ଚଷାଖଣ୍ଡରେ ରୋଷେଇ ଗ୍ୟାସରୁ ଜଳିଗଲା ୩ବଖରା

ହାଟଡିହି- ୧୨ / ୧୧ : (ଓଡିଆପୁଅ / ବିକାଶ ବିଶ୍ୱାଳ) କେନ୍ଦୁଝର ଜିଲ୍ଲା ହାଟଡିହି ବ୍ଲକ ଡଅଁର ପଞ୍ଚାୟତର ଚଷାଖଣ୍ଡ ଗ୍ରାମରେ ଆଜି ଅପରାହ୍ନରେ ରୋଷେଇ ଗ୍ୟାସରୁ ଅଗ୍ନିକାଣ୍ଡ ଘଟି ତିନିବଖରା ଘର ଜଳିଯିବା ସହ ଲକ୍ଷାଧିକ ଟଙ୍କାର ସମ୍ପତ୍ତି ପୋଡି ଭଷ୍ମୀଭୁତ ହୋଇଯାଇଛି । ଖବରରୁ ଜଣାଯାଇଛି ଯେ ଗ୍ରାମର କାର୍ତ୍ତିକେଶ୍ୱର ବାରିକଙ୍କ ଘରେ ରୋଷେଇ ଚାଲିଥିବା ସମୟରେ ଅସାବଧାନତାରୁ ଗ୍ୟାସ ଲିକ କରିଥିଲା । ଗ୍ୟାସ ଲିକରୁ ଅଗ୍ନିକାଣ୍ଡ ଘଟିବାରୁ ପରିବାର ଲୋକେ ଜୀବନ ବଞ୍ଚାଇବା ପାଇଁ ଘରୁ ବାହାରକୁ ଦୌଡି ପଳାଇ ଆସିଥିଲେ । ଫଳରେ ଚାହୁଁ ଚାହୁଁ ତାଙ୍କର ତିନବଖରା ଘର ସମେତ ଘରେଥିବା ଧାନ, ଚାଉଳ, ଫ୍ରିଜ, ସୁନା ରୁପା ଓ ସମସ୍ତ ଗୃହୋପକରଣ ସାମଗ୍ରୀ ପୋଡି ଭଷ୍ମୀଭୁତ ହୋଇଯାଇଥିଲା । ହାଟଡିହି ଦମକଳ କେନ୍ଦ୍ରର କର୍ମଚାରୀ ମାନେ ପହଞ୍ଚି ନିଆଁକୁ ଆୟତ କରିଥିଲେ । ଡଅଁର ରାଜସ୍ୱ ସର୍କଲର ରାଜସ୍ୱ ନିରୀକ୍ଷକ ଘଟଣାସ୍ଥଳରେ ପହଞ୍ଚି କ୍ଷୟକ୍ଷତି ଆକଳନ କରିଛନ୍ତି । ବିପନ୍ନ ପରିବାରକୁ ତୁରନ୍ତ ସରକାରୀ ସାହାଯ୍ୟ ଯୋଗାଇ ଦେବାକୁ ଦାବି ହେଉଛି ।