କଳାହାଣ୍ଡି ୧୨.୦୪ (ଓଡ଼ିଆ ପୁଅ) ସଂପ୍ରତି ଜୁନାଗଡ ଓ ଆଖପାଖ ଅଂଚଳରେ ଜମି ମାଫିଆ ମାନଙ୍କର ପ୍ରାଦୁର୍ଭାବ ବଢୁଥିବା ଦେଖାଯାଉଛି। ଜୁନାଗଡ ତହସିଲରେ ବ୍ୟାପକ ହେରାଫେରୀ ଓ ଜାଲିଆତି ମାଧ୍ୟମରେ ଜମି ମାଲିକଙ୍କୁ ଚକମା ଦେଖାଇ ଶାଗମାଛ ମୂଲ୍ୟରୁ କମ ମୂଲ୍ୟରେ ଜମି ହାତେଇ ନେଇ ପ୍ଲଟିଂ ମାଧ୍ୟମରେ ଚଢା ଦରରେ ଜମି ବିକ୍ରି କରାଯାଉଥିବାର ଅନେକ ଉଦାହରଣ ରହିଛି। ବାହାଲ ଜମି କିସମ ଗୁଡିକୁ ପାଂଚ/ଦଶ ଡିସମିଲ ଆକାରରେ ବିକ୍ରୀ କରାଯାଉଥିବା ଶହ ଶହ ଉଦାହରଣ ରହିଛି। କେଉଁ ଉଦ୍ଦେଶ୍ୟରେ ଓ କାହିଁକି ବାହାଲ କିସମ ଜମି ପାଂଚ/ଦଶ ଡିସମିଲ ଆକାରରେ ବିକ୍ରୀ କରାଯାଉଛି ତାହାର ଏକ ଉଚ୍ଚ ସ୍ତରୀୟ ତଦନ୍ତ କରାଗଲେ ବହୁ ଗୋପନୀୟ ତଥ୍ୟ ପଦାକୁ ଆସିପାରନ୍ତା ବୋଲି ବୁଦ୍ଧିଜୀବି ମହଲରେ ଦାବି ହେଉଛି।
ଜୁନାଗଡ ତହସିଲ ଅଧିନସ୍ଥ ହିଂଜଲି ବାହାଲି ମୌଜାର ରାମସ୍ୱାମୀ ମହାପ୍ରଭୂଙ୍କ ଜମିକୁ ଜାଲିଆତି କରାଯାଇ ସେହି ଜମି ମଧ୍ୟରେ ଥିବା ଗୋଚର ଜମିକୁ ମିଶାଇ ପ୍ଲଟିଂ ମାଧ୍ୟମରେ ବିକ୍ରୀ କରିଦେଇ ଜମି ମାଫିଆମାନେ ପ୍ରଚୁର ଲାଭ ଉଠାଇଥିବାର ଅଭିଯୋଗ ହେଉଛି। ନିକଟ ଅତୀତରେ ଜୁନାଗଡ ମୌଜାର କଲମପୁର ରାସ୍ତା ରେ ଖାତା ନଂ.୨୪ ଶ୍ରୀନିବାସ ପଣ୍ଡା, ଯୁଗେଶ୍ୱର ପଣ୍ଡା, ନାରାୟଣ ପଣ୍ଡା, କୃଷ୍ଣଚନ୍ଦ୍ର ପଣ୍ଡା, ଧନେଶ୍ୱର ପଣ୍ଡା, ଉମାକାନ୍ତ ପଣ୍ଡା ଆଦି ଅନେକଙ୍କ ନାମରେ ଥିବା ଜମି ସବୁକୁ ଖାତାଦାରଙ୍କ ଉତ୍ତରାଧିକାରୀମାନଙ୍କ ଅଗୋଚରରେ ଚଂଚକତା କରାଯାଇ ପ୍ଲଟିଂ ମାଧ୍ୟମରେ ବିକ୍ରୀ କରିଦିଆଯାଇଥିବା ଅଭିଯୋଗ ହୋଇଛି। ଖାତାଦାରଙ୍କ ଅନ୍ତେ ବିକ୍ରୀ କରାଗଲେ ସୁଦ୍ଧା ସମସ୍ତ ଉତ୍ତରାଧିକାରୀମାନଙ୍କ ଜଣାତରେ ତାହା ତହସିଲରେ ମ୍ୟୁଟେସନ ହେବା ବିଧେୟ କିନ୍ତୁ ଚଂଚକତା କରାଯାଇ ଅନେକ ଉତରାଧିକାରୀଙ୍କ ଅଗୋଚରରେ ସେହି ଜମି ସବୁ ଜୁନାଗଡ ତହସିଲରେ ମ୍ୟୁଟେସନ କରାଯାଇଥିବା ଲିଖିତ ଅଭିଯୋଗ ହୋଇଛି। ଶ୍ରୀନିବାସ ପଣ୍ଡାଙ୍କ ଝୀଅଙ୍କୁ ଅଣଦେଖା କରାଯାଇ ଜମି ସବୁ ବିକ୍ରୀ କରାଯାଉଥିବା ନେଇ ତାଙ୍କର ପୁଅ ତହସିଲ ଅଫିସରେ ଏବଂ ରେଜିଷ୍ଟ୍ରୀ ଅଫିସରେ ଲିଖିତ ଅଭିଯୋଗ କରିଥିବା ଜଣାପଡିଛି। ଏହିଭଳି ଅନେକ ଘଟଣା ଜୁନାଗଡ ତହସିଲ ଅଫିସରେ ହେଉଥିବା ଆଲୋଚନା ହେଉଛି। ସମସ୍ତ ଉତରାଧିକାରୀଙ୍କ ଅଗୋଚରରେ କିପରି ଭାବେ ମ୍ୟୁଟେସନ କରାଗଲା ସେସଂପର୍କରେ ଅନୁନ୍ଧାନ କରାଗଲେ ବହୁ ଗୋପନୀୟ ତଥ୍ୟ ପଦାକୁ ଆସିପାରିବ ବୋଲି ଦାବି ହେଉଛି।