ଅଢେଇ କେଜି ଗଂଜେଇ ଜବତ:୨ ଗିରଫ

ଭଦ୍ରକ, ୫ା୧୧ (ଓଡ଼ିଆ ପୁଅ / ସ୍ନିଗ୍ଧା ରାୟ)- ଧାମନଗର ବ୍ଲକ ଧୁଷୁରୀ ଥାନା ଅନ୍ତର୍ଗତ ଓଳଗ ଛକରୁ ଆଜି ଧୁଷୁରୀ ଥାନା ଓ ଆରଡି ଫାଣ୍ଡି ପକ୍ଷରୁ ଚଢଉ କରାଯାଇ ୨ଜଣ ଗଂଜେଇ ଚୋରା ବେପାରିକୁ ଗିରଫ କରିବା ସହିତ ସେମାନଙ୍କ ନିକଟରୁ ପ୍ରାୟ ଅଢେଇ କେଜି ଚୋରା ଗଂଜେଇ ଜବତ କରାଯାଇଛି। ଗିରଫ ଅଭିଯୁକ୍ତ ମାନେ ହେଲେ ଯାଜପୁର ଜିଲା ମଙ୍ଗଳପୁର ଥାନା ଅନ୍ତର୍ଗତ ପାରିପଦା ଗ୍ରାମର ମନୋରଂଜନ ସାହୁଙ୍କ ପୁଅ ରାଜେଶ ସାହୁ (୨୭) ଓ ଚାନ୍ଦପୁର ବିନ୍ଧାସାହି ଗ୍ରାମର ବିଦ୍ୟାଧର ଜେନାଙ୍କ ପୁଅ ବରୁଣ ଜେନା (୨୮)। ପ୍ରକାଶ ଯେ ଏହି ଦୁଇଜଣ ଚୋରାରେ ଗଂଜେଇ ନେଇ ଆରଡି ଆଡକୁ ଆସୁଥିବା କୌଣସି ସୂତ୍ରରୁ ଖବରପାଇ ଆରଡି ଫାଣ୍ଡି ଅଧିକାରୀ ପ୍ରଦୀପ ନାୟକ, ହାବିଲଦାର ରମେଶ ମଲ୍ଲିକ, ଯଯାତି ପ୍ରଧାନ, ଗୌତମ ବାରିକଙ୍କ ସମେତ ଧୁଷୁରୀ ପୁଲିସ ବିଭିନ୍ନ ସ୍ଥାନରେ ସାଧା ପୋଷାକରେ ଜଗି ରହିଥିଲେ। ଏକ ବାଇକ (ଓଆର-୦୫-ୱା-୧୬୯୬)ରେ ଏହି ଦୁଇ ବେପାରି ଗଂଜେଇ ଧରି ଆସୁଥିବା ବେଳେ ଓଳଗ ନିକଟସ୍ଥ ହନୁମାନ ଛକରୁ ଆରଡି ଫାଣ୍ଡି ପୁଲିସ ସେମାନଙ୍କୁ କାବୁ କରିଥିଲା। ସେମାନଙ୍କ ନିକଟରୁ ପ୍ରାୟ ଅଢେଇ କେଜି ଗଂଜେଇ ମଧ୍ୟ ଜବତ କରିଥିଲା। ଯାହାର ଆନୁମାନିକ ମୂଲ୍ୟ ୫୦ ହଜାରରୁ ଉର୍ଦ୍ଧ୍ୱ ଟଙ୍କା ହେବ। ଏହି ବ୍ୟବସାୟୀ ଦୁଇଜଣ ଯାଜପୁର ଜିଲାରୁ ନିୟମିତ ଭାବେ ଆସି ଆରଡି ଓ ଆଖପାଖ ଅଂଚଳରେ ଉକ୍ତ ଗଂଜେଇ ଚୋରା ବେପାରୀଙ୍କୁ ଦେଇଥାନ୍ତି। ଏଥିସହ ଅନେକ ନିଶା ଦ୍ରବ୍ୟ ଆଣି ମଧ୍ୟ ବେପାର କରିଥାନ୍ତି। ପରେ ସଂପୃକ୍ତ ଦୁଇ ଅଭିଯୁକ୍ତକୁ ଧୁଷୁରୀ ଥାନାକୁ ଅଣାଯାଇ ପୁଲିସ ଅଧିକ ତଦନ୍ତ କରିଥିଲା। ମାଜିଷ୍ଟେଟ ତଥା ଧାମନଗର ଅତିରିକ୍ତ ତହସିଲଦାର ଅଭିପ୍ସା ପଟ୍ଟନାୟକଙ୍କ ଉପସ୍ଥିତିରେ ପୁଲିସ ଚୋରା ଗଂଜେଇ ଜବତ କରିଛି। ଏନେଇ ଧୁଷୁରୀ ଥାନାରେ ଏକ ମାମଲା ରୁଜୁ କରାଯାଇଛି।