ପୂର୍ବ ବିବାଦକୁ ନେଇ ସଂଘର୍ଷ, ଗାଡି ଭଙ୍ଗାରୁଜା, ୮ ଆହତ

ହାଟଡ଼ିହି-ନନ୍ଦିପଦା ଥାନା ତେମଳା ଗ୍ରାମରେ ଆଜି ରାତିରେ ପୂର୍ବ ବିବାଦକୁ ନେଇ ଦୁଇ ପରିବାର ମଧ୍ୟରେ ସଂଘର୍ଷ ଘଟିଥିବା ଜଣା ଯାଇଛି। ଫଳରେ ୮ଜଣ ଆହତ ହୋଇଥିବା ସୂଚନା ମିଳିଛି। ଚନ୍ଦ୍ରଶେଖର ଜେନାଙ୍କ ପରିବାର ଓ ଅଧର ବେହେରାଙ୍କ ପରିବାର ମଧ୍ୟରେ ପୂର୍ବରୁ ବିବାଦ ଲାଗିରହିଥିବା ବେଳେ ଆଜି ସନ୍ଧ୍ୟାରେ ଏହା ଉଗ୍ର ରୂପ ଧାରଣ କରିଥିଲା। ବେହେରା ପରିବାର ଲୋକମାନେ ସଂଗବଦ୍ଧ ହୋଇ ଜେନା ପରିବାର ଉପରେ ଆକ୍ରମଣ କରିଥିଲେ। ଫଳରେ ଜେନା ପରିବାରର ଚନ୍ଦ୍ରଶେଖର ଜେନା, ରମେଶ ଚନ୍ଦ୍ର ଜେନା, ଚିତ୍ତରଞ୍ଜନ ଜେନା, ରିକିନା ଜେନା, କାଜଲ ଜେନା, ସଂଗ୍ରାମ କେଶରୀ ଜେନାଙ୍କ ସମେତ ୭ଜଣ ଆହତ ହୋଇଥିବା ବେଳେ ୩ଟି ବାଇକ ଭଙ୍ଗାରୁଜା ହୋଇଛି। ଜେନା ପରିବାରର ଘରର କାଚ ସବୁ ଭାଙ୍ଗିଦେଇଛନ୍ତି। ବେହେରା ପରିବାରର ମଧ୍ୟ ଜଣେ ଆହତ ହୋଇଛି। ଟେକା ପଥର ମାଡ ହେଉଥିବାରୁ ଗାଁ ଲୋକେ ମଧ୍ୟ ବାହାରକୁ ବାହାରି ପାରୁନାହାନ୍ତି। ଖବରପାଇ ନନ୍ଦିପଦା ପୁଲିସ ଘଟଣା ସ୍ଥଳକୁ ଯାଇଛି।