ଜଣାଶୁଣା ସାରସ୍ୱତ ସାଧିକା କବୟିତ୍ରୀ ପାର୍ବତୀ ବିଶ୍ୱାଳଙ୍କ ଦେହାନ୍ତ

ଭଦ୍ରକ, ୧୦ା୧୧ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଅବସରପ୍ରାପ୍ତ ଶିକ୍ଷୟିତ୍ରୀ, ଜଣାଶୁଣା କବୟିତ୍ରୀ, ଲେଖିକା, ତଥା ଗୀତିକାର ପାର୍ବତୀ ବିଶ୍ୱାଳଙ୍କର ଭଦ୍ରକ ଜଗନ୍ନାଥପୁରସ୍ଥିତ ବାସଭବନରେ ହୃଦଘାତରେ ପରଲୋକ ହୋଇଯାଇଛି । ସେ ଅତ୍ୟନ୍ତ ସରଳ, ମେଳାପୀ ଓ ଉଦାର ହୃଦୟ ସମ୍ପନ୍ନା ଥିଲେ । ଭଦ୍ରକର ବହୁ ସାହିତ୍ୟ ଓ ସାଂସ୍କୃତିକ ଅନୁଷ୍ଠାନ ସହିତ ସେ ଦୀର୍ଘଦିନ ଧରି ଜଡ଼ିତ ରହିଥିଲେ । ଜଗନ୍ନାଥଙ୍କର ପରମ ଭକ୍ତ ଭାବେ ଜଣାଶୁଣା ସ୍ୱର୍ଗତା ବିଶ୍ୱାଳ ନିଜର ସାରସ୍ୱତ ପ୍ରତିଭା ପାଇଁ ବହୁ ଅନୁଷ୍ଠାନରୁ ପୁରସ୍କୃତ ଓ ସମ୍ବର୍ଦ୍ଧିତ ହୋଇଥିଲେ । ତାଙ୍କର ହଠାତ୍ ଅବର୍ତ୍ତମାନରେ ଭଦ୍ରକର ସାହିତ୍ୟ ଓ କଳା ଜଗତ ସମେତ ବିଭିନ୍ନ ମହଲରେ ଶୋକର ଛାୟା ଖେଳିଯାଇଛି । ମରଶରୀର ନିକଟରେ ତାଙ୍କ ସ୍ୱାମୀ ଅବସରପ୍ରାପ୍ତ ଶିକ୍ଷକ ପ୍ରଭାତ ଜେନା, ଏକମାତ୍ର ଝିଅ ପ୍ରିୟଦର୍ଶନୀ ମଲ୍ଲିକ, ଜାମାତା ତଥା ଭଦ୍ରକ ବିଧାୟକ ସଞ୍ଜିବ କୁମାର ମଲ୍ଲିକ, ବୋହୂ ପୁଷ୍ପିତା ଜେନା ଓ ଏକମାତ୍ର ପୁତ୍ର ତଥା ହିରୋ ସୋ’ରୁମର ମାନେଜିଂ ପାର୍ଟନର ପ୍ରୀତିରଂଜନ ଜେନା ଉପସ୍ଥିତ ଥିଲେ । ପୁରୀ ସ୍ୱର୍ଗଦ୍ୱାରରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଛି । ପ୍ରୀତିରଂଜନ ମୁଖାଗ୍ନି ଦେଇଥିଲେ । ଭଦ୍ରକର ବହୁ ଅନୁଷ୍ଠାନ ଓ ବ୍ୟକ୍ତି ବିଶେଷଙ୍କ ସମେତ ବିଭିନ୍ନ ରାଜନୈତିକ ନେତୃବୃନ୍ଦ ତାଙ୍କ ବାସଭବନରେ ପହଂଚି ଶେଷ ଦର୍ଶନ କରିଥିଲେ ।