ଭଦ୍ରକରେ ମିଶନ ଶକ୍ତି କର୍ମଶାଳା ଅନୁଷ୍ଠିତ

ଭଦ୍ରକ, ୨୭ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ) – ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସ୍ଲୋଗାନ ‘ଗାଁକୁ କାମ, ମା’ କୁ ସମ୍ମାନ’ ଆହ୍ୱାନରେ ରାଜ୍ୟତମାମ ମିଶନ ଶକ୍ତି ଗଢିଉଠିଛି । ଏହାଦ୍ୱାରା ନାରୀ କିପରି ସ୍ୱାବଲମ୍ବୀ ଓ ସଶକ୍ତ ହୋଇପାରିବେ, ତାହା ଉପରେ ସର୍ବଦା ମିଶନ ଶକ୍ତିର ମୁଖ୍ୟ ସୁଜାତା ପାଣ୍ଡିଆନ ଗୁରୁତ୍ୱ ଦେଇଆସୁଛନ୍ତି । ଏବଂ ଏହା କିପରି ଭଦ୍ରକରେ ଅଧିକ ବ୍ୟାପକ ହୋଇପାରିବ, ସେଥିନେଇ ଏକ କର୍ମଶାଳା ପୌରାଞ୍ଚଳର ଚନ୍ଦନବଜାର ୨୦ ନଂ ୱାର୍ଡରେ ଅନୁଷ୍ଠିତ ହୋଇଯାଇଛି । ଭଦ୍ରକର ଯୁବନେତା ଜ୍ୟୋତିପ୍ରକାଶ ମହାନ୍ତିଙ୍କ ଦ୍ୱାରା ଆୟୋଜିତ ଏହି କାର୍ଯ୍ୟକ୍ରମରେ ଜଗନ୍ନାଥପୁର ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆର ଶାଖା ପରିଚାଳକ ସଂଜୟ ଦାସ, ବରିଷ୍ଠ ଆଇନ୍‌ଜୀବୀ ବିଷ୍ଣୁମୋହନ ମହାପାତ୍ର, ସିଆରପି ମନୋରମା ବିଶ୍ୱାଳ, ଯୁବ ସମାଜସେବୀ ଅସିତ୍ ମୁନ୍ନା ଖୁଣ୍ଟିଆ ଓ ଜିତେନ୍ଦ୍ର ମହାୱାରଙ୍କ ସମେତ ଶତାଧିକ ମହିଳା ମା’ମାନେ ଯୋଗ ଦେଇଥିଲେ । ଏହି କାର୍ଯ୍ୟକ୍ରମ ଦ୍ୱାରା ମହିଳାମାନେ ଅଧିକ ସୂଚନା ପାଇବା ସହିତ କିଭଳି ଆଗକୁ ବଢିପାରିବେ ଉପସ୍ଥିତ ବକ୍ତାମାନେ ମତ ରଖିଥିଲେ ।