ଆହ୍ଲାବାଦ୍ ୧୭ ସେପ୍ଟେମ୍ବର (ଓଡ଼ିଆ ପୁଅ) ଆହ୍ଲାବାଦ ହାଇକୋର୍ଟ ଏକ ଗୁରୁତ୍ତ୍ୱପୂର୍ଣ୍ଣ ନିଷ୍ପତ୍ତିରେ କହିଛନ୍ତି ଯେ, ଜଣେ ପ୍ରାପ୍ତ ବୟସ୍କ ବ୍ୟକ୍ତି ତାଙ୍କ ପସନ୍ଦର ଜୀବନ ସାଥୀ ବାଛି ପାରିବେ। ଏଥିପାଇଁ ତାଙ୍କର ସମସ୍ତ ଅଧିକାର ଅଛି।
ହାଇକୋର୍ଟ କହିଛନ୍ତି ଯେ ଯଦି ଜଣେ ବୟସ୍କ ବ୍ୟକ୍ତି ଅନ୍ୟ ଧର୍ମରେ ବିବାହ କରିବାକୁ ଚାହାଁନ୍ତି, ତେବେ ସେ ଏହା କରିବାକୁ ମୁକ୍ତ ଅଟନ୍ତି। ଏହି ରାୟ ଘୋଷଣା କରିବାବେଳେ ହାଇକୋର୍ଟ କହିଛନ୍ତି ଯେ ଯଦି ଜଣେ ବୟସ୍କ ବ୍ୟକ୍ତି ଏପରି କରନ୍ତି, ତା’ହେଲେ ପିତାମାତାଙ୍କର ମଧ୍ୟ ତାଙ୍କ ଦାମ୍ପତ୍ୟ ଜୀବନରେ ହସ୍ତକ୍ଷେପ କରିବାର ଅଧିକାର ନାହିଁ।
ହାଇକୋର୍ଟ ଏହା ମଧ୍ୟ କହିଛନ୍ତି ଯେ ଯଦି ସେମାନେ କୌଣସି ବିପଦ ଅନୁଭବ କରନ୍ତି, ତେବେ ସେମାନେ ପୋଲିସର ସୁରକ୍ଷା ଦାବି କରିବା ଉଚିତ, ପୋଲିସକୁ ସୁରକ୍ଷା ଯୋଗାଇବାକୁ ପଡିବ।
ସମ୍ପର୍କୀୟମାନେ ବିବାହ ବିରୁଦ୍ଧରେ ଥିଲେ
ସୂଚନାଯୋଗ୍ୟୟେ, ଯେ ଜଣେ ମୁସଲମାନ ମହିଳା ଜଣେ ହିନ୍ଦୁ ଯୁବକଙ୍କୁ ବିବାହ କରିଥିଲେ। ବିବାହ ପରେ ମହିଳା ହିନ୍ଦୁ ଧର୍ମ ଗ୍ରହଣ କରିବାକୁ ଜିଲ୍ଲା ମାଜିଷ୍ଟ୍ରେଟଙ୍କ ଅନୁମତି ମାଗିଥିଲେ। ମହିଳାଙ୍କ ଦାବି ପରେ ଜିଲ୍ଲା ମାଜିଷ୍ଟ୍ରେଟ ପୋଲିସ ଷ୍ଟେସନରୁ ଏ ସମ୍ପର୍କରେ ରିପୋର୍ଟ ମାଗିଥିଲେ। ଜିଲ୍ଲା ମାଜିଷ୍ଟ୍ରେଟଙ୍କ ନିର୍ଦ୍ଦେଶରେ ପୋଲିସ କହିଛି ଯେ ଯୁବକଙ୍କର ବାପା ଏହି ବିବାହରେ ରାଜି ନୁହଁନ୍ତି, ଏପରିକି ଝିଅର ପରିବାର ସଦସ୍ୟ ମଧ୍ୟ ଏହି ବିବାହ ବିରୋଧରେ ଅଛନ୍ତି।
ମହିଳା ନ୍ୟାୟ ପାଇଁ କୋର୍ଟରେ ନିବେଦନ କଲେ
ବିବାହ ପରେ ମହିଳା ଜଣକ ନିଜ ଏବଂ ସ୍ୱାମୀଙ୍କ ପାଇଁ ଜୀବନର ବିପଦ ଅନୁଭବ କରିଥିଲେ। ଏହା ପରେ ମହିଳା କୋର୍ଟରେ ଆବେଦନ କରି ନ୍ୟାୟ ପାଇଁ ନିବେଦନ କରିଥିଲେ। ମହିଳାଙ୍କ ନିବେଦନ ପରେ ହାଇକୋର୍ଟ କହିଛନ୍ତି ଯେ ଏହି ବିବାହରେ କୌଣସି ବ୍ୟକ୍ତି ହସ୍ତକ୍ଷେପ କରିବା ଉଚିତ୍ ନୁହେଁ।
ଉଭୟ ପାଇଁ ସୁରକ୍ଷା
ଶୁଣାଣି ସମୟରେ ହାଇକୋର୍ଟ ଏହା ମଧ୍ୟ କହିଛନ୍ତି ଯେ ଉଭୟଙ୍କୁ ପୋଲିସ ସୁରକ୍ଷା ଦେବା ଉଚିତ୍। ଶୁଣାଣି ସମୟରେ ହାଇକୋର୍ଟ ସ୍ପଷ୍ଟ କରିଛନ୍ତି ଯେ କୌଣସି ପ୍ରାପ୍ତବୟସ୍କ ବ୍ୟକ୍ତିଙ୍କ ନିଜ ପଦ୍ଧତିରେ ଜୀବନ ବଞ୍ଚିବାର ଅଧିକାର ରହିଛି। ଏଭଳି ପରିସ୍ଥିତିରେ କେହି ହସ୍ତକ୍ଷେପ କରିବା ଉଚିତ୍ ନୁହେଁ।