ନୂଆଦିଲ୍ଳୀ, ୧୭-୧୧-୨୧(ଓଡ଼ିଆ ପୁଅ): ଭାରତରେ ଦୁଇ ଡୋଜ କରୋନା ଟିକା ନେଇଥିବା ଲୋକଙ୍କ ସଂଖ୍ୟା ଆଂଶିକ ଟିକା ନେଇଥିବା ଲୋକଙ୍କ ସଂଖ୍ୟାକୁ ପ୍ରଥମଥର ପାଇଁ ଅତିକ୍ରମ କରିଛି। ପ୍ରଧାନମନ୍ତ୍ରୀଙ୍କ ଜନଭାଗିଦାରୀ ଲକ୍ଷ୍ୟ ଓ ସାମଗ୍ରିକ ସରକାରୀ ପ୍ରୟାସ, ସରକାରଙ୍କ ଉପରେ ଲୋକଙ୍କ ବିଶ୍ୱାସ ତଥା ଦେଶରେ ଏବେ ଚାଲିଥିବା ହର ଘର ଦସ୍ତକ ଅଭିଯାନ ଯୋଗୁଁ ଏହା ସମ୍ଭବ ହୋଇଛି ବୋଲି କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡକ୍ଟର ମନସୁଖ ମାଣ୍ଡଭିୟ ଏଠାରେ କହିଛନ୍ତି। ହର ଘର ଦସ୍ତକ ଅଭିଯାନରେ ଟିକାକର୍ମୀମାନେ ଲୋକଙ୍କ ଘରଦ୍ୱାର ମୁହଁରେ ପହଞ୍ଚି ଯୋଗ୍ୟ ବ୍ୟକ୍ତିମାନଙ୍କୁ ଟିକା ଦେଉଛନ୍ତି। ଏଥିପ୍ରତି ଦେଶର ବିଭିନ୍ନ ଭାଗରେ ବିଶେଷ ଜନସମର୍ଥନ ମିଳୁଥିବା ସେ ଦର୍ଶାଇଛନ୍ତି।
ଏବେ ସମଗ୍ର ଦେଶରେ ଯେଉଁ ଟିକାକରଣ କାର୍ଯ୍ୟକ୍ରମ ଚାଲିଛି ତାହାର ଏକ ଉଲ୍ଲେଖନୀୟ ଉପଲବ୍ଧି ହେଲା, ପ୍ରଥମ ଥର ପାଇଁ ଦୁଇଟି ଯାକ (ସମ୍ପୂର୍ଣ୍ଣ) ଡୋଜ ଟିକା ନେଇଥିବା ଲୋକଙ୍କ ସଂଖ୍ୟା ଗୋଟିଏ ଡୋଜ ଟିକା ନେଇଥିବା ଲୋକଙ୍କ ସଂଖ୍ୟାକୁ ଅତିକ୍ରମ କରିଛି। ଆଜି (ବୁଧବାର) ସକାଳ ସାତଟା ସୁଦ୍ଧା ୧୧୩.୬୮କୋଟି (୧, ୧୩, ୬୮, ୭୯, ୬୮୫) ମୋଟ ଡୋଜ ଟିକା ପ୍ରଦାନ କରାଯାଇଛି। ସେଥିମଧ୍ୟରୁ ଗତ ୨୪ଘଣ୍ଟାରେ ଦିଆଯାଇଥିବା ଟିକା ଡୋଜର ସଂଖ୍ୟା ୬୭, ୮୨, ୦୪୨। ମୋଟ ୧, ୧୬, ୭୩, ୪୫୯ କେନ୍ଦ୍ରରେ ଏହି ଟିକା ଦିଆଯାଇଛି। ଏହି ଟିକାଦାନ ମଧ୍ୟରେ ପ୍ରଥମ ଡୋଜ ନେଇଥିବା ଲୋକଙ୍କ ସଂଖ୍ୟା ୭୫, ୫୭, ୨୪, ୦୮୧ ଓ ଦ୍ୱିତୀୟ ଡୋଜ ନେଇଥିବା ଲୋକଙ୍କ ସଂଖ୍ୟା ୩୮, ୧୧, ୫୫, ୬୦୪। ଏହା ଫଳରେ ଦୁଇଡୋଜ ବା ସମ୍ପୂର୍ଣ୍ଣ ଟିକା ନେଇଥିବା ଲୋକଙ୍କ ସଂଖ୍ୟା ଏବେ ୩୮, ୧୧, ୫୫, ୬୦୪ରେ ପହଞ୍ଚି ଗୋଟିଏ ଡୋଜ ନେଇଥିବା ଲୋକଙ୍କ ସଂଖ୍ୟା ୩୭, ୪୫, ୬୮, ୪୭୭କୁ ଅତିକ୍ରମ କରିଛି।
ଏହି ସଫଳତା ପଛରେ ଥିବା ସାମୁହିକ ଆଗ୍ରହ ଓ ସହଯୋଗ ପାଇଁ ସ୍ୱାସ୍ଥ୍ୟମନ୍ତ୍ରୀ ଦେଶବାସୀଙ୍କୁ ଅଭିନନ୍ଦନ ଜ୍ଞାପନ କରିଛନ୍ତି। ଏକ ଟୁଇଟ୍ରେ ସେ ସବୁ ଯୋଗ୍ୟ ବ୍ୟକ୍ତିଙ୍କୁ ଟିକା ନେବାକୁ ନିବେଦନ କରିବା ସହ ଏହି ଲଢେଇ ଆମେ ମିଳିତଭାବେ ଜିତିବା ବୋଲି ଉଲ୍ଲେଖ କରିଛନ୍ତି।
ମାସବ୍ୟାପୀ ଚାଲିଥିବା ‘ହର ଘର ଦସ୍ତକ’ ଅଭିଯାନ ଶେଷ ସୁଦ୍ଧା ଅବଶିଷ୍ଟ ଯୋଗ୍ୟ ସବୁ ଭାରତୀୟଙ୍କୁ କୋଭିଡ ଟିକା ଦିଆଯିବ ବୋଲି ସେ ଦୃଢ ଆଶା ଓ ବିଶ୍ୱସା ପ୍ରକଟ କରିଛନ୍ତି।
ସେ କହିଛନ୍ତି ଯେ ଦେଶର ପ୍ରତ୍ୟେକ ନାଗରିକଙ୍କୁ କରୋନାରୁ ସୁରକ୍ଷିତ ରଖିବା ପାଇଁ ସରକାର ଦୃଢ ରାଜନୈତିକ ସଂକଳ୍ପ ନେଇଛନ୍ତି ଏବଂ ସେଥିପାଇଁ ଟିକାକରଣ କାର୍ଯ୍ୟକ୍ରମ ବ୍ୟାପକଭାବେ ଚାଲିଛି। ଗତବର୍ଷ ଜାନୁୟାରୀ ୧୬ତାରିଖରୁ ଆରମ୍ଭ ହୋଇଥିବା ଏହି ଦେଶବ୍ୟାପୀ ଟିକାକରଣ ଅଭିଯାନ ଏଯାଏ ବିଭିନ୍ନ ସଫଳତା ହାସଲ କରିଛି।
୨୦୨୧ ଅକ୍ଟୋବର ୨୧ରେ ମୋଟ ୧୦୦କୋଟି ଡୋଜ ଟିକା ପ୍ରଦାନ କରି ଦେଶ ଏକ ଉଲ୍ଲେଖନୀୟ ସଫଳତା ଅର୍ଜନ କରିଥିଲା। ଏହା ପରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦିଜୀ ନଭେମ୍ବର ତିନି ତାରିଖରେ ‘ହର ଘର ଦସ୍ତକ’ ଅଭିଯାନ ଆରମ୍ଭ କରିବାକୁ ଆହ୍ୱାନ ଦେଇ ପ୍ରତ୍ୟେକ ଲୋକଙ୍କ ଘର ପାଖରେ ଟିକାଦାନ ସୁବିଧା ପହଂଚାଇବାକୁ ନିର୍ଦ୍ଦେଶ ଦେଇଥିଲେ। ଅନ୍ତ୍ୟୋଦୟ ଚେତନା ଓ ଉତ୍ସାହରେ ଏହି ଅଭିଯାନକୁ ସଫଳ କରିବାକୁ ପ୍ରଧାନମନ୍ତ୍ରୀ ଆହ୍ୱାନ ଦେଇଥିଲେ ବୋଲି ଶ୍ରୀ ମାଣ୍ଡଭିୟ କହିଛନ୍ତି।
ଏକମାସ ବ୍ୟାପୀ ‘ହର ଘର ଦସ୍ତକ’ ଟିକାଦାନ ଅଭିଯାନର ଲକ୍ଷ୍ୟ ହେଲା ଦେଶର ପ୍ରତ୍ୟେକ ବୟସ୍କ ଓ ଯୋଗ୍ୟ ବ୍ୟକ୍ତିଙ୍କୁ ପ୍ରଥମ ଡୋଜ କୋଭିଡ ଟିକା ପ୍ରଦାନକୁ ସୁନିଶ୍ଚିତ କରିବା। ଏଥିସହିତ ଯେଉଁମାନେ ପ୍ରଥମ ଡୋଜ ଟିକା ନେଇଛନ୍ତି ସେମାନଙ୍କୁ ଏହି ଅଭିଯାନ ମାଧ୍ୟମରେ ଦ୍ୱିତୀୟ ଡୋଜ ଟିକା ନେବାକୁ ଅନୁପ୍ରାଣିତ କରାଯାଉଛି। ସ୍ୱାସ୍ଥ୍ୟକର୍ମୀମାନେ ଦ୍ୱାରକୁ ଦ୍ୱାର ବୁଲି ଯୋଗ୍ୟ ବ୍ୟକ୍ତିମାନଙ୍କୁ ଟିକାଦେଉଛନ୍ତି। ଦେଶର ଯେଉଁ ସବୁ ଜିଲ୍ଲାରେ ଯୋଗ୍ୟ ବ୍ୟକ୍ତିଙ୍କ ମଧ୍ୟରୁ ୫୦ ଶତାଂଶ ଟିକା ନେଇନାହାନ୍ତି, ସେଠାରେ ଟିକାକରଣ ଉପରେ ସ୍ୱତନ୍ତ୍ର ଗୁରୁତ୍ୱ ଦିଆଯାଉଛି।
କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ କହିଛନ୍ତି ଯେ ଦେଶରେ ଟିକାର ଅଭାବ ନାହିଁ। ଦ୍ୱିତୀୟ ଡୋଜ ଟିକା ନେବାକୁ ଅଧିକରୁ ଅଧିକ ସଂଖ୍ୟାରେ ଲୋକେ ଆଗେଇ ଆସିବାକୁ ସେ ଆହ୍ୱାନ ଜଣାଇଛନ୍ତି। ଏହାଛଡା ଜନସାଧାରଣ ନିଜ ପରିବାର, ଗୋଷ୍ଠୀ, ସମୁଦାୟର ଲୋକମାନଙ୍କୁ ଉଭୟ ଡୋଜ ଟିକାନେବାକୁ ଅନୁପ୍ରେରିତ କରିବାକୁ ସେ ନିବେଦନ କରିଛନ୍ତି।