ଭୁବନେଶ୍ୱର, ୨୮ା୯ (ଓଡ଼ିଆ ପୁଅ) : ଆଜି ଶହୀଦ ଏ ଆଜ କମ୍ରେଡ୍ ଭଗତ୍ ସିଂଙ୍କ ୧୧୩ତମ ଜନ୍ମବାର୍ଷିକୀରେ ଏ ଆଇ ଏସ୍ ଏଫ୍ ଖୋର୍ଦ୍ଧା ଜିଲ୍ଲା କମିଟି ପକ୍ଷରୁ “ସାମ୍ପ୍ରତିକ ଶିକ୍ଷା ବ୍ୟବସ୍ଥା ଓ ଭଗତ ସିଂଙ୍କ ବିଚାର” ଶୀର୍ଷକ ରାଜ୍ୟସ୍ତରୀୟ ଆଲୋଚନାଚକ୍ର ଭୁବନେଶ୍ୱର ୟୁନିଟ୍-୬ଠାରେ ମହା ସମାରୋହରେ ପାଳିତ ହୋଇଯାଇଛି। ଏହି ଆଲୋଚନା ଚକ୍ରକୁ ଉଚ୍ଚ ଶିକ୍ଷା ବିଭାଗର ପୂର୍ବତନ ଅତିରିକ୍ତ ନିର୍ଦ୍ଦେଶକ ପ୍ରଫେସର ଅମୀୟ କୁମାର ମହାନ୍ତି ଉଦ୍ଘାଟନ କରି ଜାତୀୟ ଶିକ୍ଷାନୀତି ୨୦୨୦ କିଭଳି ପ୍ରାଥମିକ ଠାରୁ ଉଚ୍ଚତମ ଶିକ୍ଷା ପର୍ଯ୍ୟନ୍ତ ଗୁଣମାନ ହ୍ରାସ କରିବା ସହ ଘରୋଇ ଶିକ୍ଷା ବେପାରୀଙ୍କ ଲାଭ ଲାଳସାକୁ ଚରିତାର୍ଥ କରିବା ପାଇଁ ଶିକ୍ଷା ବ୍ୟବସ୍ଥାର ବ୍ୟାପକ ଘରୋଇକରଣ ପ୍ରସ୍ତାବ ରଖାଯାଇଛି ଓ ଏହା ବିରୋଧରେ ଭଗତ ସିଂଙ୍କ ଆଦର୍ଶରେ ଅନୁପ୍ରାଣିତ ଏ-ଆଇ-ଏସ୍-ଏଫ୍- ସମେତ ବିଭିନ୍ନ ଛାତ୍ର ଓ ଯୁବ ସଂଗଠନ ସର୍ବଭାରତୀୟ ଶିକ୍ଷକ ଫେଡେରେସନ୍ ମିଳିତ ଭାବେ ପ୍ରତିବାଦ ଓ ପ୍ରତିରୋଧ ଚଳାଇଛନ୍ତି। ଏହି କାର୍ଯ୍ୟକ୍ରମରେ ଏ-ଆଇ-ଏସ୍-ଏଫ୍-ର ପୂର୍ବତନ ନେତା ତଥା ସିପିଆଇ ରାଜ୍ୟ ସମ୍ପାଦକ କମ୍ରେଡ୍ ଆଶିଷ କାନୁନ୍ଗୋ, ପ୍ରଫେସର ମଧୁମିତା ରାୟ, ରେଭେନ୍ସା କଲେଜର ପୂର୍ବତନ ଛାତ୍ର ସଂସଦ ସଭାପତି କମ୍ରେଡ୍ ବିଜୟ ମହାନ୍ତି, କେନ୍ଦୁଝରର ଛାତ୍ରନେତା ଆର୍ଯ୍ୟାନ ଜୟଶ୍ୱାଲ ପ୍ରମୁଖ ତାଙ୍କ ସୁଚିନ୍ତିତ ମତ ଦେଇ ଜାତୀୟ ଶିକ୍ଷାନୀତି ୨୦୨୦ କାର୍ଯ୍ୟକାରୀ ହେଲେ ଶହୀଦ ଭଗତ ସିଂହଙ୍କ ବିଚାରର ଭାରତ – ବିଭିନ୍ନତା ମଧ୍ୟରେ ଏକତା ଭଳି ଗୁରୁତ୍ୱପୂର୍ଣ୍ଣ ଦିଗ ବାଦ ପଡ଼ିଯିବ, ଆର୍ଥିକ – ସାମାଜିକ ଅନଗ୍ରସର ବର୍ଗ, ଆଦିବାସୀ, ଦଳିତ ଓ ସଂଖ୍ୟାଲଘୁ ପରିବାରର ଛାତ୍ରଛାତ୍ରୀ ଉଚ୍ଚଶିକ୍ଷା ପ୍ରାପ୍ତିରୁ ବଞ୍ଚିତ ହେବେ ଓ ସେଥିପାଇଁ ଏହାର ପ୍ରତିରୋଧ କରିବାକୁ ଆହ୍ୱାନ ଦେଇଥିଲେ। ଏ-ଆଇ-ଏସ୍-ଏଫ୍-ର ରାଜ୍ୟ ସଭାପତି ସଂଘମିତ୍ରା ଜେନା ସଭାପତିତ୍ୱ କରି ଏହି ଶିକ୍ଷା ସଂକୋଚନକାରୀ ଜାତୀୟ ଶିକ୍ଷାନୀତି- ୨୦୨୦ ପ୍ରତ୍ୟାହାର ଦାବିରେ ଦେଶବ୍ୟାପୀ ଶକ୍ତିଶାଳୀ ଛାତ୍ର ଆନ୍ଦୋଳନ ପାଇଁ ଦୃଢ ଆହ୍ୱାନ ଦେଥିଲେ। କରୋନା ମହାମାରୀ ଯୋଗୁଁ ଗତ ମାର୍ଚ୍ଚ ୨୨ ରୁ ୨୧ ସେପ୍ଟେମ୍ବର ପର୍ଯ୍ୟନ୍ତ ବିଭିନ୍ନ କଟକଣା ଥିବାରୁ ଚଳିତ ବର୍ଷ ଏ-ଆଇ-ଏସ୍-ଏଫ୍-ର ୮୫ତମ ପ୍ରତିଷ୍ଠା ଦିବସ ଅବସରରେ ଛାତ୍ରଛାତ୍ରୀମାନଙ୍କ ପାଇଁ ବକ୍ତୃତା ଓ ପ୍ରବନ୍ଧ ପ୍ରତିଯୋଗିତା ଅନଲାଇନ୍ରେ ଅନୁଷ୍ଠିତ ହୋଇଥିଲା। ଅଗଷ୍ଟ ୧୨ ତାରିଖ ରାଜ୍ୟସ୍ତରୀୟ ଭର୍ଚୁଆଲ ପ୍ରତିଷ୍ଠା ଦିବସରେ ପ୍ରତିଯୋଗୀଙ୍କ ମୂଲ୍ୟାୟନ ଭିତ୍ତିରେ ପ୍ରଥମ, ଦ୍ୱିତୀୟ ଓ ତୃତୀୟ କୃତକାର୍ଯ୍ୟ ପ୍ରତିଯୋଗୀ ଚିହ୍ନିତ ହୋଇ ଘୋଷରା କରାଯାଇଥିଲା। ଖୋର୍ଦ୍ଧା ଜିଲ୍ଲାର ପ୍ରତିଯୋଗୀମାନଙ୍କୁ ଏହି କାର୍ଯ୍ୟକ୍ରମରେ ମାନପତ୍ର ଓ ପୁରସ୍କାର ପ୍ରଦାନ କରାଯାଇଥିଲା। ଏହି କାର୍ଯ୍ୟକ୍ରମର ମଞ୍ଚ ଆହ୍ୱାନ ଛାତ୍ରନେତା ମାନସ ରଞ୍ଜନ କର, ପ୍ରତିଯୋଗୀମାନଙ୍କୁ ପ୍ରମାଣପତ୍ର ପ୍ରଦାନରେ ରୁଦ୍ର ନାରାୟଣ ଶ୍ରୀବାସ୍ତବ, କିଶୋର ନାୟକ, ଲିଙ୍ଗରାଜ ସାହୁ, ନରେନ୍ଦ୍ର ବେହେରା, ତପନ ବାରିକ, ତପନ ସ୍ୱାଇଁ, ଗୋହି ଗୋବିନ୍ଦ ବେଶ୍ରା, ସୁରେନ୍ଦ୍ର ବେହେରା ପ୍ରମୁଖ ପରିଚାଳନା କରିଥିଲେ। କାର୍ଯ୍ୟକ୍ରମ ଆରମ୍ଭରେ ଭଗତ ସିଂଙ୍କ ଫଟୋ ଚିତ୍ରରେ ମାଲ୍ୟାର୍ପଣ ଓ ଶେଷରେ ବିବେକ କ୍ରିଷ୍ଣ ସୁବୁଦ୍ଧି ଧନ୍ୟବାଦ ଅର୍ପଣ କରିଥିଲେ।
