ବାଇକ ଦୁର୍ଘଟଣାରେ ଯୁବକଙ୍କ ମୃତ୍ୟୁ

ହାଟଡ଼ିହି, ୨୭ । ୬ : ହାଟଡିହି ବ୍ଲକ ବରାଙ୍ଗ ନସିରିପୁର ରାସ୍ତାରେ ଏକ ବାଇକ ଦୁର୍ଘଟଣାରେ ଜଣେ ଯୁବକଙ୍କ ମୃତ୍ୟୁ ହୋଇଥିବାବେଳେ ଦୁଇଜଣ ଗୁରୁତର ଆହତ ହୋଇ ଡାକ୍ତରଖାନାରେ ଭର୍ତ୍ତି ହୋଇଛନ୍ତି । ଖବରରୁ ଜଣାଯାଇଛି ଯେ ଗତକାଲି ରାତିରେ ଅଢ଼େଇଦ୍ୱାର ଗ୍ରାମର ଅନାଥ ଦାସଙ୍କ ପୁଅ ସରୋଜ କୁମାର ଦାସ (୩୮) ନାମକ ଜଣେ ଯୁବକ ଜଣେ ସାଙ୍ଗ ପିଲାଙ୍କସହ ରାତି ୯ଟାବେଳେ ନସିରିପୁର ଗ୍ରାମକୁ ଯାଉଥିବା ବେଳେ ରାସ୍ତାରେ ଠିଆ ହୋଇଥିବା ଏକ ଷଣ୍ଢ ସହିତ ତାଙ୍କର ବାଇକର ଧକ୍କା ହୋଇଥିଲା । ଫଳରେ ଦୁଇଜଣ ଯାକ ଗୁରୁତର ଆହତ ହୋଇ ରାସ୍ତାରେ ଛିଟିକି ପଡିଥିବାବେଳେ ସ୍ଥାନୀୟ ଲୋକମାନେ ସେମାନଙ୍କୁ ଉଦ୍ଧାର କରି ପ୍ରଥମେ ଭଦ୍ରକ ଡାକ୍ତରଖାନାକୁ ନେଇଯାଇଥିଲେ । ସରୋଜଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ଆଜି ସକାଳେ କଟକ ସ୍ଥାନାନ୍ତର କରାଯାଇଥିଲା । ମାତ୍ର ସେଠାରେ ଚିକିତ୍ସାଧିନ ଅବସ୍ଥାରେ ସରୋଜଙ୍କ ମୃତ୍ୟୁ ଘଟିଛି । ଏ ଖବର ପ୍ରଚାରିତ ହୋଇଯିବାପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି । ଆଜି ସନ୍ଧ୍ୟାରେ ତାଙ୍କ ବାସଭବନରେ ଶହଶହ ଲୋକଙ୍କ ଭିଡ ଜମିଥିଲା । ସେ ଜଣେ ଭଲ ବ୍ୟବସାୟୀ ହୋଇଥିବାବେଳେ ପରୋପକାରୀ ଯୁବକ ଭାବେ ଜଣାଶୁଣା ଥିଲେ । ଅନ୍ୟ ଆହତ ଜଣକ ଭଦ୍ରକରେ ଚିକିତ୍ସିତ ହେଉଥିବା ଜଣାଯାଇଛି ।