ମତ୍ସ୍ୟଜୀବୀମାନଙ୍କ ପାଇଁ ୨୦ହଜାର କୋଟିର ଯୋଜନା ଘୋଷଣା – ୫୫ ଲକ୍ଷ ବ୍ୟକ୍ତିଙ୍କ ରୋଜଗାର ସୃଷ୍ଟି ହେବ

ନୂଆଦିଲ୍ଲୀ ୧୫-୫ (ଓଡ଼ିଆ ପୁଅ) : ଶୁକ୍ରବାର ଦିନ କେନ୍ଦ୍ର ସରକାର ପ୍ରଧାନ ମନ୍ତ୍ରୀ ମତ୍ସ୍ୟ ସମ୍ପଦ ଯୋଜନା (PMMSY) ମାଧ୍ୟମରେ ମତ୍ସ୍ୟଜୀବୀଙ୍କ ପାଇଁ ୨୦, ୦୦୦ କୋଟି ଟଙ୍କା ଆବଣ୍ଟନ କରିଛି। ଭାରତର ଅର୍ଥନୀତିକୁ ନବୀକରଣ କରିବାରେ ଏହା କେନ୍ଦ୍ର ସରକାରଙ୍କ ଅର୍ଥନୈତିକ ପ୍ୟାକେଜର ଏକ ଅଂଶ। ଏହି ଯୋଜନା ମାଧ୍ୟମରେ ମତ୍ସ୍ୟଜୀବୀ ମାନଙ୍କର ଅନେକ ଆବଶ୍ୟକତା ପୂରଣ ହୋଇପାରିବ। ସାମୁଦ୍ରିକ ଏବଂ ଆଭ୍ୟନ୍ତରୀଣ ମତ୍ସ୍ୟଚାଷର ସମନ୍ୱିତ, ନିରନ୍ତର, ଅନ୍ତର୍ଭୂକ୍ତ ବିକାଶ ପାଇଁ ସରକାର PMMSY ଆରମ୍ଭ କରିବେ ବୋଲି ଅର୍ଥ ମନ୍ତ୍ରଣାଳୟ କହିଛି। ୨୦, ୦୦୦ କୋଟିରୁ ୧୧, ୦୦୦ କୋଟି ଟଙ୍କା ସାମୁଦ୍ରିକ, ଆଭ୍ୟନ୍ତରୀଣ ମତ୍ସ୍ୟପାଳନ ପାଇଁ ରଖାଯାଇଛି। ଏହି ସମୟରେ, ବାକି ୯, ୦୦୦ କୋଟି ଟଙ୍କା ମତ୍ସ୍ୟ ବନ୍ଦର, ଶୀତଳ ଭଣ୍ଡାର ଏବଂ ବଜାର ଭଳି ଭିତ୍ତିଭୂମି ସୃଷ୍ଟି ପାଇଁ ରଖାଯାଇଛି। କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ସାମ୍ବାଦିକ ସମ୍ମିଳନୀରେ ଏହା କହିଛନ୍ତି ଯେ କେଜ୍-କଟର, ସାମୁଦ୍ରିକ ମତ୍ସ୍ୟଚାଷ, ପାରମ୍ପରିକ ମତ୍ସ୍ୟଜୀବୀ ତଥା ନୂତନ ମତ୍ସ୍ୟଜୀବୀଙ୍କ ପାଇଁ ଭେସେଲ୍ସ ଏବଂ ସେମାନଙ୍କର ଅନୁସନ୍ଧାନ ଯୋଗ୍ୟତା ଭଳି କିଛି ପ୍ରମୁଖ କାର୍ଯ୍ୟକଳାପ ଏହା ସାହାଯ୍ୟରେ ଉପକୃତ ହେବେ। ଭିତ୍ତିଭୂମିର ଏହି ବୃଦ୍ଧି ଦ୍ୱାରା ଆସନ୍ତା ପାଞ୍ଚ ବର୍ଷ ମଧ୍ୟରେ ୭୦ ଲକ୍ଷ ଟନ୍ ଅତିରିକ୍ତ ମାଛ ଉତ୍ପାଦନ ହେବାର ସମ୍ଭାବନା ରହିଛି ବୋଲି ସରକାର ଆଶା କରାଯାଉଛି। ମତ୍ସ୍ୟଜୀବୀଙ୍କ ବ୍ୟକ୍ତିଗତ ବୀମା ଏବଂ ସେମାନଙ୍କ ଡଙ୍ଗାର ବୀମା ଉପରେ ମଧ୍ୟ ସରକାର ଆଲୋଚନା କରୁଛନ୍ତି ଯାହା ଲକଡାଉନ୍ ପରେ ସେମାନଙ୍କୁ ସହାୟକ ହେବ। ଅଧିକନ୍ତୁ, ଏହି ପ୍ରୟାସ ଦ୍ୱାରା ପ୍ରାୟ ୫୫ ଲକ୍ଷ ବ୍ୟକ୍ତିଙ୍କ ରୋଜଗାର ସୃଷ୍ଟି ହେବ ବୋଲି ଅର୍ଥ ମନ୍ତ୍ରଣାଳୟ ଆକଳନ କରିଛି। ଏହା ରପ୍ତାନିକୁ ଦ୍ୱିଗୁଣିତ କରି ୧, ୦୦, ୦୦୦ କୋଟି ଟଙ୍କା ହେବ ବୋଲି କେନ୍ଦ୍ର କହିଛି।