ନୂଆ ଦିଲ୍ଲୀ ୨୯-୬ (ଓଡ଼ିଆ ପୁଅ) ଆସନ୍ତାକାଲି ଅପରାହ୍ନ ୫ ଟା ସୁଦ୍ଧା ସଂଖ୍ୟାଗରିଷ୍ଠତା ପ୍ରମାଣ କରିବାକୁ ଉଦ୍ଧବ ସରକାରଙ୍କୁ ନିର୍ଦ୍ଦେଶ ଦେଲେ ରାଜ୍ୟପାଳ। ଏ ନେଇ ଆସନ୍ତାକାଲି ମହାରାଷ୍ଟ୍ର ବିଧାନସଭାର ଏକ ସ୍ୱତନ୍ତ୍ର ଅଧିବେଶନ ଅନୁଷ୍ଠିତ ହେବ।
ଏକନାଥ ସିନ୍ଦେ ବିଦ୍ରୋହୀ ବିଧାୟକଙ୍କ ସହ କାମାକ୍ଷା ମନ୍ଦିରରେ ପହଞ୍ଚି ଦର୍ଶନ କରୁଛନ୍ତି। ଆସନ୍ତାକାଲି ଫ୍ଲୋର ଟେଷ୍ଟ ପାଇଁ ମୁମ୍ବାଇ ଯିବେ।
ମଙ୍ଗଳବାର ମହାରାଷ୍ଟ୍ରରେ ରାଜନୈତିକ ଉତ୍ତେଜନା ତୀବ୍ର ହୋଇଛି। ବିଜେପି ରାଜ୍ୟପାଳ ଭଗତ ସିଂ କୋଶ୍ୟାରିଙ୍କ ନିକଟରେ ଫ୍ଲୋର ଟେଷ୍ଟ କରିବାକୁ ଦାବି କରିଛି।
ତେବେ ଏ ନେଇ ଗୌହାଟୀରେ ଉପସ୍ଥିତ ବିଦ୍ରୋହୀ ବିଧାୟକମାନେ ମୁମ୍ବାଇକୁ ଫେରିବା ପାଇଁ ପ୍ରସ୍ତୁତି ଆରମ୍ଭ କରିଛନ୍ତି।
ସୂଚନାଯୋଗ୍ୟଯେ, ମହାରାଷ୍ଟ୍ର ରାଜନୈତିକ ସଙ୍କଟ ମଧ୍ୟରେ ଶିବସେନା ବିଧାୟକଙ୍କ ବିଦ୍ରୋହ ପରେ ମହାରାଷ୍ଟ୍ରରେ ରାଜନୈତିକ ସଙ୍କଟ ତୀବ୍ର ହୋଇଛି। ଏଥି ସହ ମଙ୍ଗଳବାର ଅପରାହ୍ନରେ ବିଜେପି ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ଦିଲ୍ଲୀ ଆସିଥିଲେ। ଏଠାରୁ ସେ ସନ୍ଧ୍ୟାରେ ମୁମ୍ବାଇରେ ପହଞ୍ଚିଥିଲେ ଏବଂ ଏହା ପରେ ସେ ରାଜ୍ୟପାଳ ଭଗତ ସିଂ କୋଶ୍ୟାରିଙ୍କୁ ରାଜ୍ୟପାଳଙ୍କ ବାସଭବନରେ ଭେଟିଥିଲେ।
ସୂଚନାନୁସାରେ, କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଏବଂ ଦେବେନ୍ଦ୍ର ଫଡନାଭିସଙ୍କ ବୈଠକରେ ସରକାର ଗଠନ ଉପରେ ଆଲୋଚନା ହୋଇଥିଲା। ବିଜେପି କୋଟାର ମନ୍ତ୍ରୀଙ୍କ ବିଷୟରେ ବିସ୍ତୃତ ଆଲୋଚନା ହୋଇଥିଲା। ଆଇନଗତ ସମସ୍ତ ପ୍ରସଙ୍ଗ ଉପରେ ଆଲୋଚନା କରାଯାଇଥିଲା ଏବଂ ସରକାରୀ ଗଠନ ପଥରେ ଆସୁଥିବା ସମସ୍ତ ପ୍ରସଙ୍ଗ ଉପରେ ଆଇନଗତ ମାର୍ଗ ବିଷୟରେ ବିସ୍ତୃତ ସୂଚନା ଗୃହମନ୍ତ୍ରୀ ଅମିତ ଶାହାଙ୍କ ସମ୍ମୁଖରେ ରଖାଯାଇଥିଲା। ମୁଖ୍ୟମନ୍ତ୍ରୀ ବିଜେପିର ହେବ ଏବଂ ବିଜେପିରେ ୨୮ ଜଣ ମନ୍ତ୍ରୀ ରହିବେ।