ଭୁବନେଶ୍ୱର ୧୧.୧୨ (ଓଡ଼ିଆ ପୁଅ) – ମମିତା ମେହେର ହତ୍ୟାକାଣ୍ଡରେ ସଂପୃକ୍ତ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କୁ ବହିଷ୍କାର ଓ ଗିରଫ ସହ ହାଇକୋର୍ଟଙ୍କ ତତ୍ୱାବଧାନରେ ଏସଆଇଟି ତଦନ୍ତ ଦାବିରେ ଗତକାଲି ଛାତ୍ର କଂଗ୍ରେସ ବିଧାନସଭା ଘେରାଉ କରିଥିଲା। ଛାତ୍ର କଂଗ୍ରେସର ଏହି ଶାନ୍ତିପୂର୍ଣ୍ଣ ଆନ୍ଦୋଳନ ଉପରେ ପୋଲିସ ମାତ୍ରାଧିକ ଦାଦାଗିରି କରିଛି। ପୋଲିସ କଂଗ୍ରେସ ଭବନରେ ପସି ଛାତ୍ର କଂଗ୍ରେସ କର୍ମୀମାନଙ୍କୁ ମରଣାନ୍ତକ ଆକ୍ରମଣ ନିନ୍ଦନୀୟ। ଘଟଣା ଉପରେ ବିଚାର ବିଭାଗୀୟ ଏବଂ ପ୍ରଶାସନିକ ତଦନ୍ତ ସହ ଦୋଷୀ ପୋଲିସ୍ ଅଫିସରଙ୍କ ବିରୋଧରେ ହତ୍ୟା ଉଦ୍ୟମ ଭଳି ସଙ୍ଗୀନ ଅପରାଧିକ ମାମଲା କରି ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛି କଂଗ୍ରେସ। ନହେଲେ ଆଗାମୀ ଦିନରେ ପୁଞ୍ଜିଭୂତ ଅସନ୍ତୋଷ ଯଦି ଉଗ୍ରରୂପ ନିଏ ତାହାହେଲେ ପୋଲିସ୍ ଅଫିସର ଓ ରାଜ୍ୟ ସରକାର ସଂପୂର୍ଣ୍ଣ ଦାୟୀ ରହିବେ ବୋଲି ସ୍ପଷ୍ଟ ଚେତାବନୀ ଦେଇଛି କଂଗ୍ରେସ।
ଆଜି କଂଗ୍ରେସ ଭବନରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ପିସିସି ସଭାପତି ଶ୍ରୀଯୁକ୍ତ ନିରଞ୍ଜନ ପଟ୍ଟନାୟକ କହିଲେ ଯେ ୨୧ବର୍ଷ ଧରି ଶାସନ କରୁଥିବା ମୁଖ୍ୟମନ୍ତ୍ରୀ ସବୁବେଳେ କୁହନ୍ତି ଆଇନ ତା ବାଟରେ ଯିବ। ଆଇନର ତଦନ୍ତକୁ ବାଟଣା କରି ସରକାରର ଗୃହମନ୍ତ୍ରୀଙ୍କୁ ସୁରକ୍ଷା ଦେବା ପ୍ରତିବାଦରେ ଛାତ୍ର କଂଗ୍ରେସର ଶାନ୍ତିପୂର୍ଣ୍ଣ ଆନ୍ଦୋଳନରେ ସାମିଲ ଛାତ୍ର କଂଗ୍ରେସ କାର୍ଯ୍ୟକର୍ତାଙ୍କୁ ପୋଲିସର ଆକ୍ରମଣ ନିନ୍ଦନୀୟ। ପୁନଶ୍ଚ ପୋଲିସ ନିଜର ସୀମା ଅତିକ୍ରମ କରି କଂଗ୍ରେସ ଭବନରେ ପଶି ଆକ୍ରମଣ କରିବା ଦଣ୍ଡନୀୟ ଅପରାଧ। ସ୍ୱାଧୀନତା ଆନ୍ଦୋଳନ ବେଳେ କଂଗ୍ରେସର ଲକ୍ଷ ଲକ୍ଷ କାର୍ଯ୍ୟକର୍ତା ବ୍ରିଟିଶ ପୋଲିସର ଗୁଳିକୁ ଡରିନଥିଲେ ଓ ସ୍ୱାଧୀନତା ଆଣିଥିଲେ। ଏବେ ପୋଲିସର ଲାଠିମାଡ଼କୁ ଡରିବେ ନାହିଁ ବରଂ ଆନ୍ଦୋଳନ ଆହୁରୀ ତୀବ୍ର ହେବା ବୋଲି ଶ୍ରୀ ପଟ୍ଟନାୟକ କହିଥିଲେ।
କଂଗ୍ରେସ ବିଧାୟକ ଦଳ ନେତା ଶ୍ରୀ ନରସିଂହ ମିଶ୍ର କହିଲେ ପୋଲିସ ଗାଡ଼ି ପୋଡ଼ା ଉଦ୍ୟମ ସଂପୂର୍ଣ୍ଣ ମନଗଢ଼ା କାହାଣି। ପୋଲିସ ଭାବେ ଅଭିଯୁକ୍ତ ଘରେ ଗଞ୍ଜେଇ ଲୁଚେଇ ରଖେ ଓ ପରବର୍ତ୍ତୀ ସମୟରେ ଗଞ୍ଜେଇ ଜବତ କରିବାର ମାମଲା କରେ ଏଭଳି ଅନେକ ଉଦାହରଣ ମୋର ଉକିଲାତି ଜୀବନରେ ଦେଖିଛି। ପୋଲିସ ଗାଡ଼ି ତଳେ ପୋଲିସ ନିଆଁ ଲଗାଇବା ଓ ଲିଭାଇବା ପୋଲିସର ମନଗଢ଼ା କାହାଣୀର ଏକ ଅଂଶବିଶେଷ। ଛାତ୍ର କଂଗ୍ରେସର କାର୍ଯ୍ୟକ୍ରମ ସଭା ସରିବା ପୂର୍ବରୁ ପୋଲିସ ଛାତ୍ର କଂଗ୍ରେସର କର୍ମକର୍ତାମାନଙ୍କୁ ଲାଠି ମାଡ଼ କରିଥିଲା। ମୁଁ ସଭାରେ ଯୋଗଦାନ କହିଥିଲି ଆମର ଆନ୍ଦୋଳନ ଶାନ୍ତିପୂର୍ଣ୍ଣ ଓ ସଂପୂର୍ଣ୍ଣ ଗଣତାନ୍ତ୍ରିକ ପ୍ରକିୟାରେ ଚାଲିବ। ଯଦି ଭିଡ଼ ଅନିୟନ୍ତ୍ରିତ ହେଲା ଆଇନର ବିଭିନ୍ନ ପ୍ରକ୍ରିୟା ଅନୁଯାୟୀ ଭିଡ଼କୁ ବେଆଇନ ଘୋଷଣା କରିଥାନ୍ତେ। ସମସ୍ତେ ସ୍ଥାନ ଛାଡ଼ି ଚାଲିଯିବାକୁ କାନକୁ ଶୁଭିଲା ଭଳିଆ ଡାକବାଜି ଯନ୍ତ୍ରଦ୍ୱାରା ଅନୁରୋଧ କରିଥାନ୍ତେି। ତାପରେ ପାଣି ମାଡ଼ କରାଯାଇଥ।।ନ୍ତା ତାପରେ ଘଉଡ଼ାଇବା ପାଇଁ ଲାଠି ଉଠେଇ ଡରେଇ ଥାନ୍ତେ। ସେଥିରେ ଯଦି ଆନ୍ଦୋଳନକାରୀଙ୍କୁ ଆୟତ କରିପାରି ନଥାନ୍ତେ ତେବେ ଆନ୍ଦୋଳନକାରୀଙ୍କ ଅଂଟାତଳକୁ ମୃଦୁ ଲାଠି ଚାଳନା କରାଯାଇଥାନ୍ତା। କିନ୍ତୁ ଗତକାଲି ହେବଆଇନ ଭାବେ ଛାତ୍ର କଂଗ୍ରେସ କାର୍ଯ୍ୟକର୍ତା ଓ ସାଧାରଣ ଜନତାଙ୍କୁ ମଣ୍ଡ ଉପରେ ଲାଠି ମାଡ଼ କରିବା ଦଣ୍ଡନୀୟ ଅପରାଧ। ପୁନଶ୍ଚ ଅପରାଧିକ ମନୋବୃତି ରଖି କଂଗ୍ରେସ ଭବନରେ ଅନୁ ପ୍ରବେଶ କରି ମହିଳା ଏବଂ ଛାତ୍ର କଂଗ୍ରେସ କର୍ମୀଙ୍କୁ ଆକ୍ରମଣ ଓ ଭଙ୍ଗାରୁଜା କରିବା ଗଣତନ୍ତ୍ର ରାଷ୍ଟ୍ରରେ ଲଜ୍ଜାଜନକ ଘଟଣା। ଦୋଷୀ ପୋଲିସ୍ ଅଫିସରଙ୍କ ବିରୋଧରେ ବେଆଇନ ଅନୁପ୍ରବେଶ ଓ ହତ୍ୟା ଉଦ୍ୟମ ଭଳି ସଂଗୀନ ଦଫାରେ କେସ ରୁଜୁ କରିବାକୁ ଦାବି କରୁଛି। ଅନ୍ୟଥା ପରିସ୍ଥିତି ଭୟାବହ ହେବ। ଶ୍ରୀ ମିଶ୍ର କହିଥିଲେ ଯେ ଅଣ୍ଡମାଡ଼ ଅପରାଧ ନୁହେଁ। ଓଡ଼ିଶା ହାଇକୋର୍ଟ ଲେଙ୍ଗୁ ମିଶ୍ର ବନାମ ଓଡ଼ିଶା ସରକାର ମାମଲାର ରାୟ ପରିପ୍ରେକ୍ଷୀରେ କୌଣସି ଛାତ୍ର କଂଗ୍ରେସ କାର୍ଯ୍ୟକର୍ତାଙ୍କୁ ଅଣ୍ଡାମାଡ଼ ଅଭିଯୋଗ ଉପରେ ପୋଲିସ୍ କୌଣସି କାର୍ଯ୍ୟାନୁଷ୍ଠାନ ନେଇପାରିବ ନାହିଁ। ବିରେନ ମିତ୍ର ମୁଖ୍ୟମନ୍ତ୍ରୀ ଥିବା ବେଳେ ହୋଇଥିବା ଛାତ୍ର ଆନ୍ଦୋଳଙ୍କୁ ସ୍ମରଣ କରି ଶ୍ରୀ ମିଶ୍ର କହିଲେ ଛାତ୍ରମାନେ ବିଧାନସଭା କୋଠାକୁ ପୋଡ଼ି ଦେଉଥିଲେ। କିନ୍ତୁ ସୋ ପୋଲିସକୁ ଫାଇରିଙ୍ଗ ଅର୍ଡର ଦେଇନଥିଲେ ସେ କହିଥିଲେ କୋଠା ଭାଙ୍ଗିଲେ ତିଆରି କରାଯାଇ ପାରିବ କିନ୍ତୁ କୌଣସି ଛାତ୍ର ମଲେ ପୁନଃଜୀବନ ଦିଆଯାଇ ପାରିବ ନାହିଁ। ବିଜୁ ପଟ୍ଟନାୟକ ଉପରେ ସଚିବାଳୟରେ ଆକ୍ରମଣ ହେଲା କିନ୍ତୁ ବିଜ ପଟ୍ଟନାୟକ କହିଲେ ଗୁଳି ମୋ ପକେଟରେ ବନ୍ଧୁକ ପୋଲିସ ହାତରେ ଏସବୁ ଜଣେ ଜଣେ ରାଜନେତାଙ୍କ ଗୁଣବତାର ପରିଚୟ। ନବୀନ ବାବୁ ତାଙ୍କ ପୁଅ ହିସାବରେ ଅନ୍ତତ କିଛି ଶିକ୍ଷାଲାଭ କରନ୍ତୁ ବୋଲି ଶ୍ରୀ ମିଶ୍ର କହିଛନ୍ତି। ଏହି ସାମ୍ବାଦିକ ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ପିସିସି ଗଣମାଧ୍ୟମ ଅଧ୍ୟକ୍ଷ ଶ୍ରୀ ଗଣେଶ୍ୱର ବେହେରା, ପିସିସି ଉପସଭାପତି ଶ୍ରୀ ଶିବାନନ୍ଦ ରାୟ, ରାଜ୍ୟ ଛାତ୍ର କଂଗ୍ରେସ ସଭାପତି ଶ୍ରୀ ୟାସିର ନୱାଜଙ୍କ ସମେତ ଗତ କାଲି ପୋଲିସ ମାଡ଼ରେ ଆହତ କିଛି ଛାତ୍ର ନେତା ଉପସ୍ଥିତ ଥିଲେ।