ନୂଆ ଦିଲ୍ଲୀ ୧୫-୧୧ (ଓଡ଼ିଆ ପୁଅ) ନଭେମ୍ବର ୨୦ରୁ ୨୮ ତାରିଖ ପର୍ଯ୍ୟନ୍ତ ଗୋଆରେ ୫୩ତମ ଭାରତୀୟ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବ (ଆଇଏଫଏଫଆଇ) ଅନୁଷ୍ଠିତ ହେବାକୁ ଯାଉଛି। ଏହି ବାର୍ଷିକ ଚଳଚ୍ଚିତ୍ର ମହୋତ୍ସବରେ ଚଳଚ୍ଚିତ୍ର ଜଗତର ବହୁ ବିଶିଷ୍ଟ ବ୍ୟକ୍ତିମାନେ ଯୋଗ ଦେବେ। ଏଥିରେ କଳା, ଚଳଚ୍ଚିତ୍ର ଏବଂ ସଂସ୍କୃତିର ସମାହାର ଦେଖିବାକୁ ମିଳିବ। ଚଳିତ ବର୍ଷ ଏହି ମହୋତ୍ସବରେ ୭୯ଟି ଦେଶର ୨୮୦ଟି ଚଳଚ୍ଚିତ୍ର ପ୍ରଦର୍ଶିତ ହେବ। ‘ଇଣ୍ଡିଆନ ପାନୋରାମା’ରେ ୨୫ଟି ଫିଚର ଏବଂ ୨୦ଟି ଅଣଫିଚର ଫିଲ୍ମ ପ୍ରଦର୍ଶିତ ହେବ। ଅନ୍ତର୍ଜାତୀୟ କାର୍ଯ୍ୟକ୍ରମରେ ୧୮୩ଟି ଚଳଚ୍ଚିତ୍ର ପ୍ରଦର୍ଶିତ ହେବ।
– ସତ୍ୟଜିତ ରାୟ ଜୀବନବ୍ୟାପୀ ସାଧନା ପୁରସ୍କାର ସ୍ପେନୀୟ ଚଳଚ୍ଚିତ୍ର ନିର୍ଦ୍ଦେଶକ କାର୍ଲୋସ ସୌରାଙ୍କୁ ଦିଆଯିବ।
– ଫ୍ରାନ୍ସକୁ ଏଥର ‘ସ୍ପଟ୍ଲାଇଟ୍’ ରାଷ୍ଟ୍ର ଭାବେ ସାମିଲ କରାଯାଇଛି ଏବଂ କଣ୍ଟ୍ରି ଫୋକସ ପ୍ୟାକେଜରେ ୮ଟି ଫରାସୀ ଚଳଚ୍ଚିତ୍ର ପ୍ରଦର୍ଶିତ ହେବ।
– ମହୋତ୍ସବର ଉଦଘାଟନୀ ଚଳଚ୍ଚିତ୍ର ଭାବେ ଅଷ୍ଟ୍ରୀୟ ଚଳଚ୍ଚିତ୍ର ଆଲମା ଏଣ୍ଡ ଓସ୍କାର ପ୍ରଦର୍ଶିତ ହେବ, ଏହାର ନିର୍ଦ୍ଦେଶନା ଦେଇଛନ୍ତି ଡିଟର ବର୍ଣ୍ଣର। ଉଦଯାପନୀ ଚଳଚ୍ଚିତ୍ର ଭାବେ କିର୍ଗିଜସ୍ତାନର ଚଳଚ୍ଚିତ୍ର ପର୍ଫେକ୍ଟ ନମ୍ବର ପ୍ରଦର୍ଶିତ ହେବ।
– ଚଳିତ ବର୍ଷ ଆଇଏଫଏଫଆଇରେ କେତେକ ନୂଆ ଯୋଜନା ପ୍ରସ୍ତୁତ କରାଯାଇଛି ଏବଂ ଫିଲ୍ମ ବଜାର ମଧ୍ୟ ପ୍ରଦର୍ଶିତ ହେବ।
– ସାରା ଗୋଆରେ କାରୱାଁ ନିୟୋଜିତ କରାଯିବ ଏବଂ ଚଳଚ୍ଚିତ୍ର ପ୍ରଦର୍ଶିତ ହେବ।
– ମୁକ୍ତ ବେଳାଭୂମିରେ ଚଳଚ୍ଚିତ୍ର ପ୍ରଦର୍ଶିତ ହେବ।
– ‘ଇଣ୍ଡିଆନ ରିଷ୍ଟୋର୍ଡ କ୍ଲାସିକ୍ସ ସେକ୍ସନ’ରେ ଏନଏଫଏଆଇର ଚଳଚ୍ଚିତ୍ର ପ୍ରଦର୍ଶିତ ହେବ।
– ଆଶା ପାରେଖଙ୍କ ଅତୀତର ସ୍ମୃତି କାର୍ଯ୍ୟକ୍ରମର ଅଂଶବିଶେଷ ସ୍ବରୂପ ଦାଦାସାହେବ ଫାଲକେ ପୁରସ୍କାର ବିଜେତା ଚଳଚ୍ଚିତ୍ର – ତିସରୀ ମଞ୍ଜିଲ, ଦୋ ବଦାଁ ଏବଂ କଟି ପତଙ୍ଗ ପ୍ରଦର୍ଶିତ ହେବ।
– ‘ଶ୍ରଦ୍ଧାଞ୍ଜଳି’ ବର୍ଗରେ ୧୫ଟି ଭାରତୀୟ ଏବଂ ୫ଟି ଅନ୍ତର୍ଜାତୀୟ ଚଳଚ୍ଚିତ୍ର ପ୍ରଦର୍ଶିତ ହେବ।
– ଉତ୍ତର ପୂର୍ବ ଭାରତର ଚଳଚ୍ଚିତ୍ରକୁ ପ୍ରୋତ୍ସାହିତ କରିବା ଲାଗି, ମଣିପୁରୀ ସିନେମାର ସ୍ବର୍ଣ୍ଣ ଜୟନ୍ତୀ ଉପଲକ୍ଷେ ୫ଟି ଫିଚର ଏବଂ ୫ଟି ଅଣ-ଫିଚର ଚଳଚ୍ଚିତ୍ର ପ୍ରଦର୍ଶିତ ହେବ।
– ୨୬ ନଭେମ୍ବରରେ ଶିଗମୋତ୍ସବ (ବସନ୍ତ ମହୋତ୍ସବ) ଏବଂ ୨୭ ନଭେମ୍ବରରେ ଗୋଆ କାର୍ଣ୍ଣିଭାଲ ହେବ ବିଶେଷ ଆକର୍ଷଣ
– ଆଜାଦୀ କା ଅମୃତ ମହୋତ୍ସବ ଅବସରରେ ସିବିସି ପକ୍ଷରୁ ପ୍ରଦର୍ଶନୀ ଆୟୋଜନ କରାଯିବ।
ନୂଆ ଦିଲ୍ଲୀ ୧୫-୧୧ (ଓଡ଼ିଆ ପୁଅ) କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ, ମତ୍ସ୍ୟପାଳନ, ପଶୁସମ୍ପଦ ଓ ଦୁଗ୍ଧ ଉତ୍ପାଦନ ରାଷ୍ଟ୍ରମନ୍ତ୍ରୀ ଡକ୍ଟର ଏଲ. ମୁରୁଗାନ ନୂଆଦିଲ୍ଲୀର ନେସନାଲ ମିଡିଆ ସେଣ୍ଟର ଠାରେ ମହୋତ୍ସବ ସମ୍ପର୍କରେ ଗୁରୁତ୍ବପୂର୍ଣ୍ଣ ସୂଚନା ଦେଇଥିଲେ। ସେ କହିଥିଲେ ଯେ ସତ୍ୟଜିତ ରାୟ ଜୀବନବ୍ୟାପୀ ସାଧନା ପୁରସ୍କାରରେ ସ୍ପେନୀୟ ଚଳଚ୍ଚିତ୍ର ନିର୍ମାତା କାର୍ଲୋସ ସୌର ସମ୍ମାନିତ ହେବେ ଏବଂ ଅତୀତର ସ୍ମୃତି ବର୍ଗରେ ଆଠଟି ଚଳଚ୍ଚିତ୍ର ପ୍ରଦର୍ଶିତ ହେବ। ଆଶା ପାରେଖଙ୍କ ଅତୀତର ସ୍ମୃତି କାର୍ଯ୍ୟକ୍ରମର ଅଂଶବିଶେଷ ସ୍ବରୂପ ଦାଦାସାହେବ ଫାଲକେ ପୁରସ୍କାର ବିଜେତା ଚଳଚ୍ଚିତ୍ର – ତିସରୀ ମଞ୍ଜିଲ, ଦୋ ବଦାଁ ଏବଂ କଟି ପତଙ୍ଗ ପ୍ରଦର୍ଶିତ ହେବ। ଉତ୍ତର ପୂର୍ବ ଭାରତର ଚଳଚ୍ଚିତ୍ରକୁ ପ୍ରୋତ୍ସାହିତ କରିବା ଲାଗି, ମଣିପୁରୀ ସିନେମାର ସ୍ବର୍ଣ୍ଣ ଜୟନ୍ତୀ ଉପଲକ୍ଷେ ୫ଟି ଫିଚର ଏବଂ ୫ଟି ଅଣ-ଫିଚର ଚଳଚ୍ଚିତ୍ର ପ୍ରଦର୍ଶିତ ହେବ।
ମହୋତ୍ସବର ଉଦଘାଟନୀ ଚଳଚ୍ଚିତ୍ର ଭାବେ ଅଷ୍ଟ୍ରୀୟ ଚଳଚ୍ଚିତ୍ର ଆଲମା ଏଣ୍ଡ ଓସ୍କାର ପ୍ରଦର୍ଶିତ ହେବ, ଏହାର ନିର୍ଦ୍ଦେଶନା ଦେଇଛନ୍ତି ଡିଟର ବର୍ଣ୍ଣର। ଉଦଯାପନୀ ଚଳଚ୍ଚିତ୍ର ଭାବେ କିର୍ଗିଜସ୍ତାନର ଚଳଚ୍ଚିତ୍ର ପର୍ଫେକ୍ଟ ନମ୍ବର ପ୍ରଦର୍ଶିତ ହେବ। ‘ଶ୍ରଦ୍ଧାଞ୍ଜଳି’ ବର୍ଗରେ ୧୫ଟି ଭାରତୀୟ ଏବଂ ୫ଟି ଅନ୍ତର୍ଜାତୀୟ ଚଳଚ୍ଚିତ୍ର ପ୍ରଦର୍ଶିତ ହେବ। ଭାରତ ରତ୍ନ ଲତା ମଙ୍ଗେସକର, ଗାୟକ-ସଙ୍ଗୀତ ନିର୍ଦ୍ଦେଶକ ବାପି ଲାହିରୀ, ବିଶିଷ୍ଟ କଥକ ନୃତ୍ୟଶିଳ୍ପ ପଣ୍ଡିତ ବିର୍ଜୁ ମହାରାଜ, ଅଭିନେତା ରମେଶ ଦେଓ ଏବଂ ମାହେଶ୍ବରୀ ଆମ୍ମା, ଗାୟକ କେକେ, ନିର୍ଦ୍ଦେଶକ ତରୁନ, ଅହମୀୟା ଅଭିନେତା ଓ ମଞ୍ଚ କଳାକାର ମଜୁମଦାର ଏବଂ ଗାୟକ ଭୂପିନ୍ଦର ସିଂଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରାଯିବ। ଅନ୍ତର୍ଜାତୀୟ ବର୍ଗରେ ବବ ରାଫେଲସନ, ଇଭାନ ରିଟମ୍ୟାନ, ପିଟର ବୋଗଡାନୋଭିଚ, ଡଗ୍ଲାସ ଟ୍ରମ୍ବେଲ ଏବଂ ମୋନିକା ଭିଟ୍ଟିଙ୍କୁ ଶ୍ରଦ୍ଧାଞ୍ଜଳି ବ୍ୟକ୍ତ କରାଯିବ।
ଚଳଚ୍ଚିତ୍ର ମହୋତ୍ସବର ଆଉ ଏକ ଆକର୍ଷଣ ହେଉଛି ସୂଚନା ଏବଂ ପ୍ରସାରଣ ମନ୍ତ୍ରଣାଳୟ ପକ୍ଷରୁ ଆରମ୍ଭ କରାଯାଇଥିବା ’ଆସନ୍ତାକାଲିର ୭୫ ସୃଜନଶୀଳ ପ୍ରତିଭା’। ଏହି କାର୍ଯ୍ୟକ୍ରମର ଦ୍ବିତୀୟ ସଂସ୍କରଣରେ ୭୫ ଜଣ ସୃଜନଶୀଳ ଚଳଚ୍ଚିତ୍ର ନିର୍ମାତାମାନଙ୍କୁ ଚୟନ କରାଯିବ।
‘ଫିଲ୍ମ ବଜାର’ ବର୍ଗର ବିଭିନ୍ନ ବିଭାଗରେ ଶ୍ରେଷ୍ଠ ଚଳଚ୍ଚିତ୍ର ଏବଂ ଚଳଚ୍ଚିତ୍ର ନିର୍ମାତାଙ୍କୁ ନେଇ ଚଳଚ୍ଚିତ୍ର ପ୍ରଦର୍ଶିତ ହେବ। ଆଇଏଫଏଫଆଇରେ ମୋଟ ୪୨ଟି ପାଭିଲିଅନ ରହିବ। ଏଥିରେ ବିଭିନ୍ନ ରାଷ୍ଟ୍ର, ରାଜ୍ୟ ସରକାରଙ୍କ ଚଳଚ୍ଚିତ୍ର କାର୍ଯ୍ୟାଳୟ ରହିବ।
ରିଚାର୍ଡ ଆଟ୍ଟେନବର୍ଗଙ୍କ ଓସ୍କାର ପୁରସ୍କାର ବିଜେତା ଚଳଚ୍ଚିତ୍ର ଗାନ୍ଧୀ ‘ଦିବ୍ୟାଙ୍ଗଜନ’ ବର୍ଗରେ ପ୍ରଦର୍ଶିତ ହେବ। ଏହାକୁ ଅଡିଓ ଡେସ୍କ୍ରିପ୍ସନ ଏବଂ ସବଟାଇଟଲ ସହ ପ୍ରଦର୍ଶିତ କରାଯିବ। ଫଳରେ ଏହାକୁ ଦିବ୍ୟାଙ୍ଗଜନମାନେ ଦେଖିପାରିବେ।
‘ଇଣ୍ଡିଆନ ପାନୋରାମା’ର ଫିଚର ଫିଲ୍ମ ବର୍ଗରେ ପ୍ରଥମ ଫିଲ୍ମ ଭାବେ ପୃଥ୍ବୀ କୋନାନୁରଙ୍କ କନ୍ନଡ଼ ଚଳଚ୍ଚିତ୍ର ହାଦିନେଲେନ୍ତୁ ପ୍ରଦର୍ଶିତ ହେବ ଏବଂ ଅଣଫିଚର ଫିଲ୍ମ ବର୍ଗରେ ଦିବ୍ୟା କୋୱାସଜୀଙ୍କ ଦ ଶୋ’ ମଷ୍ଟ ଗୋ ଅନ୍ ପ୍ରଦର୍ଶିତ ହେବ। ଶ୍ରେଷ୍ଠ ବିଦେଶୀ ଭାଷା ଚଳଚ୍ଚିତ୍ର ଭାବେ ଓସ୍କାର ପାଇଁ ମନୋନିତ ହୋଇଥିବା ପାନ୍ ନଳିନଙ୍କ ନିର୍ଦ୍ଦେଶିତ ଚେଲ୍ଲୋ ଶୋ-ଦ ଲାଷ୍ଟ ଫିଲ୍ମ ଶୋ’ ଏବଂ ମଧୁର ଭଣ୍ଡାରକରଙ୍କ ଇଣ୍ଡିଆ ଲକଡାଉନର ସ୍ବତନ୍ତ୍ର ପ୍ରଦର୍ଶନୀ ହେବ।
‘ଇଣ୍ଡିଆନ ରିଷ୍ଟୋର୍ଡ କ୍ଲାସିକ୍ସ ସେକ୍ସନ’ରେ ଭାରତୀୟ ଜାତୀୟ ଚଳଚ୍ଚିତ୍ର ଆର୍କାଇଭ୍ସ (ଏନଏଫଏଆଇ)ର ଚଳଚ୍ଚିତ୍ର ଏନଏଫଡିସି ଦ୍ବାରା ପ୍ରଦର୍ଶିତ ହେବ। ଭାରତୀୟ ଚଳଚ୍ଚିତ୍ରକୁ ପ୍ରୋତ୍ସାହିତ କରିବା ଲାଗି କେତେକ ହିନ୍ଦୀ ଚଳଚ୍ଚିତ୍ରର ପ୍ରିମିୟର କରାଯିବ। ଏଥିରେ ପରେଶ ରାୱଲଙ୍କ ଚଳଚ୍ଚିତ୍ର ଦ ଷ୍ଟୋରୀ ଟେଲର, ଅଜୟ ଦେବଗନ ଓ ତବୁଙ୍କ ଦୃଶ୍ୟମ ୨, ବରୁଣ ଧୱନ ଓ କିର୍ତ୍ତୀ ସାନନଙ୍କ ଭେଡିୟା ଏବଂ ୟମି ଗୌତମଙ୍କ ଲଷ୍ଟ ପ୍ରଦର୍ଶିତ ହେବ। ଏହାଛନା କେତେକ ତେଲୁଗୁ ଚଳଚ୍ଚିତ୍ର, ଓଟିଟି ଚଳଚ୍ଚିତ୍ରର ମଧ୍ୟ ପ୍ରିମିୟର ହେବ।
କାନ୍ସ, ବର୍ଲିନ, ଟରୋଣ୍ଟୋ ଓ ଭେନିସ ଭଳି ବିଶ୍ବସ୍ତରୀୟ ଚଳଚ୍ଚିତ୍ର ମହୋତ୍ସବରେ ପ୍ରଦର୍ଶିତ ଚଳଚ୍ଚିତ୍ର ମଧ୍ୟ ପ୍ରଦର୍ଶିତ ହେବାର କାର୍ଯ୍ୟକ୍ରମ ରହିଛି। ୨୩ ‘ମାଷ୍ଟରକ୍ଲାସେସ’ ଏବଂ ‘ଇନ କନଭର୍ସେସନ’ ଅଧିବେଶନରେ ବିଶିଷ୍ଟ ଚଳଚ୍ଚିତ୍ର ନିର୍ମାତା ଓ ଅଭିନେତାଙ୍କ ସହିତ ଆଲୋଚନା କାର୍ଯ୍ୟକ୍ରମ ଅନୁଷ୍ଠିତ ହେବ। ଆଶା ପାରେଖ, ପ୍ରସୁନ ଯୋଶୀ, ଆନନ୍ଦ ଏଲ. ରାୟ, ଆର ବାଲକୀ ଓ ନୱାଜୁଦ୍ଦିନ ସିଦ୍ଦିକଙ୍କ ଭଳି ବ୍ୟକ୍ତିବିଶେଷଙ୍କ ଦ୍ବାରା ‘ଇନ-କନଭର୍ସେସନ’ ଅଧିବେଶନ ପରିଚାଳିତ ହେବ।
୫୩ତମ ଆଇଏଫଏଫଆଇକୁ ଭର୍ଚୁଆଲ ମାଧ୍ୟମରେ ଦେଖି ହେବ। ପଞ୍ଜିକୃତ ୟୁଜର ବା ବ୍ୟବହାରକାରୀ ମାଷ୍ଟରକ୍ଲାସରେ ଅଂଶଗ୍ରହଣ କରିପାରିବେ। ସେମାନେ ଗୋଆ ଠାରୁ ଦୂରରେ ରହି ମଧ୍ୟ ଉଦଘାଟନୀ ଓ ଉଦଯାପନୀ ସମାରୋହ, ପାନେଲ ଆଲୋଚନା ଓ ମତ ବିନିମୟ କାର୍ଯ୍ୟକ୍ରମରେ ମଧ୍ୟ ସାମିଲ ହୋଇପାରିବେ।
ଆୟୁଷ ମନ୍ତ୍ରଣାଳୟ ସରକାରୀ କଲ୍ୟାଣ ସହଯୋଗୀ ଭାବେ ମହୋତ୍ସବରେ ଅଂଶଗ୍ରହଣ କରିବ ଏବଂ ମହୋତ୍ସବ ସମୟରେ ଯୋଗ ଏବଂ ସାମଗ୍ରିକ ସ୍ବାସ୍ଥ୍ୟ ପରୀକ୍ଷା ଆୟୋଜନ କରାଯିବ। ଆୟୁଷର ୪ଟି ବିଭାଗ- ହୋମିଓପାଥୀ, ନେଚରୋପାଥୀ, ଆୟୁର୍ବେଦ ଏବଂ ଯୋଗକୁ ପ୍ରୋତ୍ସାହିତ କରାଯିବ। ଉଦଘାଟନୀ ଏବଂ ଉଦଯାପନୀ ସମାରୋହରେ ୧୪ରୁ ଅଧିକ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବ ଏବଂ ଏଥିରେ ଚଳଚ୍ଚିତ୍ର ତାରକାଙ୍କ ସହିତ ଫ୍ରାନ୍ସ, ସ୍ପେନ ଓ ଗୋଆର ବିଭିନ୍ନ ନୃତ୍ୟ ଦଳ ଅଂଶଗ୍ରହଣ କରିବେ। ଉଦଘାଟନୀ ସମାରୋହରେ ଆଜାଦୀ କା ଅମୃତ ମହୋତ୍ସବ ବର୍ଗରେ ଭାରତୀୟ ଚଳଚ୍ଚିତ୍ରର ଗତ ୧୦୦ ବର୍ଷର ଯାତ୍ରା ପ୍ରଦର୍ଶିତ ହେବ।
ଗଣମାଧ୍ୟମକୁ ସୂଚନା ଦେଇ ସୂଚନା ଏବଂ ପ୍ରସାରଣ ରାଷ୍ଟ୍ରମନ୍ତ୍ରୀ କହିଥିଲେ ଯେ ଆଇଏଫଏଫଆଇରେ ଅନ୍ତର୍ଜାତୀ ଚଳଚ୍ଚିତ୍ର ଅଧ୍ୟାୟରେ ୧୮୦ଟି ଚଳଚ୍ଚିତ୍ର ପ୍ରଦର୍ଶିତ ହେବ। ପାଞ୍ଚ ଜଣ ଚଳଚ୍ଚିତ୍ର ବ୍ୟକ୍ତିତ୍ବଙ୍କ ଫିଲ୍ମ ଶ୍ରଦ୍ଧାଞ୍ଜଳି ବର୍ଗରେ ପ୍ରଦର୍ଶିତ ହେବ। ଦୁଇ ଜଣ ବିଶିଷ୍ଟ ଚଳଚ୍ଚିତ୍ର ନିର୍ମାତାଙ୍କ ଚଳଚ୍ଚିତ୍ର ଆଇଏଫଏଫଆଇର ଶ୍ରଦ୍ଧାଞ୍ଜଳି ବର୍ଗରେ ପ୍ରଦର୍ଶିତ ହେବ।
ଏହି ଅବସରରେ ସୂଚନା ଏବଂ ପ୍ରସାରଣ ମନ୍ତ୍ରଣାଳୟର ସଚିବ ଶ୍ରୀ ଅପୂର୍ବ ଚନ୍ଦ୍ର କହିଥିଲେ ଯେ, ଆଇଏଫଏଆଇର ଫିଲ୍ମ ବଜାର ବର୍ଗରେ ଏଥର ପ୍ରଥମ ଥର ପାଇଁ ବିଭିନ୍ନ ଦେଶ, ରାଜ୍ୟ ଓ ଚଳଚ୍ଚିତ୍ର ସଂଗଠନର ପାଭିଲିଅନ ନିର୍ମାଣ କରାଯାଇଛି। ଆଇଏଫଏଫଆଇର ପ୍ରତିନିଧିମାନେ ଏହି ପାଭିଲିଅନରେ ଯେକୌଣସି ସମୟରେ ଅଂଶଗ୍ରହଣ କରିପାରିବେ ଏବଂ ସାଧାରଣ ଜନତାଙ୍କ ପାଇଁ ଅପରାହ୍ଣ ୩ଟାରୁ ୬ଟା ପର୍ଯ୍ୟନ୍ତ ଖୋଲା ରହିବ।