ବିହାରରେ ଆଇସିଏଚଆରର ତ୍ରିଦିବସୀୟ ଦ୍ୱାଦଶ ମହାଧିବେଶନରେ ଯୋଗଦେଲେ କେନ୍ଦ୍ରମନ୍ତ୍ରୀ
– ଅଧିବେଶନରେ ଅଂଶଗ୍ରହଣ କରିଥିବା ଓଡ଼ିଶାର ଭାଇ ଭଉଣୀଙ୍କୁ ଭେଟିଲେ କେନ୍ଦ୍ରମନ୍ତ୍ରୀ
– ଦେଶର ଗୌରବ ବଢାଇବା ସହ ସମଗ୍ର ବିଶ୍ୱର ଦାୟିତ୍ୱ ନେବା ଆମର କର୍ତ୍ତବ୍ୟ
– ଆଇସିଏଚଆର ମହାଧିବେଶନରୁ ଉତ୍ପନ୍ନ ମୂଲ୍ୟବାନ ଚିନ୍ତାଧାରା ଗୁଡ଼ିକ ଦେଶକୁ ଦିଗଦର୍ଶନ ଦେବ
– ଅମୃତ କାଳରେ ଅଖିଳ ଭାରତୀୟ ଇତିହାସ ସଂକଳନ ଦ୍ୱାରା ପୁନଃ ପ୍ରକାଶିତ କରାଯାଉଥିବା ୭୫ଟି ପୁରୁଣା ପୁସ୍ତକକୁ ସବୁ ଭାରତୀୟ ଭାଷାରେ ଅନୁବାଦ କରିବା ପାଇଁ ଦେଲେ ପରାମର୍ଶ
ସାସାରାମ, ଡିସେମ୍ବର ୨୭ – ଆମକୁ କେବଳ କଥା, କାହାଣୀ ଏବଂ ଲୋକବିଶ୍ୱାସ ଉପରେ ନୁହଁ ବରଂ ବୈଜ୍ଞାନିକ ପଦ୍ଧତି ଏବଂ ପ୍ରମାଣ ଆଧାରରେ ମନୁଷ୍ୟର ଆଦି ସଂସ୍କୃତି-ସଭ୍ୟତାକୁ ଏକବିଂଶ ଶତାବ୍ଦୀରେ ନୂଆ ବୈଶ୍ୱିକ ପରିଚୟ ଦେବାକୁ ପଡିବ ବୋଲି କହିଛନ୍ତି କେନ୍ଦ୍ର ଶିକ୍ଷା ଓ ଦକ୍ଷତା ବିକାଶ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ।
ମଙ୍ଗଳବାର ବିହାରର ସାସାରାମ ସ୍ଥିତ ଗୋପାଳ ନାରାୟଣ ସିଂହ ବିଦ୍ୟାଳୟ ପରିସରରେ ଭାରତୀୟ ଇତିହାସ ଅନୁସନ୍ଧାନ ପରିଷଦ (ଆଇସିଏଚଆର) ଏବଂ ଅଖିଳ ଭାରତୀୟ ଇତିହାସ ସଂକଳନ ଯୋଜନାର ମିଳିତ ଆନୁକୂଲ୍ୟରେ ଆୟୋଜିତ ତ୍ରିଦିବସୀୟ ଦ୍ୱାଦଶ ମହାଧିବେଶନ ଏବଂ ରାଷ୍ଟ୍ରୀୟ ଆଲୋଚନାଚକ୍ରରେ ଯୋଗଦେଇ ଶ୍ରୀ ପ୍ରଧାନ ଏହା କହିଛନ୍ତି। ସେ କହିଛନ୍ତି ଯେ ଭାରତର କେନ୍ଦ୍ରରେ ଆୟୋଜିତ ଏହି ମହାଧିବେଶନରେ ଦେଶର ଚତୁଃପାର୍ଶ୍ୱରୁ ଦେଶର ମୂଳ ବିଷୟ ଉପରେ ଚିନ୍ତନ କରୁଥିବା ଲୋକମାନେ ଏକାଠୀ ହୋଇଛନ୍ତି। ବସୁଧୈବ କୁଟୁମ୍ବକମ ଉପରେ ବିଶ୍ୱାସ ରଖୁଥିବା ଭାରତ ମାନବିକତାର ସମକକ୍ଷ। ଏହି କାର୍ଯ୍ୟକ୍ରମରୁ ଉତ୍ପନ୍ନ ମୂଲ୍ୟବାନ ଚିନ୍ତାଧାରା ଗୁଡ଼ିକ ଆଗାମୀ ଦିନରେ ଦେଶକୁ ଦିଗଦର୍ଶନ ଦେବ।
ଅମୃତ କାଳରେ ଅଖିଳ ଭାରତୀୟ ଇତିହାସ ସଂକଳନ ଦ୍ୱାରା ୭୫ ପୁରୁଣା ପୁସ୍ତକକୁ ନୂଆ ରଚନା ସହ ପୁନଃ ପ୍ରକାଶିତ କରାଯାଉଛି। ଏହି ପୁସ୍ତକ ଗୁଡ଼ିକ ଭାରତର ବୌଦ୍ଧିକ ଜଗତକୁ ସ୍ପଷ୍ଟତା ଦେବ। ଏହି ପୁସ୍ତକକୁ ଭାରତର ସବୁ ଭାଷାରେ ଅନୁବାଦ କରି ଡିଜିଟାଲ ମାଧ୍ୟମରେ ଉପଲବ୍ଧ କରିବା ପାଇଁ ସେ ଆଇସିଏଚଆର ଏବଂ ନ୍ୟାସନାଲ ବୁକ୍ ଟ୍ରଷ୍ଟକୁ ପରାମର୍ଶ ଦେଇଛନ୍ତି। ସେ କହିଛନ୍ତି ଯେ ଆମର ଶିକ୍ଷା ଏବଂ ଇତିହାସ ହେଉଛି ଭାରତର ସବୁଠୁ ବଡ ପୁଞ୍ଜି। ଆମର ଦାୟିତ୍ୱ କେବଳ ଦେଶର ଗୌରବ ବଢାଇବା ନୁହେଁ ବରଂ ସମଗ୍ର ବିଶ୍ୱର ଦାୟିତ୍ୱ ନେବା ଆମର କର୍ତ୍ତବ୍ୟ। ରାଷ୍ଟ୍ରୀୟ ଶିକ୍ଷା ନୀତି ଆମକୁ ଅନେକ ସୁଯୋଗ ଦେଉଛି। ଆଜି ଭାରତରେ ମାତୃଭାଷାକୁ ପ୍ରାଥମିକତା ଦେବା ସହ ପାଠପଢା ପାଇଁ ୨୦୦ ଟିଭି ଚ୍ୟାନେଲ, ଡିଜିଟାଲ ବିଶ୍ୱବିଦ୍ୟାଳୟ ଭଳି ପ୍ରୟାସ ହେଉଛି। ଇତିହାସକାରଙ୍କୁ ଏଥିପାଇଂ ଜ୍ଞାନବର୍ଦ୍ଧନ ଓ ବୌଜ୍ଞାନିକ ବିଷୟବସ୍ତୁ ପ୍ରସ୍ତୁତ କରିବାକୁ ହେବ।
ଭାରତରେ ପ୍ରଥମ ଥର ଜି୨୦ ଆୟୋଜନ ହେଉଛି। ଏହା ଆମକୁ ଆମର ଐତିହ୍ୟକୁ ବିଶ୍ୱ ସାମ୍ନାରେ ରଖିବା ପାଇଁ ସୁବର୍ଣ୍ଣ ସୁଯୋଗ ଦେଉଛି। ଆମକୁ ଭାରତ ଜି ୨୦କୁ ଉତ୍ସବ ଭାବରେ ପରିଣତ କରିବା ପାଇଁ ପଡିବ। କଳା, ସଂସ୍କୃତି ଓ ସଭ୍ୟତାର ଐତିହ୍ୟକୁ ତର୍କ, ଲେଖା ଓ ଆଲୋଚନା ମାଧ୍ୟମରେ ବିଶ୍ୱ ସାମ୍ନାରେ ଉପସ୍ଥାପନ କରିବା ପାଇଁ ପଡ଼ିବ। ତେଣୁ ଏଥିରେ ସମସ୍ତେ ସହଭାଗୀ ହେବା ପାଇଁ ଅପିଲ୍ କରିଛନ୍ତି କେନ୍ଦ୍ରମନ୍ତ୍ରୀ।
ଉଲ୍ଲେଖନୀୟ ଯେ, ଏହି ଅଧିବେଶନରେ ଅଂଶଗ୍ରହଣ କରିଥିବା ଓଡ଼ିଶାର ଲୋକମାନଙ୍କୁ ଶ୍ରୀ ପ୍ରଧାନ ଭେଟି ଖୁସିବ୍ୟକ୍ତ କରିଥିଲେ।