ନିଖୋଜ ଯୁବକର ଶବ ଉଦ୍ଧାର

ଭଦ୍ରକ, ୨୮ା୧୦ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଏହି ଜିଲାର ଧାମନଗର ବ୍ଲକ ଅନ୍ତର୍ଗତ ଧୂଷୁରୀ ପଂଚାୟତ ପଣ୍ଡାପାଟଣା ଗ୍ରାମର ଜଣେ ଯୁବକ ଗାଧୋଇବାକୁ ଯାଇ ଗେଙ୍ଗୁଟି ନଦୀ ଶାଖା କଣ୍ଡିଆ ନାଳରେ ରବିବାର ଦିନ ନିଖୋଜ ହୋଇ ଯାଇଥିବା ବେଳେ ଆଜି ତାର ମୃତ ଦେହ ପାଣିରେ ବୁଡ଼ି ରହିଥିବା ନିକଟସ୍ତ ଏକ ବୁଦା ତଳୁ ଜବତ ହୋଇଛି । ନିଖୋଜ ଯୁବକ ଜଣକ ହେଉଛନ୍ତି ପ୍ରଦୀପ ପଣ୍ଡାଙ୍କ ପୁତ୍ର ରୁଦ୍ର ନାରାୟଣ ପଣ୍ଡା (୧୯) । ରୁଦ୍ର ରବିବାର ପୂର୍ବାହ୍ନ ୧୧ ଘଟିକା ରେ ଗାଁ ନିକଟ କଣ୍ଡିଆନାଳ ଡକାସାହି କଲଭର୍ଟ ନିକଟକୁ ଗାଧୋଇବା ପାଇଁ ଯାଇଥିଲେ। ଗାଧୋଇବା ବେଳେ ସେ ନାଳ ପାଣିରେ ବୁଡି ଯାଇଥିଲେ। ସୂଚନା ପାଇ ବାତ୍ୟା ଓ ବନ୍ୟା ପାଇଁ ଧୂଷୁରୀ ଠାରେ ନିୟୋଜିତ ଥିବା ଅଗ୍ନିଶମ ବାହିନୀ ସମେତ ଧାମନଗର ରୁ ଅଗ୍ନିଶମ ବାହିନୀ ଆସି ଖୋଜାଖୋଜି ଜାରି ରଖିଥିଲେ ହେଁ ରାତି ଯାଏ କୌଣସି ସୁରାକ ପାଇନଥିଲେ । ଆଜି ପୂର୍ବାହ୍ନ ରେ ସ୍ଥାନୀୟ ଯୁବକ ଓ ଦମକଳ ବାହିନୀ ମୃତ ଯୁବକର ଶବକୁ ଜବତ କରିଥିଲେ । ରୁଦ୍ରର ମୃତ୍ୟୁ ରେ ସ୍ଥାନୀୟ ଅଂଚଳରେ ଶୋକର ଛାୟା ଖେଳିଯାଇଛି । ଧୁସୁରି ପୁଲିସ୍ ଶବକୁ ଜବତ କରି ଥାନାରେ ଏକ ଅପମୃତ୍ୟୁ ମାମଲା ରୁଜୁ କରିବା ସହିତ ଶବ ବ୍ୟବଚ୍ଛେଦ ନିମନ୍ତେ ଭଦ୍ରକ ପଠାଇଛି।