ନୂଆ ଦିଲ୍ଲୀ ୧୮-୪ (ଓଡ଼ିଆ ପୁଅ) କରୋନାର ବଢ଼ୁଥିବା ବିପଦକୁ ଦେଖି ରବିବାର ଦିନ କନଫେଡେରେସନ୍ ଅଫ୍ ଅଲ୍ ଇଣ୍ଡିଆ ଟ୍ରେଡର୍ସ (କ୍ୟାଟ୍) ଦିଲ୍ଲୀର ଲେଫ୍ଟନାଣ୍ଟ ଗଭର୍ଣ୍ଣର ଅନିଲ ବୈଜଲ ଏବଂ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ଦିଲ୍ଲୀରେ ତୁରନ୍ତ ୧୫ ଦିନ ଲକ୍ଡାଉନ୍ କରିବାକୁ ଦାବି କରିଛନ୍ତି। ଏଥି ସହିତ ଦିଲ୍ଲୀର ସମସ୍ତ ସୀମାରେ କରୋନା ଯାଞ୍ଚ କରିବା ପାଇଁ କଡା ବ୍ୟବସ୍ଥା କରିବାକୁ କୁହାଯାଇଛି ଯାହା ଦ୍ୱାରା କରୋନାର ବୃଦ୍ଧିର ହାରକୁ ରୋକାଯାଇପାରିବ। CAIT ଦ୍ୱାରା କୁହାଯାଇଛିଯେ, ଏହି ପଦକ୍ଷେପ ନିଶ୍ଚିତ ଭାବରେ ଦିଲ୍ଲୀର ବ୍ୟବସାୟ ତଥା ଅର୍ଥନୈତିକ କାର୍ଯ୍ୟକଳାପ ଉପରେ ପ୍ରଭାବ ପକାଇବ, କିନ୍ତୁ ବର୍ତ୍ତମାନ ଜୀବନକୁ ପ୍ରଥମ ପ୍ରାଥମିକତା ଦେବାକୁ ପଡିବ।
CAIT କହିଛି ଯେ, ଶନିବାର ଦିନ ଦିଲ୍ଲୀ ମୁଖ୍ୟମନ୍ତ୍ରୀ କେଜ୍ରିୱାଲ ନିଜେ ସ୍ୱୀକାର କରିଛନ୍ତି ଯେ ଦିଲ୍ଲୀରେ ଶଯ୍ୟାର ଅଭାବ ରହିଛି ଏବଂ ଔଷଧ, ଅମ୍ଳଜାନ ଇତ୍ୟାଦିର ମଧ୍ୟ ଅଭାବ ରହିଛି। ପରିସ୍ଥିତି ଅନିୟନ୍ତ୍ରିତ ହେବାର ସମ୍ଭାବନା ରହିଛି।
ଅନ୍ୟପକ୍ଷରେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଗୃହମନ୍ତ୍ରୀ ଅମିତ ଶାହାଙ୍କୁ ଦିଲ୍ଲୀ ସମେତ ସମସ୍ତ ରାଜ୍ୟରେ ଜିଲ୍ଲା ସ୍ତରରେ କରୋନା ରୋକିବା ପାଇଁ ଏକ ବ୍ୟାପକ ଯୋଜନା ପ୍ରସ୍ତୁତ କରିବାକୁ କ୍ୟାଟ୍ ପୁଣିଥରେ ଅନୁରୋଧ କରିଛି।
CAIT ର ଜାତୀୟ ସାଧାରଣ ସମ୍ପାଦକ ପ୍ରବୀଣ ଖଣ୍ଡେଲୱାଲ ଏଠାରେ କହିଛନ୍ତି, ଦିଲ୍ଲୀର ବ୍ୟବସାୟିକ ସଂଗଠନଗୁଡ଼ିକ ପ୍ରସ୍ତାବିତ ଲକ୍ଡାଉନ୍ ସମୟରେ ଦିଲ୍ଲୀରେ ରହୁଥିବା ଲୋକଙ୍କୁ ଅତ୍ୟାବଶ୍ୟକ ସାମଗ୍ରୀ ଯୋଗାଣ ତଥା ସରକାରଙ୍କୁ ସବୁ ପ୍ରକାର ସାହାଯ୍ୟ କରିବା ପାଇଁ ସମ୍ପୂର୍ଣ୍ଣ ପ୍ରସ୍ତୁତ।
ସେ ଲେଫ୍ଟନାଣ୍ଟ ଗଭର୍ଣ୍ଣରଙ୍କୁ ଅନୁରୋଧ କରି କହିଛନ୍ତି ଯେ, ଏହି ସମସ୍ୟା କେବଳ ସରକାରଙ୍କ ପାଇଁ ନୁହେଁ ବରଂ ଦିଲ୍ଲୀର ପ୍ରତ୍ୟେକ ନାଗରିକଙ୍କ ପାଇଁ ଏବଂ ପିପିପି ମଡେଲ ଆଧାରରେ ସରକାର ଏବଂ ଦାୟିତ୍ତ୍ୱବାନ ନାଗରିକମାନେ ଏହି ମହାମାରୀକୁ ମୁକାବିଲା କରିବାକୁ ପ୍ରସ୍ତୁତ ହେବା ଆବଶ୍ୟକ।