦମ୍ପତ୍ତି ଭିକ୍ଷା ମାଗିବାକୁ ବରାଙ୍ଗ ଅଞ୍ଚଳରେ ବୁଲୁଥିଲେ । ଗତକାଲି ରାତି ହୋଇଯିବାରୁ ସେମାନେ ସେହି ବଜାର ନିକଟରେ ଆଶ୍ରୟ ନେଇଥିଲେ । ମହିଳାଙ୍କ ସ୍ୱାମୀ ଜଣେ ମଧ୍ୟପ ହୋଇଥିବାରୁ ଏହାର ସୁଯୋଗନେଇ ସେଠାରେ ଚୋରାମଦ ବିକ୍ରୀ କରୁଥିବା ବ୍ୟକ୍ତିଜଣକ ମହିଳାଙ୍କ ସ୍ୱାମୀକୁ ମଦ ପିଇବାକୁ ଦେଇଥିଲା । ସ୍ୱାମୀ ମଦ ନିଶାରେ ବେହୋସ ହୋଇଯିବାପରେ ମଦବେପାରୀ ଜଣକ ତାର ସ୍ତ୍ରୀକୁ ବଳାତ୍କାର ଉଦ୍ୟମ କରିଥିଲା । ଏହାଦେଖି ମହିଳା ଜଣକ ଚିତ୍କାର କରିବାରୁ ଆଖପାଖର କିଛି ପିଲା ପହଞ୍ଚି ଯିବାରୁ ଚୋରା ମଦବେପାରୀ ଜଣକ ମହିଳାଙ୍କୁ ଛାଡି ଛୁ ମାରିଥିଲା । ଏନେଇ ମହିଳା ଜଣକ ଗତକାଲି ରାତିରେ ନନ୍ଦିପଦା ଥାନାରେ ଅଭିଯୋଗ କରିଥିଲେ । ଅଭିଯୋଗ ପାଇବାପରେ ନନ୍ଦିପଦା ପୁଲିସ ଆଜି ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ଏହାକୁନେଇ ବରାଙ୍ଗ ଛକରେ ତୀବ୍ର ଉତ୍ତେଜନା ପ୍ରକାଶ ପାଇଛି ।