ଭଦ୍ରକ, ୯ା୧୧ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ପୁରୁଣାବଜାର ଥାନାରେ ଜବଦ ବାରୁଦଗଦାରେ ନିଆଁ ଲାଗି ୩ଜଣ ଯବାନ ଆହତ ହୋଇଛନ୍ତି । ଗତକାଲି ବିଳମ୍ବିତ ରାତିରେ ଏହି ଘଟଣା ଘଟିଛି । ଜଣା ଯାଇଛି ପୁଲିସ ପକ୍ଷରୁ ଚଢଉ ପରେ ଦୀର୍ଘ ଦିନରୁ ଜବଦ ହୋଇ ରହିଥିବା କିଛି ବାରୁଦକୁ ଏକ ବାଲ୍ତିରେ ଭର୍ତ୍ତି କରାଯାଇ ଏହାକୁ ବ୍ୟାରେକ୍ ଭିତରେ ରଖାଯାଇଥିଲା । ବ୍ୟାରେକରେ ଡ୍ୟୁଟି ପାଇଁ ଥାନାକୁ ଯୋଗାଇ ଦିଆଯାଇଥିବା ଓଏସ୍ଏପି ଯବାନ ସେହ ଘରେ ଶୋଉଥିଲେ । ଗତକାଲି ରାତିରେ ମଶା ଧୂପରୁ କୌଣସି ପ୍ରକାରେ ନିଆଁ ଝୁଲ ଉଡି ଉକ୍ତ ବାରୁଦ ବାଲ୍ତିରେ ପଡିଥିଲା । ଫଳରେ ଏକ ବଡ ଧରଣର ବିସ୍ଫୋରଣ ହେବା ସହିତ ନିଆଁ ଲାଗିଯାଇଥିଲା । ବ୍ୟାରେକ୍ରେ ଶୋଇଥିବା ବାରିପଦା ୫ମ ବାଟାଲିଅନ ଓଏସ୍ଏପି ଯବାନ ଗଣେଶ ନାୟକ, ସଂଗ୍ରାମ ଟୁଡୁ ଏବଂ ମନୋରଂଜନ ଘଡେଇ ନିଆଁରେ ପୋଡି ଆହତ ହୋଇଥିଲେ । ତୁରନ୍ତ ସେମାନଙ୍କୁ ଭଦ୍ରକ ମେଡିକାଲକୁ ଅଣା ଯାଇଥିଲା । ଦମକଳ ପହଞ୍ଚି ନିଆଁକୁ ଲିଭାଇଥିଲା । ଆହତମାନଙ୍କ ମଧ୍ୟରେ ମୟୁରଭଂଜ ଜିଲ୍ଲା ବଡସାହି ଞ୍ଚଳର ଯୁବକ ସଂଗ୍ରାମଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ କଟକ ସ୍ଥାନାନ୍ତର କରାଯାଇଛି । ଅନ୍ୟ ଦୁଇଜଣ ବାଲେଶ୍ୱର ଜିଲ୍ଲା ଚନ୍ଦନେଶ୍ୱର ଅଞ୍ଚଳର ଯୁବକ ମନୋରଂଜନ ଓ ମୟୁରଭଂଜ ଜିଲ୍ଲା ଯଶିପୁର ଅଞ୍ଚଳର ଗଣେଶ ଭଦ୍ରକ ମେଡିକାଲରେ ଚିକିତ୍ସାଧୀନ ଅଛନ୍ତି । ତେବେ କେଉଁ ପରିସ୍ଥିତିରେ ଏହି ଅଘଟଣ ଘଟିଲା ଏ ନେଇ ତଦନ୍ତ ଆରମ୍ଭ ହୋଇଛି ।
ଥାନା ବାରୁଦଗଦାରେ ଅଗ୍ନିକାଣ୍ଡ, ୩ ଯବାନ ଆହତ
