ଭଦ୍ରକ, ୧୧ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଧାମନଗର ଅଞ୍ଚଳରେ ଥିବା ସରକାରୀ କାର୍ଯ୍ୟାଳୟ ମାନଙ୍କର ନବକଳେବର ହେବ। ବ୍ଲକରେ କାର୍ଯ୍ୟକ୍ଷମ ବିଭିନ୍ନ ଆରଆଇ ଅଫିସ୍, ଗ୍ରାମ୍ୟ ନିର୍ମାଣ ବିଭାଗର କୋଠା ଓ ସରକାରୀ ଆବାସିକ କୋଠାର ମରାମତି ହେବ। ଏଥିପାଇଁ ୨୦୨୬-୨୭ ଆର୍ôଥକ ବର୍ଷରେ ଗ୍ରାମ୍ୟ ନିର୍ମାଣ ବିଭାଗ ପକ୍ଷରୁ ମୋଟ ୭୯ ଲକ୍ଷ ଟଙ୍କା ମଞ୍ଜୁର ହୋଇଛି। ଭଦ୍ରକ-୨ ଗ୍ରାମ୍ୟ ନିର୍ମାଣ ଡିଭିଜନ ଅଧୀନରେ ଏହି କାର୍ଯ୍ୟ କରାଯିବ। ମଞ୍ଜୁର ଅର୍ଥରୁ ୩୯ ଲକ୍ଷ ଟଙ୍କା ନିୟମିତ ରକ୍ଷଣାବେକ୍ଷଣ ପାଇଁ ବ୍ୟୟ ହେବ। ବେତାଳିଗାଁ, କଟାସାହି, ନଦୀଗାଁ ଓ ଅସୁରାଳି ଆରଆଇ କାର୍ଯ୍ୟାଳୟ ପାଇଁ ୪ ଲକ୍ଷ ଟଙ୍କା ଲେଖାଏଁ ମଞ୍ଜୁର ହୋଇଛି। ବୟାଙ୍ଗଡିହ ନୂଆହାଟ, ସୁଜାନସିଂହପୁର ଓ ଭଗବାନପୁରର ଜିଏଚ୍ଡି କୋଠା ପାଇଁ ୫ ଲକ୍ଷ ଟଙ୍କା ଲେଖାଏଁ ଏବଂ ଧାମନଗର-୨ ଓ ଅସୁରାଳି ସେକ୍ସନ ଅଫିସ୍? ପାଇଁ ୪ ଲକ୍ଷ ଟଙ୍କା ଲେଖାଏଁ ଖର୍ଚ୍ଚ ହେବ। ସେହିପରି ଗୁରୁତ୍ୱପୂର୍ଣ୍ଣ କୋଠାର ମରାମତି ପାଇଁ ୩୦ ଲକ୍ଷ ଟଙ୍କା ବ୍ୟବସ୍ଥା କରାଯାଇଛି।ଧୂଷୁରୀ ସବ୍-ରେଜିଷ୍ଟ୍ରାର ଅଫିସ୍ ଓ ଧାମନଗର ଗ୍ରାମ୍ୟ ନିର୍ମାଣ ସବ୍-ଡିଭିଜନ ଅଫିସ୍ ପାଇଁ ୫ ଲକ୍ଷ ଟଙ୍କା ଲେଖାଏଁ ମଞ୍ଜୁର ହୋଇଛି। ଦଳାଙ୍ଗ, ନଦୀଗାଁ ଓ ଅସୁରାଳି ଆରଆଇ ଅଫିସ ସହ ଅସୁରାଳି ଗ୍ରାମ୍ୟ ନିର୍ମାଣ ସେକ୍ସନ ଅଫିସ୍ ପାଇଁ ମଧ୍ୟ ୫ ଲକ୍ଷ ଟଙ୍କା ଲେଖାଏଁ ଅନୁମୋଦନ ମିଳିଛି। ସରକାରୀ ଆବାସିକ କୋଠାର ମରାମତି ପାଇଁ ୧୦ ଲକ୍ଷ ଟଙ୍କା ଖର୍ଚ୍ଚ ହେବ। ଅସୁରାଳି ଆରଡବ୍ଲ୍ୟୁ ସେକ୍ସନର ଜେଇଙ୍କ ଇ-ଟାଇପ୍ କ୍ୱାର୍ଟର ଓ ଧାମନଗରସ୍ଥିତ ଏଇଇଙ୍କ ଡି-ଟାଇପ୍ କ୍ୱାର୍ଟର ପାଇଁ ୫ ଲକ୍ଷ ଟଙ୍କା ଲେଖାଏଁ ମଞ୍ଜୁର ହୋଇଛି। ବିଭାଗ ପକ୍ଷରୁ ମଞ୍ଜୁର ହୋଇଥିବା ଅର୍ଥ ସୀମା ମଧ୍ୟରେ କାର୍ଯ୍ୟ ଶେଷ କରିବାକୁ ନିର୍ଦ୍ଦେଶ ରହିଛି। ନିର୍ଦ୍ଧାରିତ ବଜେଟ୍ ଠାରୁ ଅଧିକ ଅର୍ଥ ବ୍ୟୟ ନକରିବାକୁ କାର୍ଯ୍ୟନିର୍ବାହୀ ଯନ୍ତ୍ରୀଙ୍କୁ ମଧ୍ୟ ଏକ୍ଷେତ୍ରରେ ପରାମର୍ଶ ଦିଆଯାଇଛି । ମୋଟାମୋଟି ଭାବେ, ଏହି ଅର୍ଥରେ ଧାମନଗର ଅଞ୍ଚଳର ବହୁ ସରକାରୀ କୋଠାର ଦୁର୍ବଳ ଭିତ୍ତିଭୂମି ମରାମତି ଓ ରକ୍ଷଣାବେକ୍ଷଣ ହେବ। କାର୍ଯ୍ୟଗୁଡ଼ିକ ସଠିକ୍ ଭାବେ ସମ୍ପନ୍ନ ହେଲେ ସରକାରୀ ଭିତ୍ତିଭୂମିର ଚିତ୍ର ବଦଳିବା ସହ ସାଧାରଣ ଲୋକଙ୍କୁ ସରକାରୀ ସେବା ପ୍ରଦାନରେ ଅଧିକ ସୁବିଧା ମିଳିବ ବୋଲି ସାଧାରଣରେ ଆଶା କରାଯାଉଛି।
ଧାମନଗରରେ ବଦଳିବ ସରକାରୀ ଅଫିସ ଚିତ୍ର,ପ୍ରକଳ୍ପ ପାଇଁ ୭୯ ଲକ୍ଷ ମଞ୍ଜୁର
