ନୂଆ ଦିଲ୍ଲୀ ୨୩-୭ (ଓଡ଼ିଆ ପୁଅ) ମିଳିତ ଜାତିସଂଘର ସ୍ୱାସ୍ଥ୍ୟ ଏଜେନ୍ସି ମଙ୍କିପକ୍ସକୁ ‘ବିଶ୍ୱ ସ୍ୱାସ୍ଥ୍ୟ ସଂକଟ’ ପରିସ୍ଥିତି ଘୋଷଣା କରିଛନ୍ତି। ଏହା ଘୋଷଣା କରିବା ଅର୍ଥ ହେଉଛି ମଙ୍କିପକ୍ସ ବିସ୍ଫୋରଣ ଏକ “ଅସାଧାରଣ ଘଟଣା” ଯାହାକି ଅଧିକ ଦେଶରେ ବିସ୍ତାର ହୋଇପାରେ ଏବଂ ଏକ ସମନ୍ୱିତ ବିଶ୍ୱ ସ୍ତରୀୟ ପ୍ରତିକ୍ରିୟା ଆବଶ୍ୟକ କରେ। WHO ପୂର୍ବରୁ ‘ବିଶ୍ୱ ସ୍ୱାସ୍ଥ୍ୟ ସଂକଟ’ ଭାବରେ COVID-୧୯ ମହାମାରୀ, ୨୦୧୪ ପଶ୍ଚିମ ଆଫ୍ରିକୀୟ ଇବୋଲା ବିସ୍ତାର, ୨୦୧୬ ରେ ଲାଟିନ୍ ଆମେରିକାରେ ଜାଇକା ଜୀବାଣୁ ଏବଂ ପୋଲିଓ ବିଲୋପ ପାଇଁ ଜାରି କରିଥିଲା। ବିଶ୍ୱ ସ୍ୱାସ୍ଥ୍ୟ ସଂଗଠନ କହିଛି ଯେ ୭୦ ରୁ ଅଧିକ ଦେଶରେ ବିସ୍ତାରିତ ମଙ୍କିପକ୍ସ ବିସ୍ତାର ଏକ “ଅସାଧାରଣ” ପରିସ୍ଥିତି ଯାହା ବର୍ତ୍ତମାନ ବିଶ୍ୱର ‘ବିଶ୍ୱ ସ୍ୱାସ୍ଥ୍ୟ ସଂକଟ’ ଭାବରେ ମୁଣ୍ଡ ଟେକିଛି।
WHO ର ଜରୁରୀକାଳୀନ କମିଟିର ସଦସ୍ୟଙ୍କ ମଧ୍ୟରେ ସହମତି ଅଭାବ ସତ୍ତ୍ୱେ WHO ମହାନିର୍ଦ୍ଦେଶକ ଟେଡ୍ରୋସ୍ ଆଡାନୋମ୍ ଗେବ୍ରେଏସ୍ ଘୋଷଣା କରିବାକୁ ନିଷ୍ପତ୍ତି ନେଇଛନ୍ତି। ଏହା ପ୍ରଥମ ଥର ପାଇଁ U.N. ସ୍ୱାସ୍ଥ୍ୟ ଏଜେନ୍ସି ଏଭଳି ପଦକ୍ଷେପ ନେଇଛି।
ସଂକ୍ଷେପରେ, କହିବାକୁ ଗଲେ, ଯେଉଁ ରୋଗର ବିସ୍ତାର ଧାରା ମାଧ୍ୟମରେ ଦ୍ରୁତ ଗତିରେ ସାରା ବିଶ୍ୱରେ ବ୍ୟାପିଥାଏ ଏବଂ ଯାହା ଆନ୍ତର୍ଜାତୀୟ ସ୍ୱାସ୍ଥ୍ୟ ନିୟମର ମାନଦଣ୍ଡ ପୂରଣ କରିଥାଏ ତାହାକୁ ଏହି ପରି ବିଶ୍ୱ ସ୍ୱାସ୍ଥ୍ୟ ସଂଙ୍କଟ ଭାବରେ ଘୋଷଣା କରାଯାଇଥାଏ। ଅବଶ୍ୟ ଏହା ଏକ ସହଜ କିମ୍ବା ସରଳ ପ୍ରକ୍ରିୟା ନୁହେଁ ଏବଂ ଏହି ଘୋଷଣା ପୂର୍ବରୁ କମିଟିର ସଦସ୍ୟଙ୍କ ମଧ୍ୟରେ ଭିନ୍ନ ମତ ରହିଥିଲା।